Exodus 35

Kamba (Mbivilia) 1956

← Chapter 34 Jump to: Chapter 36 →

1Na Mose oomban’ya ũmbano w’onthe wa ana ma Isilaeli, na awĩa, Ii nĩsyo ndeto ila Yeova wĩaĩte, nĩ kana mũsyĩkae.

2Mĩthenya thanthatũ wĩa ũkatethaw’e; ĩndĩ mũthenya wa mũonza kũkeethĩwa kwenyu mũthenya mũtheu, o savato wa ũthũmũo mũuu kwa Yeova: o ũla wĩtethya wĩa o na wĩva nthĩnĩ waw’o mũvaka oawe.

3Mũikakan’ye mwaki motũinĩ menyu onthe mũthenya wa savato.

4Na Mose aneena na ũmbano w’onthe wa ana ma Isilaeli, akĩwĩa, Ũũ nĩw’o ũla Yeova wĩaĩte, akyasya,

5Mumĩsyei Yeova nthembo kuma kwenyu; o ũla wĩ na ngoo ya kwenda, namĩete, nthembo ya Yeova: thaavu, na vetha, na ũthuku,

6na langi wa vuluu, na ũla ũtilyĩ ta mũtune, na ũla mũtune mũno, na katane nzeo, na maw’ĩa ma mbũi,

7na mbũa sya ndũũme syĩkĩĩtwe langi mũtune, na mbũa sya vomboo, na mĩtĩ ya mũea,

8na mauta ma kwakan’ya taa, na mĩtĩ ĩla ĩnyungaa nesa kwondũ wa mauta ma kwĩtĩkĩsya, na kwondũ wa ũvani ũla ũnyungaa nesa,

9na tũvila twa nzumalati, na tũvila twa kũlũmanĩthw’a iĩndĩnĩ syatw’o, evotinĩ na kakalonĩ ka kĩthũi.

10Na kĩla mũndũ wĩ na ngoo yĩ na ũĩ katĩ wenyu nĩoke, na kũseũvya syonthe ila Yeova wĩaĩte:

11ũla wĩkalo, na ĩeema yaw’o, na kĩla kyaw’o kya kũvw’ĩka, na tũvoloi twaw’o, na mbwaũ syaw’o, na mĩamba yaw’o, na ituĩ syaw’o, na iĩndĩ syaw’o;

12na yĩla ĩsandũkũ, na mĩtĩ yayo, na ũla wĩkalo wa tei, na ũla tũtũ wa kũtilan’ya;

13na ĩla mesa, na mĩtĩ yayo, na mĩio yayo yonthe, na ila imũtũ sya kwiĩawa Yeova;

14na kĩla kĩndũ kĩkĩawa mataa nakyo kwondũ wa kũmulĩka, na mĩio yakyo, na mataa makyo, na ala mauta ma kwakan’ya taa;

15na kĩla kĩthembeo kya kũtoeeasya ũvani, na mĩtĩ yakyo, na ala mauta ma kwĩtĩkĩsya, na ũla ũvani ũnyungaa nesa, na ũla tama wa mũomonĩ, o mũomonĩ wa wĩkalo;

16na kila kĩthembeo kya nthembo ya kũvĩvw’a, vamwe na ũla seng’eng’e wakyo wa ũthuku, na mĩtĩ yakyo, na mĩio yakyo yonthe, na kĩla kĩndũ kya kũthambĩaa na ĩtina yakyo;

17na ila ngũa sya kũniinw’a sya nza, na ituĩ syasyo, na iĩndĩ syasyo, na ũla tama wa mbingĩlonĩ ya nza;

18na ila syambo sya wĩkalo, na ila syambo sya nza, na makanda masyo;

19na ila ngũa ndume nesa kwondũ wa kũthũkũmĩa vala vandũ vatheu, ngũa ila ntheu sya mũthembi Aluni, na ngũa sya ana make, sya kũthũkũmĩa wĩanĩ wa ũthembi.

20Na ũmbano w’onthe wa ana ma Isilaeli wauma vala Mose ũĩ.

