1 Corinthians 15

Kamba (Mbivilia) 1956

← Chapter 14 Jump to: Chapter 16 →

1Na yu, ana‐a‐asa, nĩmũmanyĩthya ũla ũvoo mũseo ũla namũtavisye, ũla naw’o mwoosie, na ũla nthĩnĩ waw’o mũũngeme,

2na kwondũ waw’o nĩmũũtangĩĩwa, ethĩwa mwĩlũmya ndeto ĩla namũtavisye, ateo o mweetĩkĩlile mana.

3Nũndũ mbee namũtavisye o ũla noosie nakwa: atĩ Klĩsto nĩwakwie kwondũ wa naĩ sitũ kwĩanana na maandĩko;

4na nĩwathikiwe; na kana nĩwathayũũkiw’e mũthenya wa katatũ kwĩanana na maandĩko;

5na nĩwamumĩlĩle Keva; na amaumĩlĩla ala ĩkũmi na elĩ;

6na ĩtina amaumĩlĩla ana‐a‐asa, andũ mbee wa maana atano, ĩvinda o yĩmwe, na aingĩ moo me o kw’o kũvika o na yu, ĩndĩ amwe nĩmakomete;

7na ĩtina wa ũu nĩwamumĩlĩle Yakovo; na ĩndĩ amaumĩlĩla atũmwa onthe;

8na ĩtina wa onthe anumĩlĩla nyie, ta ũmwe ũsyaĩtwe ĩvĩnda yĩte ya w’o.

9Nũndũ nyie nĩ mũnini kwĩ atũmwa onthe, ũla ũtaĩle kwĩtwa mũtũmwa, nĩkwĩthĩwa nathĩnisye ĩkanisa ya Ngai.

10Ĩndĩ kwondũ wa mũmo wa Ngai nĩilyĩ o ũndũ ndilyĩ: na mũmo wake nanengiwe ndwaĩ wa mana; ĩndĩ nathĩnĩe wĩa mbee wa asu angĩ onthe; ĩndĩ ti nyie, nĩ mumo wa Ngai ũla waĩ vamwe nakwa.

11Ĩndĩ ethĩwa nĩnyie kana nĩo, nĩw’o tũtavanasya, na nĩw’o mweetĩkĩlile.

12Na ethĩwa Klĩsto nũtavanaw’a kana nĩwathayũũkiw’e kuma kwa akw’ũ, amwe katĩ wenyu measya ata kana kũi kũthayũũkw’a kwa akw’ũ?

13Ĩndĩ ethĩwa kũi kũthayũũkw’a kwa akw’ũ, o na Klĩsto ndaathayũũkw’a:

14na ethĩwa Klĩsto ndaathayũũkw’a, kũtavan’ya kwitũ nĩ mana, na mũĩkĩĩo wenyu naw’o nĩ mana.

15Ĩĩ, o naitũ twonekete kwĩthĩwa ngũsĩ sya ũvũngũ sya Ngai; nĩkwĩthĩwa twaĩ ngũsĩ sya Ngai atĩ nĩwamũthayũũkisye Klĩsto: nake ndaamũthayũũkya, ethĩwa nĩ w’o kana akw’ũ maithayũũkaw’a.

16Nũndũ ethĩwa akw’ũ maithayũũkaw’a, o na Klĩsto ndaathayũũkw’a:

17na ethĩwa Klĩsto ndaathayũũkw’a, mũĩkĩĩo wenyu nĩ mana; na kũvika na yu mwĩ o naĩnĩ syenyu.

18Na ĩndĩ asu nao ala makomete nthĩnĩ wa Klĩsto nĩ au.

19Ethĩwa ithyĩ tũtw’ĩkĩte twĩkwatĩtye Klĩsto ũndũ wa thayũ ũũ w’oka, twĩ ma kwĩw’ĩwa tei mbee wa andũ angĩ onthe.

20Ĩndĩ yuyu Klĩsto nĩwathayũũkiw’e kuma kwa akw’ũ, ũsyao wa mbee wa ala makomete.

21Nũndũ nĩkwĩthĩwa kĩkw’ũ nĩkyookie kwondũ wa mũndũ, kũthayũũka kwa akw’ũ nakw’o nĩkwookie kwondũ wa mũndũ.

