1 Corinthians 5

Kamba (Mbivilia) 1956

← Chapter 4 Jump to: Chapter 6 →

1Nĩ w’o, ũvoo nĩ mũnyaĩĩku kana kwĩ ũlaalai katĩ wenyu, na nĩ ũlaalai ũla ũte kwa Andũ‐ma‐mbaĩ‐ingĩ, kana ũmwe wenyu e na mũka wa ĩthe.

2Nenyu nĩmwĩkathĩĩe: o na mũinew’a woo, nĩ kana ũsu wĩkĩte ũndũ ũsu, avetwe katĩ wenyu.

3Nũndũ nĩ w’o, o na ethĩwa ndi vo na mwĩĩ, ĩndĩ vevanĩ nĩ vo, nyie nĩnĩminĩte kũmũsilĩla ũsu wĩkĩte ũndũ ũsu, ta nĩnaĩ kw’o mwene,

4syĩtwanĩ ya Mwĩaĩi waitũ Yesũ, inyw’ĩ mweethĩwa mũmbanĩte vamwe, o na vamwe na veva wakwa, na vinya wa Mwĩaĩi waitũ Yesũ,

5kũmumya mũndũ ũilyĩ ũu na kũmũnengane kwa Satani mwĩĩ wanangwe, nĩ kana veva ũtangĩĩwe mũthenya wa Mwĩaĩi Yesũ.

6Kwĩkathĩĩa kwenyu ti kũseo. Mũtyĩsĩ kana ĩlawa ĩnini nĩyĩkaatasya kĩmũtũ kyonthe?

7Ĩthesyei vyũ mũkyumya yĩla ĩlawa ya tene, mwĩthĩwe mũndo mweũ ki, o ta mũtekĩwe ĩlawa. Nũndũ vasaka witũ nũthembetwe, naw’o nĩ Klĩsto:

8kwondũ wa ũu, tũvokae mboka, ti na ĩlawa ĩkũũ, o na ti na ĩlawa ya ũmaitha na ũthũku; ĩndĩ na kĩmũtũ kĩte ĩlawa, kĩtheu na kya w’o.

9Namũandĩkĩe valũanĩ wakwa kana mũĩkavulane na ilaalai;

10ndikwasya o na vanini kana nĩ ilaalai sya nthĩ ĩno, kana ala me na ĩtomo, na avutani, kana athaithi ma mĩvw’anano; nũndũ ethĩwa nũu, mũvaka mume kũũ nthĩ:

11ĩndĩ nĩmũandĩkĩe mũikavulane na mũndũ ũnũkwĩtwa mwana‐a‐asa ethĩwa nĩ kĩlaalai, kana wĩ ĩtomo, kana mũthaithĩ wa mĩvw’anano, kana mũumani, kana mũnywi, kana mũvutani; mũndũ ũilyĩ ũu, mũikavulane nake, aiee, o na mũikaye nake.

12Nũndũ nĩ ũndũ mwaũ kũmasilĩla ala me ũtee? Mũtiũmasilĩla asu me nthĩnĩ?

13Ĩndĩ asu me ũtee Ngai nũmasilĩlaa. Mũvetei ĩndĩ ũsu mwathe, aume katĩ wenyu.

← Chapter 4 Jump to: Chapter 6 →