Exodus 25

Kamba (Mbivilia) 1956

← Chapter 24 Jump to: Chapter 26 →

1Na Yeova aneena na Mose, akĩmwĩa,

2Matavye ana ma Isilaeli mambũmbanĩsye nthembo: mũkose nthembo yakwa kwa kĩla mũndũ ũla wĩ na ngoo ya kwenda.

3Na nthembo ĩla mwĩosa kũla maĩ nĩ ĩno: thaavu, na vetha, na ũthuku,

4na langi wa vuluu, na ũla ũtilyĩ ta mũtune, na ũla mũtune mũno, na katane nzeo, na maw’ĩa ma mbũi,

5na mbũa sya ndũũme syĩkĩĩtwe langĩ mũtune, na mbũa sya vomboo, na mĩtĩ ya mũea,

6na mauta ma kwakan’ya taa, na mĩtĩ ĩla ĩnyungaa nesa kwondũ wa mauta ma kwĩtĩkĩsya, na ma kũtoeesya ũvani ũla ũnyungaa nesa,

7na tũvila twa nzumalati, na tũvila twa kũlũmanĩthw’a iĩndĩnĩ syatw’o, ngũanĩ yĩtawa evoti, na kakalonĩ ka kĩthũi.

8Na nĩmanzeũvĩsye vandũ vatheu, nĩkalae katĩ woo.

9Kwĩanana na onthe ala nĩkwon’ya, ngelekan’yo ya wĩkalo, na ngelekan’yo ya mĩio yonthe yaw’o, mũkavaseũvye o ta ũu.

10Na makaseũvye ĩsandũkũ ya mĩtĩ ya mũea: ũasa wayo ũkeethĩwa mĩkono ĩlĩ na nyunzu, na ũthanthau wayo mũkono na nyunzu, na ũtũlu wayo mũkono na nyunzu.

11Na ũkayĩvw’ĩke thaavu mũtheu, nthĩnĩ na ũtee ũkayĩvw’ĩke, na kũseũvya ĩũlũ wayo ũengo mũtũlu wa thaavu ũyĩlingĩle.

12Na ũkayĩtũĩĩe ngome inya sya thaavu, na ũkĩsyĩkĩa maũũnĩ ana mayo; na ngome ilĩ ikethĩwe ngalĩ ĩmwe yayo, na ngome ilĩ ngalĩ ĩla ĩngĩ yayo.

13Na ũkaseũvye mĩtĩ ya mũea, na ũkĩmĩvw’ĩka thaavu.

14Na ũkĩkĩa ĩla mĩtĩ ngomenĩ ila syĩ mavavanĩ ma yĩla ĩsandũkũ, ya ũkua ĩsandũkũ nayo.

15Ĩla mĩtĩ ĩkeethĩwa ngomenĩ sya ĩsandũkũ: ndĩkaumw’e vo.

16Na ũkekĩe nthĩnĩ wa ĩsandũkũ ũkũsĩ ũla nĩkũnenga.

17Na ũkaseũvye wĩkalo wa tei wa thaavu mũtheu: ũasa waw’o ũkeethĩwa mĩkono ĩlĩ na nyunzu, na ũtanthau waw’o mũkono na nyunzu.

18Na ũkaseũvye akeluvi elĩ ma thaavu; ũkamaseũvye na kũmatua, ngalĩ syelĩ sya ũla wĩkalo wa tei.

19Noiseũvya mũkeluvi ũmwe ngalĩ ĩmwe, na mũkeluvi ũngĩ ngalĩ ĩla ĩngĩ: ũkatuanĩsye ala akeluvi kĩlungunĩ kĩmwe na ũla wĩkalo wa tei ngalĩ syelĩ syaw’o.

20Na akeluvi makatambũũkye nthwau syoo ĩũlũ, makĩvw’ika wĩkalo wa tei na nthwau syoo, mothyũ moo masianĩtye; mothyũ ma akeluvi makelekele wĩkalo wa tei.

21Na ũkaie ũ wĩkalo wa tei ĩsandũkũnĩ ĩũlũ; na nthĩnĩ wa ĩsandũkũ ũkĩkĩa ũkũsĩ ũla nĩũnenga.

