Exodus 28

Kamba (Mbivilia) 1956

← Chapter 27 Jump to: Chapter 29 →

1Naku mwĩte Aluni, mwana‐a‐mwenyu, oke vala ũĩ, na ana make vamwe nake, kuma ananĩ ma Isilaeli, nĩ kana anthũkũmae wĩanĩ wa ũthembi, Aluni, o na Natavu, na Aviu, na Eleasali, na Ithamali, ana ma Aluni.

2Na ũkaseũvĩsye Aluni, mwana‐a‐mwenyu, ngũa ntheu, kwondũ wa kũmũtaĩĩthya na kũmwanakavya.

3Na ũkaneene na onthe ala me na ũĩ ngoonĩ, ala nusũĩtye na veva wa ũĩ, nĩ kana maseũvye ngũa sya Aluni sya ũmũvathan’ya ethĩwe mũtheu, nĩ kana anthũkũmae wĩanĩ wa ũthembi.

4Na ii nĩsyo ngũa ila metuma: kakalo ka kĩthũi, na evoti, na ngũa ndasa, na kanzũ wa kũngũlũ, na ngutw’a, na mũsivi: na makamaseũvĩsye Aluni mwana‐a‐mwenyu, na ana make, ngũa ntheu, nĩ kana anthũkũmae wĩanĩ wa ũthembi.

5Na nĩmakose ũla thaavu, na ila ndii sya vuluu, na ila itilyĩ ta ndune, na ila ndune mũno, na katane nzeo.

6Na makaseũvye yĩla evoti ya thaavu, na ya ndii sya vuluu, na ila itilyĩ ta ndune, na ila ndune mũno, na katane nzeo mbokothe, wĩa wa mũtethya wa wĩa ũla mũĩ.

7Yĩkethĩwe na ikwatũ ilĩ sya ituonĩ ikwatene na mĩthya ĩlĩ yayo, nĩ kana yĩkwatanw’e vamwe.

8Na ũla mũsivi ũtũmĩtwe na ũĩ, ũla wĩ ĩũlũ wayo, o ũla wa kũyova yĩlũme, ũkaseũvw’e ũndũ ũmwe nayo na wa kĩlungu kĩmwe nayo; wa thaavu, na wa ndii sya vuluu, na ila itilyĩ ta ndune, na ila ndune mũno, na katane nzeo mbokothe.

9Na ũkose tũvila twĩlĩ twa nzumalati, noitũvana masyĩtwa ma ana ma Isilaeli:

10masyĩtwa thanthatũ moo kavilanĩ kamwe, na masyĩtwa thanthatũ ala matiala kavilanĩ kala kangĩ, kwĩanana na mosyaanĩo moo.

11Ũkavane tũvila tũu twĩlĩ kwĩanana na wĩa wa mũvani wa tũvila, o ta movano me ngomenĩ ya kũsiĩla, kũatĩĩa masyĩtwa ma ana ma Isilaeli: ũkaseũvye tũlũmanĩthw’e iĩndĩnĩ sya thaavu.

12Na ũkekĩe tũla tũvila twĩlĩ ikwatũnĩ sya ituo sya evoti, twĩthĩwe tũvila twa ũlilikan’yo kwondũ wa ana ma Isilaeli: na Aluni akakuĩaa masyĩtwa moo vu mbee wa Yeova ituonĩ syake kwondũ wa ũlilikan’yo.

13Na ũkaseũvye iĩndĩ sya thaavu,

14na mĩnyoo ĩlĩ ya thaavu mũtheu; ũkamĩseũvye ta tũkanda, twa wĩa wa kũvĩnda: na ũkekĩe ĩla mĩnyoo mĩvĩnde iĩndĩnĩ.

15Na ũkaseũvye kakalo ka kĩthũi ka kũtw’a sila, wĩa wa mũtethya wa wĩa ũla mũĩ; ũkakaseũvye o ta evoti; ũkakaseũvye ka thaavu, na ka ndii sya vuluu, na ila itilyĩ ta ndune, na ila ndune mũno, na katane nzeo mbokothe.

16Kakethĩwe keanene ngalĩ inya, katũlanĩlwa; ũasa wako ũkeethĩwa wa ĩkwata yĩmwe ya kĩtaa, na ũthanthau wayo ĩkwata yĩmwe ya kĩtaa.

17Na ũkekĩe nthĩnĩ wako tũvila tũlũmanĩthw’e iĩndĩnĩ syatw’o, mĩsoa ĩna ya tũvila: mũsoa wa mbee wa salitũ, na tovasi, na alimasi ndune;

18na mũsoa wa kelĩ sumalati, na savili, na salitonyi;

19na mũsoa wa katatũ samawi, na yasimu, na amethusito;

20na mũsoa wa kana nzumalati ntheu, na nzumalati, na yasivi: tũlũmanĩthw’e na thaavu iĩndĩnĩ syatw’o.

21Na tũvila tũu tũkeethĩwa tũkĩatĩĩa masyĩtwa ma ana ma Isilaeli, ĩkũmi na elĩ, kwĩanana na masyĩtwa moo; o ta movano me ngomenĩ ya kũsiĩla, kĩla kamwe kwĩanana na syĩtwa yake, nĩtũkethĩwa kwondũ wa ila mbaĩ ĩkũmi na ilĩ.

22Na ũkaseũvye mĩnyoo ĩtilyĩ tũkanda kakalonĩ ka kĩthũi ĩũlũ, ya thaavu mũtheu wĩ mũvĩnde.

23Na ũkaseũvye kakalonĩ ka kĩthũi ĩũlũ ngome ilĩ sya thaavu, na kwĩkĩa ngome isu ilĩ mĩthyanĩ ĩlĩ ya kakalo ka kĩthũi.

