Exodus 26

Kamba (Mbivilia) 1956

← Chapter 25 Jump to: Chapter 27 →

1Na ĩngĩ, ũkaseũvye ũla wĩkalo wĩthĩwe na masuka ĩkũmi; ũkamatume ma ndii sya katane nzeo mbokothe, na sya vuluu, na ila itilyĩ ta ndune, na ila ndune mũno, ũkamatumĩĩe ngelekan’yo ya akeluvi, o wĩa wa mũtethya wa wĩa ũla mũĩ.

2Ũasa wa kĩla suka ũkeethĩwa mĩkono mĩongo ĩlĩ na nyanya, na ũthanthau wa kĩla suka mĩkono ĩna: masuka onthe makathimwe ũndũ ũmwe.

3Masuka atano nĩmakakwatanwe, ũmwe na ũla ũngĩ; na masuka atano ala angĩ nĩmakakwatanwe, ũmwe na ũla ũngĩ.

4Na ũkaseũvye ikwatũ sya vuluu ũteenĩ wa suka ũmwe ũtiivonĩ vala makwatanĩlwe; na ũkeke o ta ũu ũteenĩ wa suka ũla wĩ mũminũkĩlyo wa vala vakwatanĩlwe va kelĩ.

5Ikwatũ mĩongo ĩtano ũkaseũvye sukanĩ ũla ũmwe, na ikwatũ mĩongo ĩtano ũkaseũvye ũteenĩ wa suka ũla wĩ vala vakwatanĩlwe va kelĩ; kĩla kĩkwatũ kĩmwe kyelekele kĩla kĩngĩ.

6Na ũkaseũvye tũvoloi mĩongo ĩtano twa thaavu, noikwatan’ya masuka ũmwe na ũla ũngĩ na tũvoloi tũu: na wĩkalo ũkatw’ĩka ũmwe.

7Na ũkatume masuka ma maw’ĩa ma mbũi matw’ĩke ĩeema ĩũlũ wa wĩkalo ũsu: ũkamatume masuka ĩkũmi na ũmwe.

8Ũasa wa kĩla suka ũkeethĩwa mĩkono mĩongo ĩtatũ, na ũthanthau wa kĩla suka mĩkono ĩna: masuka asu ĩkũmi na ũmwe makathimwe ũndũ ũmwe.

9Na ũkakwatan’ye masuka atano me oka, na masuka thanthatũ me oka, na kũtũlanĩla ũla suka wa thanthatũ ngalĩ ya mbee ya ĩeema.

10Na ũkaseũvye ikwatũ mĩongo ĩtano ũteenĩ wa suka ũmwe ũla wĩ mũminũkĩlyo wa vala vakwatanĩlwe, na ĩkwatũ mĩongo ĩtano ũteenĩ wa suka ũla wĩ mũminũkĩlyo wa vala vakwatanĩlwe va kelĩ.

11Na ũkaseũvye tũvoloi mĩongo ĩtano twa ũthuku, noikolan’ya tũvoloi na ikwatũ, na kũkwatan’ya ĩeema vamwe, nĩ kana yĩthĩwe yĩ yĩmwe.

12Na kĩlungu kĩla kĩtialĩte kĩniinĩte kya masũka ma ĩeema, o ĩla nyunzu ya suka ĩla ĩtialĩte, kĩkaniine wĩkalonĩ mbĩlĩlo.

13Na mũkono ngalĩ ĩmwe, na mũkono ngalĩ ĩla ĩngĩ, wa ũasa ũla ũtialĩte wa masuka ma ĩeema, ũkaniine ngalĩ syelĩ sya wĩkalo, ngalĩ ĩno na ngalĩ ĩla ĩngĩ, nĩ kana wũvw’ĩke.

14Na ũkaseũvye kĩndũ kya kũvw’ĩka ĩeema kya mbũa sya ndũũme syĩkĩĩtwe langi mũtune, na ĩũlũ wakyo kĩngĩ kya mbũa sya vomboo.

15Na ũkaseũvye mbwaũ sya wĩkalo sya mĩtĩ ya mũea, iũngamĩtw’e.

16Ũasa wa kĩla ũvwaũ ũkeethĩwa mĩkono ĩkũmi, na ũthanthau wa kĩla ũvwaũ mũkono na nyunzu.

17Kĩla ũvwaũ wĩthĩwe na isinĩko ilĩ isinĩkanĩtw’e ũmwe na ũla ũngĩ: ũkeke ũu ũndũ wa mbwaũ syonthe sya ũla wĩkalo.

18Na ũkaseũvye mbwaũ sya wĩkalo, mbwaũ mĩongo ĩlĩ ũndũ wa ngalĩ ya ĩtheo kwelekela ĩtheo.

