Exodus 38

Kamba (Mbivilia) 1956

← Chapter 37 Jump to: Chapter 39 →

1Na aseũvya kĩla kĩthembeo kya nthembo ya kũvĩvw’a kya mĩtĩ ya mũea: ũasa wakyo waĩ mĩkono ĩtano, na ũthanthau wakyo mĩkono ĩtano, ngalĩ inya syĩanene; na ũtũlu wakyo mĩkono ĩtatũ.

2Na aseũvya mbya syakyo ĩũlũ wa ikoto inya syakyo; mbya syakyo syaĩ sya kĩlungu kĩmwe nakyo: na akĩvw’ĩka ũthuku.

3Na aseũvya mĩio yonthe ya kĩla kĩthembeo, ĩla mĩio ya kwokaa mũu, na ĩla mĩko, na ala masaani manene, na ila itonyi sya nyama, na tũla tũvũngũlyũ twa ũkua makaa: mĩio yonthe yakyo aseũvya ya ũthuku.

4Na aseũvĩsya kĩla kĩthembeo seng’eng’e wa ũthuku, ĩtheo wa ũengo ũla wĩkĩlingĩlĩte ngalĩko ya ungu, ũkĩambata ũvike kĩthembeonĩ katĩ.

5Na atua ngome inya ũndũ wa mĩthya ĩna ya ũla seng’eng’e wa ũthuku, syĩthĩwe kũndũ kwa kũtonyeesya ĩla mĩtĩ.

6Na aseũvya ĩla mĩtĩ ya mũea, na amĩvw’ĩka ũthuku.

7Na eekĩa ĩla mĩtĩ ngomenĩ syĩ mavavanĩ ma kĩthembeo, yĩthĩwe ya ũkĩkua; akĩseũvya na mbwaũ kĩ na ĩima nthĩnĩ katĩ.

8Na aseũvya kĩla kĩndũ kya kũthambĩaa kya ũthuku, na ĩtina yakyo ya ũthuku, wa isisyo sya aka athũkũmi ala mathũkũmĩaa mũomonĩ wa ĩeema ya kũmbanĩa.

9Na aseũvya ĩla nza: ngalĩ ya ĩtheo kwelekela ĩtheo ngũa ila sya kũniinw’a sya nza syaĩ sya katane nzeo mbokothe, ũasa wasyo mĩkono ĩana;

10ituĩ syasyo syaĩ mĩongo ĩlĩ, na iĩndĩ syasyo mĩongo ĩlĩ, sya ũthuku; syambo sya ituĩ isu na mĩkunzu yasyo syaĩ sya vetha.

11Na ngalĩ ya ĩũlũ, ũasa wasyo mĩkono ĩana, ituĩ syasyo mĩongo ĩlĩ, na iĩndĩ syasyo mĩongo ĩlĩ, sya ũthuku; syambo sya ituĩ, na mĩkunzu yasyo, syaĩ sya vetha.

12Na ngalĩ ya ũthũĩlonĩ wa syũa kwaĩ ngũa sya kũniinw’a, ũasa wasyo mĩkono mĩongo ĩtano, ituĩ syasyo ĩkũmi, na iĩndĩ syasyo ĩkũmi; syambo sya ituĩ, na mĩkunzu yasyo, syaĩ sya vetha.

13Na ngalĩ ya wumĩlonĩ wa syũa kwelekela wumĩlonĩ wa syũa syaĩ sya mĩkono mĩongo ĩtano.

14Ngũa ila sya kũniinw’a sya ngalĩ ĩmwe ya mbingĩlo syaĩ sya mĩkono ĩkũmi na ĩtano; ituĩ syasyo itatũ, na iĩndĩ syasyo itatũ;

15na no ta ũu ũndũ wa ngalĩ ĩla ĩngĩ: kw’oko kũũ na kw’oko kũla kũngĩ ũtee wa mbingĩlo ya ĩla nza kwaĩ ngũa sya kũniinw’a, ũasa wasyo mĩkono ĩkũmi na ĩtano; ituĩ syasyo itatũ, na iĩndĩ syasyo itatũ.

16Ngũa syonthe sya kũniinw’a sya kwĩlingĩla nza syaĩ sya katane nzeo mbokothe.