22Nũndũ o ũndũ onthe makusaa nthĩnĩ wa Atamu, o ta ũu nthĩnĩ wa Klĩsto onthe makeethĩwa thayũ.

23Ĩndĩ nĩ kĩla mũndũ vandũ vake mwene: Klĩsto ũsyao wa mbee; na ĩtina nĩ ala ma Klĩsto, yĩla wĩũka.

24Na ĩndĩ mũminũkĩlyo ũkyũka, yĩla Klĩsto ũkamũnenga Ngai, nake nĩwe Asa, ũla ũsumbĩ; yĩla ũkethĩwa avetete kĩla ũnene na kĩla ũkũmũ na vinya.

25Nũndũ mũvaka asumbĩke e we, kũvika yĩla ũkamaia amaitha make onthe ungu wa nyaĩĩ syake.

26Mũmaitha wa mũminũkĩlyo ũla ũkanangwa nĩ kĩkw’ũ.

27Nũndũ, aiie syĩndũ syonthe syĩthĩwe wĩnyivyonĩ ungu wa nyaĩĩ syake. Ĩndĩ yĩla ũnũkwasya, Syĩndũ syonthe siĩtwe wĩnyivyonĩ, nĩkwenekee kana nde vo we ũla waiie syĩndũ syonthe wĩnyivyonĩ kwake.

28Na syĩndũ syonthe syaiwa wĩnyivyonĩ kwake, nĩvo ĩndĩ Mwana nake ũkaiwa wĩnyivyonĩ kwa ũla wiĩte syĩndũ syonthe ũnyivyonĩ kwake, nĩ kana Ngai ethĩwe syonthe nthĩnĩ wa syonthe.

29Kana makeeka ata ala mavatisawa kwondũ wa akw’ũ? Ethĩwa akw’ũ maithayũũkw’a nongi, mavatisawa kwondũ wa akw’ũ nũndũ wa kĩ?

30Na ithyĩ twĩ mũisyonĩ kĩla saa nũndũ wa kĩ?

31Ĩĩ, kwondũ wa kwĩkathĩĩa kũla nĩ nakw’o kwondũ wenyu nthĩnĩ wa Klĩsto Yesũ, Mwĩaĩi waitũ, ana‐a‐asa, nĩngusaa kĩla mũthenya.

32Ethĩwa nokitie na nyamũ sya kĩthekanĩ na ku Eveso, o tondũ andũ mekaa, ngaunwa nĩ kyaũ? Ethĩwa akw’ũ matithayũũkw’a, tũye na tũinyw’a, nĩkwĩthĩwa ũnĩ tũkakw’a.

33Mũikakengeke: Itindo nthũkũ nĩsyanangaa mwĩkalĩle mũseo.

34Amũkai mwĩke nesa, na mũikeke naĩ; nũndũ amwe matiũmũmanya Ngai: nĩneena ũu nĩmũsonokye.

35Ĩndĩ kũkeethĩwa ũmwe wĩasya, Akw’ũ mathayũũkaw’a ata? Nao mokaa na mwĩĩ ũilyĩ ata?

36Wĩ mũtumanu, we; kĩla ũvuĩaa kĩinengawe thayũ kĩtanakw’a:

37na kĩla ũvuĩaa, ndũvuĩaa mwĩĩ ũla ũkethĩwa vo, ĩndĩ no mbeke nthei, o na yethĩwa nĩ ya nganũ, kana ya mũthemba ũngĩ;

38ĩndĩ Ngai amĩnengae mwĩĩ o tondũ wendaa, na kĩla mbeke mwĩĩ wayo,

39Nyama syonthe ti nyama ĩmwe: ĩndĩ ve nyama ĩmwe ya andũ, na ve nyama ĩngĩ ya nyamũ, na nyama ĩngĩ ya nyũnyi, na ĩngĩ ya makũyũ.

40Na ĩngĩ kwĩ mĩĩ ya ĩtunĩ, na mĩĩ ya nthĩ: ĩndĩ ũtheu mũtisu wa ĩla ya ĩtũnĩ nĩ ũmwe, na ũtheu mũtisu wa ĩla ya nthĩ nĩ ũngĩ.

