Exodus 36

Kamba (Mbivilia) 1956

← Chapter 35 Jump to: Chapter 37 →

1Na Mbesaleli na Ooliavu makatethye wĩa, na kĩla mũndũ wĩ na ũĩ ngoonĩ, ũla Yeova wĩkĩĩte ũĩ na ũmanyi amanye kũtethya wĩa w’onthe wa ũthũkũmi wa vala vandũ vatheu, o kwĩanana na onthe ala Yeova wĩaĩte.

2Na Mose eeta Mbesaleli na Ooliavu, na kĩla mũndũ wĩ na ũĩ ngoonĩ, ũla ngoonĩ yake Yeova wekĩĩte ũĩ, o kĩla ũmwe ũla ngoo yake yamũthangaaĩtye oke wĩanĩ otethye:

3na moosa mokonĩ ma Mose nthembo yonthe ĩla ana ma Isilaeli maetete ũndũ wa wĩa wa ũthũkũmi wa vala vandũ vatheu, moseũvye. Na ĩngĩ, mamũetee kĩla kĩoko nthembo sya kwenda kwa ngoo.

4Na andũ oĩ onthe, ala matethisye wĩa w’onthe wa vala vandũ vatheu, mauma kĩla mũndũ wĩanĩ wake ũla watethasya;

5na maneena na Mose, makĩmwĩa, Andũ nĩmeũete nyingĩ mũno kũvĩtũka vata wa ũthũkũmi wa wĩa ũla Yeova weaĩte ũtethw’e.

6Na Mose aumya mwĩao, na matuma ũtavanw’a mwakonĩ wa maeema w’onthe, makyasya, Mũndũ mũũme o na mũndũ mũka ndakatethye wĩa ũngĩ kwondũ wa nthembo ya vala vandũ vatheu. Na ĩndĩ andũ masiĩĩwa matikaete.

7Nũndũ syĩndũ ila maĩ nasyo mĩsyeanĩe kũtethya wĩa ũsu w’onthe, o na kũthonoka.

8Na andũ onthe me na ũĩ ngoonĩ ma ala matethasya wĩa maseũvĩsya ũla wĩkalo masuka ĩkũmi: Mbesaleli amaseũvya ma ndii sya katane nzeo mbokothe, na ila sya vuluu, na ila itilyĩ ta ndune, na ila ndune mũno, amatumĩĩa ngelekan’yo ya akeluvi, wĩa wa mũtethya wa wĩa ũla mũĩ.

9Ũasa wa kĩla suka waĩ mĩkono mĩongo ĩlĩ na nyanya, na ũthanthau wa kĩla suka mĩkono ĩna: masuka onthe nĩmathimĩtwe ũndũ ũmwe.

10Na akwatan’ya masuka atano ũmwe na ũla ũngĩ: na masuka ala angĩ atano akwatan’ya ũmwe na ũla ũngĩ.

11Na aseũvya ikwatũ sya vuluu ũteenĩ wa suka ũmwe ũtiivonĩ vala makwatanĩlw’e: na aseũvya o ta ũu ũteenĩ wa suka ũla wĩ mũminũkĩlyo wa vala vakwatanĩlw’e va kelĩ.

12Aseũvya ikwatũ mĩongo ĩtano sukanĩ ũmwe, na aseũvya ikwatũ mĩongo ĩtano ũteenĩ wa suka ũla waĩ vala vakwatanilw’e va kelĩ: kĩkwatũ kĩmwe kyelekele kĩla kĩngĩ.

13Na aseũvya tũvoloi mĩongo ĩtano twa thaavu, na akwatan’ya masuka, ũmwe na ũla ũngĩ, na tũvoloi tũu: na ĩndĩ ũla wĩkalo watw’ĩka ũmwe.

14Na aseũvya masuka ma maw’ĩa ma mbũi matw’ĩke ĩeema ĩũlũ wa wĩkalo ũsu: amaseũvya masuka asu ĩkũmi na ũmwe.

15Ũasa wa kĩla suka waĩ mĩkono mĩongo ĩtatũ, na ũthanthau wa kĩla suka mĩkono ĩna: masuka asu ĩkũmi na ũmwe nĩmathimĩtwe ũndũ ũmwe.

16Na akwatan’ya masuka atano me oka, na masuka thanthatũ me oka.

17Na aseũvya ikwatũ mĩongo ĩtano ũteenĩ wa suka ũla waĩ mũminũkĩlyo wa vala vakwatanĩlw’e, na aseũvya ikwatũ mĩongo ĩtano ũteenĩ wa suka ũla waĩ mũminũkĩlyo wa vala vakwatanĩlw’e va kelĩ.

