1 Corinthians 4

Kamba (Mbivilia) 1956

← Chapter 3 Jump to: Chapter 5 →

1Mũndũ o na wĩva natũtale ithyĩ kwĩthĩwa twĩ athũkũmi ma Klĩsto, na asũvĩi ma nzama sya Ngai.

2Na ũndũ ũngĩ, veendwa asũvĩinĩ, mũndũ oneke e kĩthito.

3Ĩndĩ kwakwa nyie, ti kĩndũ ngĩkuũwa nĩ inyw’ĩ, kana mũthenya wa sila wa mũndũ; ĩĩ, o na ndyĩkuũaa mwene.

4Nũndũ ndyĩsĩ ũndũ ĩũlũ wakwa; ĩndĩ kwondũ wa ũu nditalawa kwĩthĩwa nĩ mũlũngalu: ĩndĩ ũla ũmbĩkuũaa nĩ Mwĩaĩi.

5Kwondũ wa ũu mũikasilĩle ũndũ ĩvinda yaw’o yĩtanavika, mũvaka yĩla Mwĩaĩi wĩũka, nake akaete kyeninĩ maũndũ mavithe ma kĩvindu, na kwonan’ya mosũanĩo ma ngoo; na ĩndĩ kĩla mũndũ akeethĩwa na ndaĩa yake yumĩte kwa Ngai.

6Maũndũ aa, ana‐a‐asa, naneena na ngelekan’yo ũndũ wakwa na Avolo kwondũ wenyu; nĩ kana ũndũ witũ mũtonye kwĩmanyĩsya mũtikavĩtũke mbee wa maũndũ ala maandĩkĩtwe; nĩ kana kũikethĩwe ũmwe wenyu kũkathĩĩa ũmwe kũte ũla ũngĩ.

7Nũndũ nũũ, ũla ũkũvathũkanĩtye we? Na ĩngĩ, wĩ na kyaũ ũtaaosa? Ethĩwa ĩndĩ we nĩwosete, wĩĩkathĩĩa kĩ, ta ũtosete?

8O na yu nĩmũvũnĩte, o na yu mũtw’ĩkĩte athwii, nĩmũsumbĩkĩte tũte vo ithyĩ: ĩĩ, nĩenda mwĩthĩwe mũsumbĩkĩte, nĩ kana naitũ tũsumbĩke vamwe nenyu.

9Nũndũ, nĩasya, Ngai nũtũtw’ĩte ithyĩ atũmwa twĩthĩwe ĩtina wa onthe, ta andũ masilĩlwe kũawa: nũndũ tũtw’ĩkĩte asyaĩĩw’a kwa nthĩ yonthe, kwa alaĩka, na kwa andũ nao.

10Ithyĩ twĩ atumanu kwondũ wa Klĩsto, ĩndĩ inyw’ĩ mwĩ oĩ nthĩni wa Klĩsto; ithyĩ twĩ onzu, ĩndĩ inyw’ĩ mwĩ na vinya: ĩnyw’ĩ mwĩ na nguma, ĩndĩ ithyĩ tũti na nguma.

11O na kũvika saa ũũ twĩ na nzaa, na waũni, na ũtw’ĩkĩwa, na kũlumangw’a, na tũi na ũtũo;

12na nĩtũũthĩnaa tũkĩtethya wĩa na moko maitũ ene: twaumangwa, nĩtũathimaa; twanyamaw’a, nĩtũmĩĩasya;

13twawetwa naĩ, nĩtwĩsũvanaa: tũtw’ĩtwe ta mavuthĩ ma nthĩ, ũvavao wa syĩndũ syonthe, kũvika o na yu.

14Ndiũandĩka maũndũ aa nĩmũsonokye, ĩndĩ nĩ kũmũtaa ta syana, endwa makwa.

15Nũndũ o na mũkethĩwa mwĩ na amanyĩsya ngili ĩkũmi nthĩnĩ wa Klĩsto, mũi na aaĩthe aingĩ: nũndũ nthĩnĩ wa Klĩsto Yesũ, ninyie namũsyaie kwa nzĩa ya ũla ũvoo mũseo.

16Ĩndĩ nĩmwĩsũva mwĩthĩwe mũkĩelekan’ya nakwa.

17Kwondũ wa ũu nĩnamũtũmie Timotheo oke kwenyu, nake nĩ mwana wakwa mwendwa wĩ kĩthito nthĩnĩ wa Mwĩaĩi, ũla wĩmũlilikan’ya ũvoo wa mĩendele yakwa ĩla ĩ nthĩnĩ wa Klĩsto, o tondũ nĩmanyĩasya kũndũ kw’onthe nthĩnĩ wa kĩla ĩkanisa.

18Yu amwe nĩmekwĩkathĩĩa, ta ndeũka kwenyu.

19Ĩndĩ ngooka kwenyu mĩtũkĩ, Mwĩaĩi enda; nakwa ngamanya ti ndeto ya asu mekathĩĩaa, ĩndĩ nĩ vinya woo.

20Nũndũ ũsumbĩ wa Ngai ndwĩ ndetonĩ, ĩndĩ wĩ vinyanĩ.

21Mwĩenda ata? Nũke kwenyu na ndata, kana na wendo na veva wa ũuu?

← Chapter 3 Jump to: Chapter 5 →