22Na nĩvo nĩkomanĩaa naku, na nganeenanasya naku nĩ wĩkalonĩ wa tei ĩũlũ, o katĩ wa akeluvi elĩ ala me ĩũlũ wa ĩsandũkũ ya ũkũsĩ, ũndũ wa maũndũ onthe ala ngakwĩaĩaa kwondũ wa ana ma Isilaeli.

23Na ũkaseũvye mesa ya mĩtĩ ya mũea: ũasa wayo ũkeethĩwa mĩkono ĩlĩ, na ũthanthau wayo mũkono, na ũtũlu wayo mũkono na nyunzu.

24Na ũkamĩvw’ĩke thaavu mũtheu, noimĩseũvĩsya ũengo mũtũlu wa thaavu ũmĩlingĩle.

25Na ũkamĩseũvĩsye ũengo ũmĩlingĩle, ũthanthau waw’o nĩ ta wa kĩtaa kya kw’oko; na ũkaseũvye ũengo mũtũlu wa thaavu ũengonĩ wayo ũmĩlingĩle.

26Na ũkamĩseũvĩsye ngome inya sya thaavu, na ũkĩkĩa ngome mĩthyanĩ ĩna ya ĩũlũ ĩla yĩ maũũnĩ ana mayo.

27Ngome ikethĩwe vakuvĩ na ũengo, syĩthĩwe kũndũ kwa kwĩkĩa mĩtĩ ya kũkua mesa.

28Na ũkaseũvye ĩla mĩtĩ ya mũea, noimĩvw’ĩka thaavu, nĩ kana mesa ĩkuwe nayo.

29Na ũkaseũvye masaani mayo, na syĩko syayo, na ikombe syayo, na mbakũli syayo, ila sya kwĩtĩkĩasya: ũkaiseũvye na thaavu mũtheu.

30Na ũkaie mesanĩ imũtũ sya kwiawa mbee wakwa matukũ onthe.

31Na ũkaseũvye kĩndũ kĩla kĩkĩawa mataa kya thaavu mũtheu: kĩla kĩndũ kĩkĩawa mataa kĩkaseũvw’e na kũtua, o ĩtina yakyo, na mũtĩ wakyo; ikombe syakyo, na mĩkauti yakyo, na malaa makyo, ikethĩwe sya kĩlungu kĩmwe nakyo:

32na vakethĩwe mbonge thanthatũ ikyuma ndee syakyo; mbonge itatũ sya kĩla kĩndũ kĩkĩawa mataa kuma ngalĩ ĩmwe yakyo, na mbonge itatũ sya kĩla kĩndũ kĩkĩawa mataa kuma ngalĩ ĩla ĩngĩ yakyo:

33ikombe itatũ iseũvĩtw’e ta malaa ma mũlosi ũvongenĩ ũmwe, mũkauti na ĩlaa; na ikombe itatũ iseũvitw’e ta malaa ma mũlosi ũvongenĩ ũla ũngĩ, mũkauti na ĩlaa: o ta ũu kwa ila mbonge thanthatũ ikyuma kĩla kĩndũnĩ kĩkĩawa mataa:

34na nthĩnĩ wa kĩla kĩndũ kĩkĩawa mataa ikombe inya iseũvĩtw’e ta malaa ma mũlosi, mĩkauti yakyo, na malaa makyo;

35na mũkauti ĩtheo wa mbonge ilĩ kĩlungunĩ kĩmwe nakyo, na mũkauti ĩtheo wa mbonge ilĩ kĩlungunĩ kĩmwe nakyo, na mũkauti ĩtheo wa mbonge ilĩ kĩlungunĩ kĩmwe nakyo, kwa ila mbonge thanthatũ ikyuma kĩla kĩndũnĩ kĩkĩawa mataa.

36Mĩkauti yakyo na mbonge syakyo ikethĩwe sya kĩlungu kĩmwe nakyo: kĩndũ kyu kĩima kya thaavu mũtheu ũla mũtue.

37Na ũkaseũvye mataa makyo, mũonza: na makakwatasye mataa makyo, maumasye kyeni vu kĩĩ.

38Na mĩkasi yakyo, na masaani ma makaa makyo, ikethĩwe sya thaavu mũtheu.

39Kĩkaseũvw’e kya talendi ya thaavu mũtheu, vamwe na mĩio ĩsu yonthe.

40Na sisya kana ũkaitue kwĩanana na ngelekan’yo yayo, ĩla woonew’e kĩĩmanĩ.

← Chapter 24 Jump to: Chapter 26 →