1 Corinthians 13

Kamba (Mbivilia) 1956

← Chapter 12 Jump to: Chapter 14 →

1O na nganeena na ithyomo sya andũ na sya alaĩka, nakwa ndi na wendo, ndwĩkĩte kĩndũ kĩtuĩtwe kya ũthuku kĩambaa, kana kĩla kĩkayaa.

2O na ngethĩwa na wathani, na kũmanya nzama syonthe na ũmanyi w’onthe; o na ngethĩwa na mũĩkĩĩo w’onthe, o na wa kũthamya iĩma, na ndi na wendo, nyie tĩ kĩndũ.

3O na ngaumya syĩndũ syakwa syonthe kũĩthya ngya, na nganengane mwĩĩ wakwa ũvĩvw’e na mwaki, nde na wendo, ndũndandĩthĩsya kĩndũ, nongi.

4Wendo nĩwũmĩĩasya, na nĩwĩkaa moseo; wendo ndwĩ na kĩwĩu; wendo ndwĩtũlasya, o na ndwĩkathĩĩaa,

5o na ndwĩkaa ũndũ ũtaĩle, o na ndwĩmanthĩaa syĩndũ, o na ndũthataa, na ndũtalĩlaa ũthũku;

6ndũtanĩaa ũndũnĩ ũte ũlũngalu, ĩndĩ ũtanaa vamwe na ũla w’o;

7nũvw’ĩkaa maũndũ onthe, nĩwĩtĩkĩlaa maũndũ onthe, nĩwĩkwatasya maũndũ onthe, nĩwũmĩĩasya maũndũ onthe.

8Wendo ndũnyivaa o na ĩndĩĩ; ĩndĩ kwethĩwa kwĩ mawathanĩ, makavetwa; kwethĩwa kwĩ ithyomo, ikathela; kwethĩwa kwĩ ũmanyi, ũkavetwa.

9Nũndũ nĩtũmanyaa kũvũthũ, na nĩtwathanaa kũvũthũ:

10ĩndĩ yĩla kĩũka kĩla kĩanĩu, kĩla kĩvũthũ kĩkavetwa.

11Yĩla naĩ kana, naneenaa ta kana, namanyaa ta kana, nasũanĩaa ta kana: ĩndĩ yu nĩtw’ĩkĩte mũndũ mũima, nĩnĩvetete maũndũ ma wana.

12Nũndũ ĩvinda yĩĩ twĩona ta kĩsisyonĩ kĩ menyenyi; ĩndĩ ĩvinda yĩu tũkoona ũthyũ kwa ũthyũ: yu nĩnĩsĩ kũvũthũ; ĩndĩ ĩvinda yĩu ngamanya vyũ, o ũndũ nakwa neesĩkĩwe vyũ.

13Ĩndĩ yu kwĩkalĩte mũĩkĩĩo, na wĩkwatyo, na wendo, asu atatũ; na mũnene wa asu nĩ wendo.

← Chapter 12 Jump to: Chapter 14 →