17Na iĩndĩ sya ituĩ syaĩ sya ũthuku; ila syambo sya ituĩ, na mĩkunzu yasyo, syaĩ sya vetha; na kĩla kyavw’ĩkĩte ngovia syasyo, kyaĩ kya vetha; na ituĩ syonthe sya ĩla nza syakwatanw’a na mũkunzu wa vetha.

18Na ũla tama wa mbingĩlonĩ ya nza waĩ wĩa wa mũtumi mũĩ wa ndii sya vuluu, na ila itilyĩ ta ndune, na ila ndune mũno, na katane nzeo mbokothe: ũasa waw’o waĩ mĩkono mĩongo ĩlĩ, na ũtũlu waw’o, now’o ũthanthau waw’o, waĩ mĩkono ĩtano, o ta ila ngũa sya kũniinw’a sya nza.

19Na ituĩ syasyo syaĩ inya, na iĩndĩ syasyo inya, sya ũthuku; syambo syasyo syaĩ sya vetha, na kĩla kyavw’ĩkĩte ngovia syasyo, na mĩkunzu yasyo, syaĩ sya vetha.

20Na syambo syonthe sya ũ wĩkalo, na ila sya nza syĩlingĩlĩte, syaĩ sya ũthuku.

21Ũsu nĩw’o ũtalo wa isamũ sya wĩkalo, o wĩkalo ũsu wa ũkũsĩ, o ũndũ syatalilwe, kwĩanana na mwĩao wa Mose, ũndũ wa ũthũkũmi wa Alivai, nĩ Ithamali, mwana wa mũthembi Aluni.

22Na Mbesaleli, mwana wa Ulĩ, mwana wa Uulu, wa mbaĩ va Yuta, aseũvya syonthe ila Yeova wamwĩaĩe Mose.

23Na vamwe nake kwaĩ Ooliavu, mwana wa Aisamaki, wa mbaĩ ya Ndani, mũvani, na mũtethya wa wĩa ũla mũĩ, na mũtumi mũĩ wa ndii sya vuluu, na ila itilyĩ ta ndune, na ila ndune mũno, na katane nzeo.

24Thaavu w’onthe ũla waumiw’e kwondũ wa wĩa ũsu wĩanĩ w’onthe wa vala vandũ vatheu, o thaavu ũsu waumiw’e wa nthembo, waĩ wa telendi mĩongo ĩlĩ na kenda, na sekeli maana mũonza na mĩongo ĩtatũ, kwĩanana na sekeli ya vala vandũ vatheu.

25Na vetha wa asu matalilwe ma ũmbano waĩ talendi ĩana, na sekeli ngili ĩmwe na maana mũonza na mĩongo mũonza na itano, kwĩanana na sekeli ya vala vandũ vatheu:

26veka o kĩla mũndũ, nĩyo nyunzu ya sekeli, kwĩanana na sekeli ya vala vandũ vatheu, kwondũ wa kĩla ũmwe ũla wavĩtũkie e mũtale athi kwa asu atale, ala mavikĩtye myaka mĩongo ĩlĩ na mbee, kwondũ wa andũ ngili maana thanthatũ na itatũ na maana atano na mĩongo ĩtano.

27Na talendi isu ĩana sya vetha syaĩ kwondũ wa kũtua iĩndĩ sya vala vandũ vatheu, na iĩndĩ isu sya ũla tũtũ; iĩndĩ ĩana kuma ila talendi ĩana, talendi ĩmwe kwondũ wa kĩla kĩĩndĩ.

28Na aseũvya syambo sya ituĩ isu kuma ila sekeli ngili ĩmwe na maana mũonza na mĩongo mũonza na itano, na avw’ĩka ila ngovia syasyo, na aseũvya mĩkunzu ũndũ wasyo.

29Na ũthuku wa ĩla nthembo waĩ wa talendi mĩongo mũonza, na sekeli ngili ilĩ na maana ana.

30Na aseũvya iĩndĩ o w’o sya mũomo wa yĩla ĩeema ya kũmbanĩa, na kĩla kĩthembeo kya ũthuku, na ũla seng’eng’e wa ũthuku wakyo, na mĩio yonthe ya kĩthembeo kyu,

31na iĩndĩ sya nza ĩthyũlũlũkĩte, na iĩndĩ sya mbingĩlonĩ ya nza, na syambo syonthe sya ũla wĩkalo, na syambo syonthe sya ĩla nza ĩthyũlũlũkĩte.

← Chapter 37 Jump to: Chapter 39 →