21Na mooka kĩla ũmwe ũla ngoo yake yamũthangaasya, na kĩla ũmwe ũla veva wake watumaa enda, na maete nthembo ya Yeova, kwondũ wa wĩa wa ĩeema ya kũmbanĩa, na kwondũ wa ũthũkũmi w’onthe wayo, na kwondũ wa ila ngũa ntheu.

22Na mooka, aũme o na aka, o ala maĩ na ngoo ya kwenda, na maete mavĩnĩ, na ngome sya matũ, na ngome sya ũvana ũsiĩlo, na itang’a, mĩio yonthe ya wanake ya thaavu; o kĩla mũndũ ũla waumĩsye Yeova nthembo ya thaavu.

23Na kĩla mũndũ ũla wonekie e na langi wa vuluu, na ũla ũtilyĩ ta mũtune, na ũla mũtune mũno, na katane nzeo, na maw’ĩa ma mbũi, na mbũa sya ndũũme syĩkĩtwe langi mũtune, na mbũa sya vomboo, aete.

24Kĩla ũmwe ũla waumisye nthembo ya vetha na ya ũthuku aetee Yeova nthembo; na kĩla mũndũ, ũla wonekie e na mĩtĩ ya mũea ũndũ wa wĩa o na wĩva wa ũla ũthũkũmi, aete.

25Na aka onthe ala maĩ na ngoo syĩ na ũĩ mokothaa na moko moo, na makĩete kĩla mokothie, ila ndii sya vuluu, na ila itilyĩ ta ndune, na ila ndune mũno, na katane nzeo.

26Na aka onthe ala ngoo syoo syamathangaasya methĩwe oĩ mokothaa maw’ĩa ma mbũi.

27Na asumbĩki maete tũla tũvila twa nzumalati, na tũvila twa kũlũmanĩthw’a iĩndĩnĩ syatw’o, evotinĩ, na kakalonĩ ka kĩthũi;

28na ĩla mĩtĩ ĩnyungaa nesa, na ala mauta; kwondũ wa kwakan’ya taa, na kwondũ wa mauta ma kwĩtĩkĩsya, na kwondũ wa ũvani ũla ũnyungaa nesa.

29Ana ma Isilaeli manũetee Yeova nthembo na ngoo ya kwenda; o kĩla mũndũ mũũme na mũndũ mũka, ũla ngoo yake yaĩ na kwenda kwa kũete kwondũ wa wĩa ũsu w’onthe, ũla Yeova weaĩte wĩkwe nĩ Mose.

30Na Mose amea ana ma Isilaeli, Sisya, Yeova nũmũwetete na syĩtwa yake Mbesaleli, mwana wa Ulĩ, mwana wa Uulu, wa mbaĩ ya Yuta;

31na amusũĩtye Veva wa Ngai, ũĩnĩ, na ũmanyinĩ, na ũmanyĩsyonĩ, na wĩanĩ wa mĩthemba yonthe;

32kũmantha kwĩka mawĩa ma ũĩ, nĩ kana aseũvye thaavu, na vetha, na ũthuku,

33na kwasũvya tũvila twa kwĩkĩwa nthĩnĩ wa syĩndũ, na kwasũvya mbwaũ, o na kũthethya mawĩa ma ũĩ ma mĩthemba yonthe.

34Na nĩwĩkĩĩte ngoonĩ yake nĩ kana amanyĩsye, we, o na Ooliavu, mwana wa Aisamaki, wa mbaĩ ya Ndani.

35Asu amausũĩtye ũĩ wa ngoo, wa kũtethya wĩa wa mĩthemba yonthe, wa mũvani, na wa mũtethya wa wĩa ũla mũĩ, na wa mũtumi mũĩ wa ndii sya vuluu, na ila itilyĩ ta ndune, na ila ndune mũno, na katane nzeo, na wa mũtumi wa ngũa, o asu matethasya wĩa wa mũthemba o na wĩva, na wa ala mamanthaa kwĩka mawĩa ma ũĩ.

← Chapter 34 Jump to: Chapter 36 →