1 Corinthians 11

Kamba (Mbivilia) 1956

← Chapter 10 Jump to: Chapter 12 →

1Ĩthĩwai mũkĩelekan’ya nakwa, o ũndũ nyie nakwa nĩelekanasya na Klĩsto.

2Na yu nĩngũmũkatha nĩkwĩthĩwa nĩmũndilikanaa maũndũnĩ onthe, na ĩngĩ nĩmũkwataa mũno momanyĩsyo asu, o ũndũ namũnengie.

3Ĩndĩ nĩenda mũmanye, kana mũtwe wa kila mũndũ mũũme nĩ Klĩsto; na mũtwe wa mũndũ mũka nĩ mũũme; na mũtwe wa Klĩsto nĩ Ngai.

4Kĩla mũndũ mũũme aivoya kana aiathana, evw’ĩkĩte mũtwe wake, nũsonokasya mũtwe wake.

5Ĩndĩ kĩla mũndũ mũka aivoya aiathana atevw’ĩkĩte mũtwe wake nũsonokasya mũtwe wake; nũndũ nĩ ũndũ ũmwe ki na kwenzwa.

6Nũndũ ethĩwa mũndũ mũka ndeũvw’ĩka mũtwe wake, natilwe nzw’ĩĩ nasyo: ĩndĩ ethĩwa nĩ nthoni kwa mũndũ mũka kũtilwa nzw’ĩĩ kana kwenzwa, navw’ĩke mũtwe.

7Nũndũ mũndũ mũũme ndaĩlwe nĩ kũvw’ĩka mũtwe wake, nũndũ we nĩ mũvw’ano na ũtaĩo wa Ngai; ĩndĩ mũndũ mũka nĩ ũtaĩo wa mũũme.

8Nũndũ mũndũ mũũme ndaauma kwa mũndũ mũka; ĩndĩ mũndũ mũka aumie kwa mũndũ mũũme:

9o na mũndũ mũũme ndaaũmbwa kwondũ wa mũndũ mũka; ĩndĩ nĩ mũndũ mũka wombiwe kwondũ wa mũndũ mũũme:

10kwondũ wa ũu nĩkwaĩle mũndũ mũka ethĩwe na wonan’yo wa wĩnyivyo wake mũtwenĩ wake, nũndũ wa alaĩka.

11Ĩndĩ vamwe na ũu, o na mũndũ mũka ndethĩwa vate mũndũ mũũme, o na mũndũ mũũme ndethĩwa vate mũndũ mũka, nthĩnĩ wa Mwĩaĩi.

12Nũndũ o ũndũ mũndũ mũka waumie kwa mũndũ mũũme, no ta ũu mũndũ mũũme nũsyaawa nĩ mũndũ mũka; ĩndĩ maũndũ onthe maumaa kwa Ngai.

13Osyai inyw’ĩ ene: nĩkwaĩle mũndũ mũka kũmũvoya Ngai atevw’ĩkĩte mũtwe?

14O na mũtuo e w’o ndũũmũmanyĩsya, kana, ethĩwa mũndũ mũũme e na nzw’ĩĩ ndasa, nĩ nthoni kwake?

15Ĩndĩ ethĩwa mũndũ mũka e na nzw’ĩĩ ndasa, nĩ ũtaĩo kwake: nũndũ nzw’ĩĩ syake anengiwe syĩthĩwe sya kũmũvw’ĩkaa.

16Ĩndĩ ethĩwa mũndũ o na wĩva ailyĩ ta wĩ na ngananĩo, ithyĩ tũti na ũndũ ũsu, o na makanisa ma Ngai.

17Ĩndĩ ngĩmwĩaĩa mĩao ĩno, ndĩũmũkathĩĩa, nĩkwĩthĩwa nĩmũkũmbana, na ti kwondũ wa ũseo, ĩndĩ kwondũ wa ũthũku.

18Nũndũ mbee wa maũndũ angĩ, yĩla mũmbanaa ĩkanisanĩ, nĩw’aa kana motĩlĩkangano me katĩ wenyu; nakwa nĩngwĩtĩkĩla ũvoo ũsu vanini.

19Nũndũ vaitĩa kwĩthĩwa ũvathũkan’yo katĩ wenyu, nĩ kana asu metĩkĩlĩtwe matonye ũmanyĩka kwenyu.

20Ĩndĩ yĩla mũmbanaa vamwe, mũitonya ũya kya ũya kya mesa ya Mwĩaĩi:

21nũndũ mũkĩya, kĩla ũmwe ambaa kũya kya ũya kyake mwene mbee wa ũngĩ; na ũmwe e na nzaa, na ũngĩ nũnyw’ĩte.

22Nĩkĩ, mũti na nyũmba syenyu sya kũya lĩu na kũnyw’a? Kana mwĩvũthya ĩkanisa ya Ngai, na kũmasonokya asu mate kĩndũ? Nĩmwĩa ata? Nĩmũkathĩĩe kwondũ wa ũu? Aiee, ndiũmũkathĩĩa.

23Nũndũ nyie noosie kwa Mwĩaĩi kyu kĩla namũnengie inyw’ĩ, kana Mwĩaĩi Yesu, ũtũku ũla wavũnyanĩiwe oosie kĩmũtũ;

24na atũnga mũvea, atilan’ya na asya, Kĩĩ nĩkyo mwĩĩ wakwa, naw’o nĩ kwondũ wenyu: ĩkaai ũu ũndũ wa kũndilikana.

25No ta ũu oosie kĩkombe nakyo, ĩtina wa kũya, aiasya, Kĩkombe kĩĩ nĩ ũtianio mweũ nthakamenĩ yakwa: ĩkaai ũu, yĩla mũũnyw’a, ũndũ wa kũndilikana.

26Nũndũ o yĩla mũũya kĩmũtũ kĩĩ, na kũnyw’a kĩkombe kĩĩ, mwionan’ya kĩkw’ũ kya Mwĩaĩi kũvika yĩla wĩũka.

27Kwondũ wa ũu o mũndũ ũla wĩya kĩmũtũ kana kũnyw’a kĩkombe kya Mwĩaĩi ũndũ ũtaĩle, eĩyosea ũsilĩlo wa ũla mwĩĩ na ĩla nthakame ya Mwĩaĩi.

28Ĩndĩ mũndũ nĩeosye, na ĩndĩ naye kĩmũtũ, na ainyw’a kĩkombe.

29Nũndũ ũla ũĩsaa na kũnyw’a ateũvathũkan’ya ũla mwĩĩ, aĩsaa na kũnyw’a ũsilĩlo wake mwene.

30Kwondũ wa ũu aingĩ kwenyu nĩ syonze na awau, na ala makomete ti avũthũ.

31Ĩndĩ ethĩwa nĩtũkwĩsilĩla ene, tũisilĩlwa.

32Ĩndĩ tũkĩsilĩlwa, nĩtũũkanw’a nĩ Mwĩaĩi, nĩ kana tũikasilĩlwe vamwe na nthĩ.

33Kwondũ wa ũu, ana‐a‐asa makwa, mwoombana vamwe kũya, eteelanai inyw’ĩ kwa ĩnyw’ĩ.

34Ethĩwa mũndũ e na nzaa, naye nyũmbanĩ kwake; nĩ kana kũmbana kwenyu kũikethĩwe kwa kũvĩkĩa ũsilĩlo. Na maũndũ ala matiele ngaseũvya nooka.

← Chapter 10 Jump to: Chapter 12 →