41Kwĩ ũtheu mũtisu ũmwe wa syũa, na ũngĩ wa mwei, na ũngĩ wa ndata; nũndũ kwĩ kĩvathũkan’yo kya ũtheu mũtisu ndatanĩ ĩmwe na ĩla ĩngĩ.

42Kũthayũũkw’a kwa akw’ũ no ta ũu. Mwĩĩ nũvandawa ũla woaa; nũthayũũkaw’a na mwĩkalĩle ũte wa kwoa:

43nũvandawa ũte na ndaĩa; nũthayũũkaw’a wĩ na ndaĩa: nũvandawa wĩ mwonzu; nũthayũũkaw’a wĩ na vinya:

44nũvandawa mwĩĩ wa kĩ‐mũndũ; nũthayũũkaw’a mwĩĩ wa veva. Ethĩwa kwĩ mwĩĩ wa kĩ‐mũndũ, kwĩ mwĩĩ wa veva naw’o.

45O ta ũu naw’o nĩkũandĩkĩtwe, Mũndũ wa mbee, Atamu, atw’ĩka mũndũ wĩ thayũ, Atamũ wa mũminũkĩlyo atw’ĩka veva ũnenganae thayũ.

46Ĩndĩ ũla wa mbee tiw’o wa veva, ĩndĩ nĩ ũla wa kĩ‐mũndũ; na ĩtina ũla wa veva.

47Nũndũ mũndũ wa mbee aumie mũthanganĩ, na nĩ wa nthĩ: mũndũ wa kelĩ aumie ĩtunĩ.

48O tondũ ũilyĩ ũsu wa nthĩ, asu ma nthĩ nao mailyĩ o ũu: na o tondũ ũilyĩ ũsu wa ĩtunĩ, asu ma ĩtũnĩ nao mailyĩ o ũu.

49Na tondũ twaĩ na mũvw’ano wa ũsu wa nthĩ, o ta ũu tũkeethĩwa na mũvw’ano wa ũsu wa itunĩ.

50Na ĩndĩ ũla ngwasya nĩ ũũ, ana‐a‐asa, kana nyama na nthakame ititonya kũtiĩwa ũsumbĩ wa Ngai; o na kĩla kyanangĩkaa kĩtitonya kũtiĩwa kĩla kĩtanangĩkaa.

51Sisyai, nĩngũmũtavya nzama: Tũikakoma ithyĩ ithyonthe, ĩndĩ ithyonthe tũkaalyũkw’a,

52kavinda kanini, kũven’ya na kũsalukya, ũivuvwa soo wa mũminũkĩlyo: nũndũ soo ũkauuma, na akw’ũ makathayũũkw’a na wũmbe ũtanangĩkaa, naitũ tũkaalyũkw’a.

53Nũndũ mũvaka wũmbe ũũ wanangĩkaa ũvw’ĩkwe ũla ũtanangĩkaa, na ũũ ũkusaa ũvw’ikwe ũla ũtakusaa.

54Ĩndĩ yĩla ũũ wanangĩkaa ũkavw’ĩkwa ũla ũtanangĩkaa, na ũũ ũkusaa ũkavw’ĩkwa ũla ũtakusaa, nĩvo ĩkakĩtĩka ĩla ndeto ĩandĩkĩtwe, Kĩkw’ũ nĩkĩmeletw’e nĩ kũkĩlw’a vinya.

55Kũĩva, kĩkw’ũ, kũkĩlya vinya kwakũ? Ũĩva, kĩkw’ũ, ũmoa waku?

56Ũmoa wa kĩkw’ũ nĩ naĩ; na vinya wa naĩ nĩ mwĩao:

57ĩndĩ mũvea nĩwĩthĩwe kwa Ngai, ũla ũtũnengae kũkĩlya kwondũ wa Mwĩaĩi waitũ Yesũ Klĩsto.

58Kwondũ wa ũu, ana‐a‐asa endwa, ĩlũlũmĩlyei, mũteũthingithĩka, mũkĩthangaaa mũno mavinda onthe wĩanĩ wa Mwĩaĩi, nĩkwĩthĩwa nĩmwĩsĩ kana kũthĩnĩa wĩa kwenyu ti kwa mana nthĩnĩ wa Mwĩaĩi.

← Chapter 14 Jump to: Chapter 16 →