bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
1 Corinthians 7
1 Corinthians 7
Kamba (Mbivilia) 1956
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
1
Ĩndĩ yu nĩtũsisye maũndũ ala mũnanandĩkĩe: Nĩ ũseo mũndũ ndakakiite mũndũ mũka.
2
Ĩndĩ, nũndũ wa molaalai, kĩla mũndũ nĩethĩwe na kĩveti kyake mwene, na kĩla mũndũ mũka nake nĩethĩwe na mũũme wake mwene.
3
Mũndũ mũũme namũnenge mũka wake ũla ũmwaĩle: na ta ũu, mũndũ mũka nake namũnenge mũũme wake ũla ũmwaĩle.
4
Mũndũ mũka nde na ũkũmũ ĩũlũ wa mwĩĩ wake mwene, ĩndĩ nĩ mũũme: na no ta ũu mũũme nake nde na ũkũmũ ĩũlũ wa mwĩĩ wake mwene, ĩndĩ nĩ mũka.
5
Mũikavatane ene kwa ene, ate o yĩla mwĩw’anĩte kwĩka ũu ĩvinda, nĩ kana mũtonye kwĩnengane ene kũvoya, na ĩtina kwĩthĩwa vamwe ĩngĩ, Satani ndakamũtate kwondũ wa kũlea kwĩyũmĩĩsya.
6
Ĩndĩ nĩneena ũndũ ngwona, na tĩ ũndũ wa kwĩaa.
7
Ĩndĩ nĩenda andũ onthe mekale takwa ũndũ ndilyĩ. Ĩndĩ kĩla mũndũ e na mũthĩnzĩo wake mwene wanengiwe nĩ Ngai, ũmwe ũndũ wake, na ũngĩ ũndũ wake.
8
Ĩndĩ nĩmea ala matatwaanĩte, na aka ndiwa, atĩĩ, Nĩ ũseo mekale takwa o ũndũ ndilyĩ.
9
Ĩndĩ ethĩwa maitonya kwĩyũmĩĩsya, nĩmatwaane: nũndũ nĩ ũseo kũtwaana kwĩ kwakana mwaki.
10
Ĩndĩ kwa ala matwaanĩte nĩngwĩaa, o na tii nyie, ĩndĩ nĩ Mwĩaĩi, kana mũndũ mũka ndakamũlee mũũme,
11
(ĩndĩ ethĩwa nũnũũthi, nĩeyĩkalye ate mũtwae, kana ethĩwa ti ũu, ew’ane na mũũme wake;) na mũũme ndakamũlee mũka wake.
12
Ĩndĩ kwa angĩ nĩneena nyie, ti Mwĩaĩi: Ethĩwa mwana‐asa o na wĩva e na mũndũ mũka ũtetĩkĩlĩte, nake mũndũ mũka eenda kwĩkala nake, ndakamũlee.
13
Na mũndũ mũka wĩ na mũũme ũtetĩkĩlĩte, nake mũũme enda kwĩkala nake, ndakamũlee mũũme.
14
Nũndũ mũũme ũla ũtetĩkĩlĩte nũvathĩkĩte nũndũ wa mũka, na mũka ũtetĩkĩlĩte nũvathĩkĩte nũndũ wa mũũme: kethĩwa ti ũu syana syenyu syĩthĩwa syĩ mbuku; ĩndĩ yu nĩ ntheu.
15
Ĩndĩ ethĩwa ũla ũtetĩkĩlĩte nũnũũthi, nathi: mwana‐a‐asa kana mwĩĩtũ‐a‐asa ti ngombo maũndũnĩ mailyĩ ũu: ĩndĩ Ngai nũtwĩtĩte twĩkalae na mũuo.
16
Nũndũ wĩsĩ ata we, kĩveti, kana ũkatangĩĩa mũemeu? Kana wĩsĩ ata we, mũũme, kana ũkatangĩĩa mũkau?
17
Ĩndĩ tondũ Mwĩaĩi wamũaĩe kĩla mũndũ, na tondũ Ngai wamwĩtie kĩla mũndũ, naende o ũu. Nakwa nĩaa o ũu makanisanĩ onthe.
18
Mũndũ o na wĩva eetiwe e mwaĩke? Ndakatw’ĩke ũte mwaĩke. Ve mũndũ o na wĩva wetiwe ate mwaĩke? Ndakaĩkwe.
19
Nzaĩko ti kĩndũ, na kũlea kwaĩkwa ti kĩndũ; ĩndĩ kũatĩĩa mĩao ya Ngai.
20
Kĩla mũndũ nĩekale ũndũ wailyĩ aiĩtwa.
21
Wetiwe wĩ ngombo? Ndũkone ta ũndũ; ĩndĩ ethĩwa nũtonyeka kwaku kuma ũkombonĩ, kavaa wume.
