1 Corinthians 2

Kamba (Mbivilia) 1956

← Chapter 1 Jump to: Chapter 3 →

1Nakwa nyie, nooka kwenyu, ana‐a‐asa, ndyaaũka kũmũtavya nzama ya Ngai na ũseo mũnene wa ũneeni, kana ũĩ.

2Nũndũ neetw’ĩĩe ndikamanye ũndũ o na wĩva katĩ wenyu, ate o Yesũ Klĩsto, nake nĩ ũla wambiwe.

3Nakwa naĩ nenyu nĩ na wonzu, na w’ĩa, na kũtetema kwingĩ.

4Na kũneena kwakwa na kũtavan’ya kwakwa kũtyaĩ na ndeto sya ũĩ wa kũthing’ĩĩsya, ĩndĩ kwaĩ nthĩnĩ wa kwonan’ya kwa Veva na kwa vinya:

5nĩ kana mũĩkĩĩo wenyu ndũkethĩwe ũĩnĩ wa mũndũ, ĩndĩ wĩthĩwe vinyanĩ wa Ngai.

6Ĩndĩ, o na ũu, tũneenaa ũĩ kwa ala meanĩe: ĩndĩ ti ũĩ wa nthĩ ĩno, kana wa anene ma nthĩ ĩno, ala makatuwa ma mana:

7ĩndĩ tũneenaa ũĩ wa Ngai na nzama, naw’o nĩ ũla wavithĩtwe, ũla Ngai watwie tene mbee wa mavinda aa ũndũ wa ũtaĩo witũ:

8naw’o ũĩ ũsu vatyaĩ ũmwe wa anene ma nthĩ ĩno wawĩsĩ: nũndũ kethĩwa nĩmoomanyie, matyaĩ mamwamba Mwĩaĩi ũla ũtaĩawa:

9ĩndĩ o tondũ kũandĩkĩtwe, Maũndũ ala itho yĩtaamona, na kũtũ kũtaamew’a, Na ala mataalika ngoonĩ ya mũndũ, Maũndũ o na meva ala Ngai wamaseũvĩsye ala mamwendaa.

10Ĩndĩ Ngai nĩwatũvuanĩsye ithyĩ kwa nzĩa ya Veva: nũndũ Veva amanthaa maũndũ onthe, ĩĩ, o na maũndũ maliku ma Ngai.

11Nũndũ nũũ wa andũ ũmanyaa maũndũ ma mũndũ, ate o veva wa mũndũ ũla wĩ nthĩnĩ wake? No ta ũu maũndũ ma Ngai vai ũmamanya, ate o Veva wa Ngai.

12Ĩndĩ ithyĩ tũiaaosa veva wa maũndũ ma nthĩ, ĩndĩ nĩtwosete Veva ũla wumaa kwa Ngai; nĩ kana tũmanye maũndũ ala tũnengetwe mana nĩ Ngai.

13Maũndũ asu namo nĩtũũmaneena, na ti na ndeto imanyĩaw’a nĩ ũĩ wa andũ, ĩndĩ nĩ ila Veva ũmanyĩasya; tũkĩthiman’ya maũndũ ma veva na ala ma veva.

14Mũndũ wa mwĩkalĩle wa ki‐mũndũ ndosaa maũndũ ma Veva wa Ngai: nũndũ nĩ ũtumanu kwake: nake ndatonya kũmamanya nũndũ nĩmekuũawa nĩ veva.

15Ĩndĩ we ũla wa mwĩkalĩle wa veva ekuũaa maũndũ onthe, ĩndĩ we mwene ndekuũawa nĩ mũndũ o na wĩva.

16Nũndũ nũũ ũla ũmanyĩte kĩlilikano kya Mwĩaĩi, nĩ kana amũmanyĩsye? Ĩndĩ ithyĩ twĩ na kĩlĩlĩkano kya Klĩsto.

← Chapter 1 Jump to: Chapter 3 →