1 Corinthians 6

Kamba (Mbivilia) 1956

← Chapter 5 Jump to: Chapter 7 →

1Mũndũ o na wĩva wa inyw’ĩ, e na ũndũ na ũngĩ, nũtonya ũmũvinganĩsya mbee wa ala mate alũngalu, na ti mbee wa atheu?

2Kana mũtyĩsĩ kana atheu nĩmakasilĩla nthĩ? Na ethĩwa nthĩ nĩkasilĩlwa nĩ inyw’ĩ, mũtyaĩle kũsilaa maũndũ ala manini?

3Mũtyĩsĩ kana ithyĩ nĩtũkasilĩla alaĩka? Nĩ mbee veana ata, maũndũ ma thayũ ũũ?

4Ethĩwa ĩndĩ nĩ ũndũ wenyu kũsilaa maũndũ ma thayũ ũũ, mwĩmaia asu ala mate na ũtalo ĩkanisanĩ kũsilaa?

5Nĩneena ũu ndonye kũmũsonokya. Ũu nĩ w’o, kũioneka kwenyu mũndũ ũmwe mũĩ ũla ũtonya kũtw’a sila katĩ wa ana‐a‐ĩthe,

6ĩndĩ mũndũ nũsitakanaa na mwana‐a‐ĩthe, na ĩngĩ nĩ mbee wa ala matetĩkĩlĩte?

7Aiee, o na yu nũtw’ĩkĩte wasyo kwenyu, kwĩthĩwa na makoani inyw’ĩ kwa inyw’ĩ. Nĩkĩ ti kavaa kũmĩĩsya ũthũku? Nĩkĩ ti kavaa kũvutwa?

8Ĩndĩ inyw’ĩ ene nĩmwĩkaa naĩ, na mũivũtana, na ĩngĩ nĩ kwa ana‐a‐ĩthe menyu.

9Kana mũtyĩsĩ kana ala mate na ũlũngalu matikatiĩwa ũsumbĩ wa Ngai? Mũikakengeke: eki ma naĩ na eĩtu, o na athaithi ma mĩvw’anano, o na ilaalai, o na ala metusaa ta aka, o na ala meyĩkaa naĩ na aũme,

10o na ing’ei, o na ala me na ĩtomo, o na anywi, o na aumani, o na avutani, maĩkatiĩwa ũsumbĩ wa Ngai.

11Na amwe menyu mwailyĩ ũu: ĩndĩ nĩmũthambĩtw’e, ĩndĩ nĩmũvathĩtw’e mwĩthĩwe atheu, ĩndĩ nĩmũtalĩlwe ũlũngalu syĩtwanĩ ya Mwĩaĩi Yesũ Klĩsto, na nthĩnĩ wa Veva wa Ngai waitũ.

12Maũndũ onthe kwakwa nĩmatonyeka; ĩndĩ ti onthe mailaa. Maũndũ onthe kwakwa nĩmatonyeka; ĩndĩ nyie ndikalikw’a ũkũmũnĩ wa ũmwe o na wĩva.

13Sya ũya nĩ sya ĩvu, na ĩvu nĩ ya sya ũya: ĩndĩ Ngaĩ akaitw’ĩkĩthya sya mana ĩvu na sya ũya syelĩ. Ĩndĩ mwĩĩ ti wa kwĩka ũlaalai, ĩndĩ nĩ wa Mwĩaĩi; nake Mwĩaĩi nĩ wa mwĩĩ:

14na Ngai nake nĩwamũthayũũkisye Mwĩaĩi, na ĩngĩ akatũthayũũkya ithyĩ na vinya wake.

15Mũtyĩsĩ kana mĩĩ yenyu nĩ mamutha ma Klĩsto? Nose ĩndĩ mamutha ma Klĩsto, na kũmatw’a mamutha ma ĩlwaya? Aiee, kũikethĩwe ũu.

16Kana mũtyĩsĩ atĩ ũla ũnũũkoma na ĩlwaya nĩ mwĩĩ ũmwe nayo? Nũndũ aĩtye, Asu elĩ makethĩwa mwĩĩ ũmwe.

17Ĩndĩ ũla ũnũũthalanw’a na Mwĩaĩi nĩ veva ũmwe.

18Kĩai ũlaalai. Kĩla ũthũku mũndũ wĩkaa wĩ ũtee wa mwĩĩ wake; ĩndĩ ũla wĩkaa ũlaalai eyĩkaa mwĩĩ wake mwene naĩ.

19O na mũtyĩsĩ kana mwĩĩ wenyu nĩ ĩkalũ ya Veva Mũtheu, ũla wĩ nthĩnĩ wenyu, ũla mwĩ nake kuma kwa Ngai? Na mũi menyu ene;

20nũndũ nĩmũthooetwe na thooa mũnene: mũtaĩei Ngai ĩndĩ mĩĩnĩ yenyu.

← Chapter 5 Jump to: Chapter 7 →