22
Nũndũ ũla wetiwe nthĩnĩ wa Mwĩaĩi, e ngombo, nĩ mũthasye wa Mwĩaĩi: na no ta ũu ũla wetiwe ate ngombo, ũsu nĩ ngombo ya Klĩsto.
23
Nĩmwathooiwe na thooa; mũikatw’ĩke ngombo sya andũ.
24
O ũndũ mũndũ wailyĩ yĩla wetiwe, ana‐a‐asa, nĩekale ũndũnĩ o ũsu, vamwe na Ngai.
25
Ĩndĩ ũndũ wa eĩtu ndi na mwĩao wa Mwĩaĩi: ĩndĩ nĩmũtavya ũndũ ngwona, ta ũmwe ũla wosete tei wa Mwĩaĩi ethĩwe mũĩkĩĩwa.
26
Ĩndĩ nĩona ũndũ ũũ ta ũseo kwondũ wa thĩna ũla twi naw’o, kana nĩ ũseo mũndũ ekale o ũndũ ũilyĩ.
27
Nĩwovanĩtw’e na mũndũ mũka? Ndũkamanthe kũthaw’a. Nũthaanĩtwe na mũndũ mũka? Ndũkamanthe mũndũ mũka.
28
Ĩndĩ, o na ethĩwa ũkatwaana, ndũkwĩka naĩ; na mwĩĩtũ aitwawa, ndekwĩka naĩ. Ĩndĩ ala mailyĩ ũu maitĩa kwĩthĩwa na mathĩna mwĩĩnĩ: nakwa nĩenda kũmũvonokya.
29
Ĩndĩ nĩneena ũu, ana‐a‐asa, ĩvinda nĩ ĩkũvĩvye mũno, kana kũma yu, ala me na aka nĩmethĩwe ta mataĩ;
30
na ala maĩaa, nĩmethĩwe ta mataĩaa; na ala matanaa, nĩmethĩwe ta matatanaa; na ala mathooaa, nĩmethĩwe ta mate na kĩndũ;
31
na ala metethasya na syĩndũ sya nthĩ, nĩmethĩwe ta matasyĩkwatasya mũno: nũndũ mwĩkalĩle wa nthĩ ĩno nũũvita.
32
Ĩndĩ nĩenda kana mũikaũũye. We, ũla ũtatwaanĩte, alilikanaa mũno maũndũ ma Mwiaĩi, ũndũ wĩmwendeeasya Mwĩaĩi:
33
ĩndĩ ũla ũtwaanite alilikanaa mũno maũndũ ma nthĩ, ũndũ wĩmwendeeasya mũka.
34
Na ĩngĩ kwĩ kĩvathũkan’yo kya mũndũ mũka na mwĩĩtu. Ũla ũte mũtwae alilikanaa mũno maũndũ ma Mwĩaĩi, nĩ kana atonye kwĩthĩwa mũtheu mwĩĩnĩ na vevanĩ: ĩndĩ ũla ũtwaĩtwe alilikanaa mũno maũndũ ma nthĩ, na ũndũ wĩmwendeeasya mũũme.
35
Ĩndĩ ũu nĩneena kwondũ wa kũmũtethya; ti ũndũ wa kũmũtea, ĩndĩ nũndũ wa ũla waĩle, na ĩngĩ kana mũtonye kũmũthũkũma Mwĩaĩi mũtekũvũavũanw’a.
36
Ĩndĩ ethĩwa mũndũ o na wĩva onaa ta ũtamwĩkaa mwĩĩtu wake ũndũ waĩle, na ethiwa nĩwavĩta ũseo wa wana wake, na ethĩwa kwĩ vata wa ũu, nĩeke ũndũ ũnũkwenda; ndekwĩka naĩ; nĩmatwaane.
37
Ĩndĩ ũla ũũngeme na ũlũmu ngoonĩ yake, ateũingĩĩw’a, ĩndĩ e na vinya kwendanĩ kwake, na nĩwetw’ĩĩte ũndũ ũũ ngoonĩ yake, atũae na mwĩĩtu wake, ekaa nesa.
38
Na kwondu wa ũu, ũla ũnũũmũtwaanĩthya mwĩĩtu wake eĩka nesa; na ũla ũteũmũtwaanĩthya mwĩĩtu wake eĩka nesa mbee.
39
Mũndũ mũka nĩ mwove ĩvinda yĩla mũũme wĩ thayũ; ĩndĩ ethĩwa mũũme nũkw’ĩte, yu nũthaĩtw’e, na nũtonya kũtwawa nĩ ũla ũnũkwenda; ĩndĩ no nthĩnĩ wa Mwĩaĩi.
40
Ĩndĩ nĩ ũseo mbee kwĩkalaa o ũndũ ũilyĩ, ũndũ ngwona: na ĩngĩ nĩasya nyie nĩ na Veva wa Ngai.
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 8 →
All chapters:
1
2
3
4
5
6
7
8
9
10
11
12
13
14
15
16