18Na aseũvya tũvoloi mĩongo ĩtano twa ũthuku twa kũkwatan’ya ĩeema yĩthĩwe yĩmwe.

19Na aseũvya kĩla kya kũvw’ĩka ĩeema kya mbũa sya ndũũme syĩkĩtwe langi mũtune, na ĩũlũ wakyo kĩngĩ kya mbũa sya vomboo.

20Na aseũvya mbwaũ sya wĩkalo sya mĩtĩ ya mũea, iũngamĩtw’e.

21Ũasa wa ũvwaũ waĩ mĩkono ĩkũmi, na ũthanthau wa kĩla ũvwaũ mũkono na nyunzu.

22Kĩla ũvwaũ waĩ na isinĩko ilĩ isinĩkanĩtw’e: eekie ũu ũndũ wa mbwaũ syonthe sya wĩkalo.

23Na aseũvya mbwaũ sya wĩkalo: mbwaũ mĩongo ĩlĩ kwondũ wa ngalĩ ya ĩtheo kwelekela ĩtheo;

24na aseũvya iĩndĩ mĩongo ĩna sya vetha ungu wa ila mbwaũ mĩongo ĩlĩ; iĩndĩ ilĩ ungu wa ũvwaũ ũmwe ũndũ wa isinĩko syaw’o ilĩ, na iĩndĩ ilĩ ungu wa ũvwaũ ũngĩ ũndũ wa isinĩko syaw’o ilĩ.

25Na ũndũ wa ngalĩ ya kelĩ ya wĩkalo, ngalĩ ya ĩũlũ, aseũvya mbwaũ mĩongo ĩlĩ,

26na iĩndĩ syasyo mĩongo ĩna; iĩndĩ ilĩ ungu wa ũvwaũ ũmwe, na iĩndĩ ilĩ ungu wa ũvwaũ ũngĩ.

27Na ũndũ wa ngalĩ ya mbĩlĩlo wa wĩkalo kwelekela ũthũĩlonĩ wa syũa aseũvya mbwaũ thanthatũ.

28Na aseũvya mbwaũ ilĩ ũndũ wa ikoto sya wĩkalo ngalĩ ya mbĩlĩlo.

29Na syeethĩwa ikwatene kuma nthĩ; na syeethĩwa ikwatene o ta ũu kũvika mũthya wĩ ĩũlũ wasyo kũvika ngomenĩ ĩmwe: asyĩka isu syelĩ ta ũu ikotonĩ syelĩ.

30Na kwaĩ mbwaũ nyanya, na iĩndĩ syasyo sya vetha, iĩndĩ ĩkũmi na thanthatũ; ungu wa kĩla ũvwaũ iĩndĩ ilĩ.

31Na aseũvya mĩamba ya mĩtĩ ya mũea; ĩtano ũndũ wa mbwaũ sya ngalĩ ĩmwe ya wĩkalo,

32na mĩamba ĩtano ũndũ wa mbwaũ sya ngalĩ ĩla ĩngĩ ya wĩkalo, na mĩamba ĩtano ũndũ wa mbwaũ sya wĩkalo sya ngalĩ ya mbĩlĩlo kwelekela ũthũĩlonĩ wa syũa.

33Na aseũvya mũamba ũla wĩ katĩ ũvĩtĩle mbwaũnĩ katĩ kuma mũthya ũmwe kũvika ũla ũngĩ.

34Na avw’ĩka mbwaũ thaavu, na atua ngome syasyo sya thaavu syĩthĩwe sya kwĩkĩa mĩamba, na akĩvw’ĩka mĩamba thaavu.

35Na aseũvya ũla tũtũ na ndii sya vuluu, na ila itilyĩ ta ndune, na ila ndune mũno, na katane nzeo mbokothe: ootumĩĩa ngelekan’yo ya akeluvi, wĩa wa mũtethya wa wĩa ũla mũĩ.

36Na ooseũvĩsya ituĩ inya sya mĩtĩ ya mũea, na aivw’ĩka thaavu: syambo syasyo syaĩ sya thaavu; na aitũĩsya iĩndĩ inya sya vetha.

37Na ooseũvĩsya mũomo wa Ĩeema tama na ndii sya vuluu, na ila itilyĩ ta ndune, na ila ndune mũno, na katane nzeo mbokothe, wĩa wa mũtumi mũĩ wa ndii;

38na ituĩ itano syaw’o vamwe na syambo syasyo; na avw’ĩka ngovia syasyo na mĩkunzu yasyo thaavu; na iĩndĩ syasyo itano syaĩ sya ũthuku.

← Chapter 35 Jump to: Chapter 37 →