24Na ũkĩkĩa ĩla mĩnyoo ĩlĩ mĩvĩnde ya thaavu ila ngomenĩ ilĩ ila syĩ mĩthyanĩ ya kakalo ka kĩthũi.

25Na mĩthya ĩla ĩngĩ ĩlĩ ya ĩla mĩnyoo ĩlĩ mĩvĩnde ũkekĩe ĩũlũ wa ila iĩndĩ ilĩ, na kũkolelya ikwatũnĩ sya ituo sya evoti ngalĩ ya mbee yayo.

26Na ũkatue ngome ilĩ sya thaavu, na ũikolelya mĩthyanĩ ĩlĩ ya kakalo ka kĩthũi, ũtiivonĩ wako, ũla welekele ngalĩ ya nthĩnĩ ya evoti.

27Na ũkatue ngome ilĩ sya thaavu, na ũikolelya ikwatũnĩ ilĩ sya ituo sya evoti ungu, ngalĩ ya mbee yayo, vakuvĩ na vala vakwatanĩlwe vayo, ĩũlũ wa ũla mũsivi wa evoti ũtumĩtwe na ũĩ.

28Na makalũmanye kakalo ka kĩthũi na ngome syako ngomenĩ sya evoti na ũlii wa vuluu, nĩ kana kethĩwe ĩũlũ wa ũla mũsivi wa evoti ũtumĩtwe na ũĩ, na nĩ kana kala kakalo ka kĩthũi kaikathaw’e yĩla evotinĩ.

29Na Aluni akakuae masyĩtwa ma ana ma Isilaeli kakalonĩ ka kĩthũi ka kũtw’a sila ĩũlũ wa ngoo yake, yĩla wĩvotaa vala vandũ vatheu, kwondũ wa ũlilikan’yo vu mbee wa Yeova ĩndĩ yonthe.

30Na ũkekĩe kakalonĩ ka kĩthũi ka kũtw’a sila Ulimu na Thumimu; nasyo ikeethĩwa ĩũlũ wa ngoo ya Aluni, yĩla wĩvotaa vala ve Yeova: na Aluni akakuĩaa ũsilĩlo wa ana ma Isilaeli ĩũlũ wa ngoo yake vu mbee wa Yeova ĩndĩ yonthe.

31Na ũkaseũvye ĩla ngũa ndasa ya evoti yonthe ya vuluu.

32Nayo ĩkethĩwe na ĩima katĩ, ya kũlikya mũtwe: ĩkethĩwe na ũtaami mũtume wĩlingĩle ĩimanĩ yayo, yĩilyĩ ta ĩima yĩkĩwe kakotĩ ka kaũ, nĩ kana ndĩkatembũke.

33Na motiivonĩ mayo ũkaseũvye makũngũmanga ma ndii sya vuluu, na ila itilyĩ ta ndune, na ila ndune mũno, kwĩlingĩla ũtiivonĩ wayo; na tũtilili twa thaavu katĩ wamo twĩlingĩlĩte:

34katilili ka thaavu na ĩkũngũmanga, katilili ka thaavu na ĩkũngũmanga, kwĩlingĩla ngũa ũtiivonĩ wayo.

35Nayo ĩkekĩwe nĩ Aluni nĩ kana athũkũmae: na wasya watw’o ũkeew’ĩka yĩla wĩvotaa nthĩnĩ wa vala vandũ vatheu vala ve Yeova, na yĩla wĩumĩlaa, nĩ kana ndakakw’e.

36Na ũkaseũvye kĩlaũnĩ kya thaavu mũtheu, noivana ĩũlũ wakyo, o ta movano me ngomenĩ ya kũsiĩla, MŨTHEU KWA YEOVA.

37Na ũkakĩkĩe ũliinĩ wa vuluu, na kĩkeethĩwa ngutw’anĩ; kĩkethĩwe ngutw’anĩ ngalĩ ya mbee.

38Na kĩkeethĩwa kĩtulyanĩ kya Aluni, na Aluni akakuaa ũthũku wa ila syĩndũ ntheu, ila ana ma Isilaeli makavathan’ya syĩthĩwe ntheu mĩthĩnzĩonĩ yoo yonthe mĩtheu; na kĩkeethĩwa kĩtũlyanĩ kyake ĩndĩ yonthe, nĩ kana metĩkĩlwe kwa Yeova.

39Na ũkatume ũla kanzũ wa kũngũlũ wa katane nzeo, na kũseũvya ngutw’a ya katane nzeo, na kũseũvya mũsivi, wĩa wa mũtumi mũĩ wa ndii.

40Na ũkaseũvĩsye ana ma Aluni makanzũ, na kũmaseũvĩsya mĩsivi, na kũmaseũvĩsya tũkovila, kwondũ wa kũmataĩĩthya na kũmanakavya.

41Na ũkasyĩkĩe Aluni mwana‐a‐mwenyu, na ana make, na kũmetĩkĩsya mauta, na kũmavathan’ya methĩwe atheu, na kũmathesya, nĩ kana manthũkũmae wĩanĩ wa ũthembi.

42Na ũkamaseũvĩsye masulũalĩ ma katane mevw’ĩkae mĩĩ yoo, ĩeke kwĩthĩwa mĩthei; makaume inyunyu kũvika matako:

43na makeekĩwa nĩ Aluni, na ana make, yĩla meũlika ĩeemanĩ ya kũmbanĩa, kana yĩla meũthengeea kĩthembeonĩ mathũkũme nthĩnĩ wa vala vandũ vatheu; nĩ kana matikakue ũthũku na makĩkw’a: ũkeethĩwa mwamũlo kũvika tene na tene kwake na kwa ũsyao wake ĩtina wake.

← Chapter 27 Jump to: Chapter 29 →