1 Corinthians 3

Kamba (Mbivilia) 1956

← Chapter 2 Jump to: Chapter 4 →

1Nakwa, ana‐a‐asa, ndyaatonya ũneena nenyu ta mwĩ ma mwĩkalĩle wa veva, ĩndĩ ta mwĩ ma mwĩkalĩle wa mwĩĩ, ta mwĩ tũũkenge nthĩnĩ wa Klĩsto.

2Nĩmũnengete ĩia ndimũnengete lĩu; nũndũ mũtyaĩ mũũtonya: aiee, o na yu mũinamba kũũtonya;

3nũndũ mwĩ ma mwĩkalĩle wa mwĩĩ o na yu: nũndũ mwĩ na kĩwĩu na ĩteta katĩ wenyu, mũi ma mwĩkalĩle wa mwĩĩ, na mũiendaa o ũndũ andũ maendaa?

4Nũndũ yĩla ũmwe ũnũkwasya, Nyie nĩ wa Vaulo; na ũngĩ easya, Nyie nĩ wa Avolo; inyw’ĩ mũi o andũ?

5Ĩndĩ Avolo nũũ? Na Vaulo nũũ? Nĩ athũkũmi, ala kwondũ wamo mwĩtĩkĩlĩte; na kĩla mũndũ o tondũ Mwĩaĩi wamũnengie.

6Nyie nĩnavandie, na Avolo nĩwanyithisye; ĩndĩ nĩ Ngai wĩanĩtye.

7Na kwondũ wa ũu, ũla ũvandaa ti kĩndũ, o na ũla ũnyithasya; ĩndĩ nĩ Ngai ũla wĩanasya.

8Na ĩndĩ ũla ũvandaa na ũla ũnyithasya nĩ ũndũ ũmwe: ĩndĩ kĩla mũndũ akoosa ĩtuvi yake mwene kwĩanana na kũthĩnĩa wĩa kwake.

9Nũndũ twĩ atethya ma wĩa vamwe na Ngai: inyw’ĩ mwĩ mũũnda wa Ngai, na wako wa Ngai.

10Kwĩanana na mumo wa Ngai nanengiwe, ta mũnene wa aki, mũĩ, nĩnambĩlĩlye wabĩlĩlyo; na ũngĩ eaka ĩũlũ waw’o. Ĩndĩ kĩla mũndũ nĩesisye ũndũ ũnũkwaka ĩũlũ waw’o.

11Nũndũ vai mũndũ ũtonya kwambĩlĩlya wambĩlĩlyo ũngĩ ate o ũla wambĩlĩlw’e, naw’o nĩ Yesũ Klĩsto.

12Ĩndĩethĩwa mũndũ o na wĩva eaka ĩũlũ wa wambĩlĩlĩlyo ũsu thaavu, kana vetha, kana mavia me thooa mũnene, kana mĩtĩ, kana nyeki, kana ũa;

13wĩa wa kĩla mũndũ nũkonanw’a: nũndũ mũthenya ũsu nũkawonan’ya, nĩkwĩthĩwa nũkavuanw’a nĩ mwaki; na ũla mwaki e w’o nũkatata wĩa wa kĩla mũndũ ũndũ ũilyi.

14Ethĩwa wĩa wa mũndũ o na wĩva ũla wakie ĩũlũ wa wambĩlĩlyo ũsu ũkekala, ũsu akoosa ĩtuvi.

15Ethĩwa wĩa wa mũndũ o na wĩva ũkavya, akoona wasyo; ĩndĩ we mwene akatangĩĩwa; ĩndĩ no ta kũvĩtĩla mwakinĩ.

16Mũtyĩsĩ kana mwĩ ĩkalũ ya Ngai, na kana Veva wa Ngai ekalaa nthĩnĩ wenyu?

17Ethĩwa mũndũ eananga ĩkalũ ya Ngai, we akaanangwa nĩ Ngai; nũndũ ĩkalũ ya Ngai nĩ ĩtheu, na ĩkalũ yĩu nĩ inyw’ĩ.

18Mũndũ ndakekenge mwene. Ethĩwa mũndũ o na wĩva eĩtalĩlya nĩ mũĩ katĩ wenyu ĩvindanĩ yĩĩ, natw’ĩke mũtumanu, nĩ kana atonye ũtw’ĩka mũĩ.

19Nũndũ ũĩ wa nthĩ ĩno nĩ ũtumanu kwa Ngai. Nũndũ nĩkũandĩkĩtwe, Ũla ũmakwataa ala oĩ ũselekenĩ woo:

20na ĩngĩ, Mwĩaĩi nĩwĩsĩ mosũanĩo ma ala oĩ, kana nĩ ma mana.

21Kwondũ wa ũu, mũndũ ndakekathĩĩe ũndũ wa andũ. Nũndũ syĩndũ syonthe nĩ syenyu;

22ethĩwa nĩ Vaulo, kana Avolo, kana Keva, kana nthĩ, kana thayũ, kana kĩkw’ũ, kana syĩndũ ila syĩ kw’o, kana ila ĩkethĩwa kw’o; syonthe nĩ syenyu;

23na inyw’i mwĩ ma Klĩsto; na Klĩsto nĩ wa Ngai.

← Chapter 2 Jump to: Chapter 4 →