19Na ũkaseũvye iĩndĩ mĩongo ĩna sya vetha ungu wa ila mbawũ mĩongo ĩlĩ; iĩndĩ ilĩ ungu wa ũvwaũ ũmwe ũndũ wa isinĩko ilĩ syaw’o, na iĩndĩ ilĩ ungu wa ũvwaũ ũngĩ ũndũ wa isinĩko ilĩ syaw’o:

20na ũndũ wa ngalĩ ya kelĩ ya wĩkalo, ngalĩ ya ĩũlũ, mbwaũ mĩongo ĩlĩ,

21na iĩndĩ syasyo mĩongo ĩna sya vetha; iĩndĩ ilĩ ungu wa ũvwaũ ũmwe, na iĩndĩ ilĩ ungu wa ũvwaũ ũngĩ.

22Na ũkaseũvye mbwaũ thanthatũ ũndũ wa ngalĩ ya mbĩlĩlo ya wĩkalo kwelekela ũthũĩlonĩ wa syũa.

23Na ũkaseũvye mbwaũ ilĩ ũndũ wa ikoto sya ũ wĩkalo ngalĩ ya mbĩlĩlo.

24Na ikethĩwe ilĩ ilĩ ikwatene kuma nthĩ, na ikethĩwe ikwatene o ta ũu kũvika mũthya wĩ ĩũlũ wasyo, kũvika ngomenĩ ĩmwe: kũkethĩwe ũu ũndũ wasyo syelĩ; ikeethĩwa sya ila ikoto ilĩ.

25Na kũkethĩwe mbwaũ nyanya, na iĩndĩ syasyo sya vetha, iĩndĩ ĩkũmi na thanthatũ: iĩndĩ ilĩ ungu wa ũvwaũ ũmwe, na iĩndĩ ilĩ ungu wa ũvwaũ ũngĩ.

26Na ũkaseũvye mĩamba ya mĩtĩ ya mũea; ĩtano ũndũ wa mbwaũ sya ngalĩ ĩmwe ya wĩkalo,

27na mĩamba ĩtano ũndũ wa mbwaũ sya ngalĩ ĩla ĩngĩ ya wĩkalo, na mĩamba ĩtano ũndũ wa mbwaũ sya wĩkalo ngalĩ ya mbĩlĩlo kwelekela ũthũĩlonĩ wa syũa.

28Na mũamba ũla wĩ katĩ, o ũla wĩvĩtĩlaa mbwaũnĩ katĩ, ũkavĩtĩlaa kuma mũthya kũvika mũthya ũla ũngĩ.

29Na ũkavw’ĩke mbwaũ thaavu, na kũseũvya ngome syasyo sya thaavu sya kũtonyeesya ĩla mĩamba: na ũkavw’ĩke mĩamba thaavu.

30Na ũkaũngamye wĩkalo kwĩanana na ngelekan’yo yaw’o ĩla woonew’e kĩĩmanĩ.

31Na ũkaseũvye tũtũ wa ndii sya vuluu, na ila itilyĩ ta ndune, na ila ndune mũno, na katane nzeo mbokothe: ũkatumĩĩwa ngelekan’yo ya akeluvi, wĩa wa mũtethya wa wĩa ũla mũĩ:

32na ũkawanĩke itũĩnĩ inya sya mĩtĩ ya mũea ivw’ĩkĩtwe thaavu; syambo syasyo ikethĩwe sya thaavu, ĩũlũ wa iĩndĩ inya sya vetha.

33Na ũkanĩke ũla tũtũ ĩtheo wa tũvoloi, noiete vu nthĩnĩ wa tũtũ yĩla ĩsandũkũ ya ũkũsĩ: na ũla tũtũ ũkamũvathũkanĩsya vala vandũ vatheu na vala vandũ vatheu mbee.

34Na ũkaie ũla wĩkalo wa tei ĩũlũ wa ĩsandũkũ ya ũkũsĩ nthĩnĩ wa vala vandũ vatheu mbee.

35Na ũkaie ĩla mesa ũtee wa tũtũ, na kĩla kĩndũ kĩkĩawa mataa kyelekele mesa ngalĩ ya wĩkalo kwelekela ngalĩ ya ĩtheo: na ũkaie mesa ngalĩ ya ĩũlũ.

36Na ũkaseũvye tama wa mũomonĩ wa yĩla Ĩeema, wa ndii sya vuluu, na ila itilyĩ ta ndune, na ila ndune mũno, na katane nzeo mbokothe, wĩa wa mũtumi mũĩ wa ndii.

37Na ũkaseũvĩsye tama ituĩ itano sya mĩtĩ ya mũea, na kwivw’ĩka thaavu: syambo syasyo ikethĩwe sya thaavu: na ũkaiseũvĩsye iĩndĩ itano sya ũthuku.

← Chapter 25 Jump to: Chapter 27 →