Exodus 39

Kamba (Mbivilia) 1956

← Chapter 38 Jump to: Chapter 40 →

1Na maseũvya ngũa ndume nesa mũno sya ila ndii sya vuluu, na ila itilyĩ ta ndune, na ila ndune mũno, ũndũ wa wĩa wa kũthũkũmĩaa vala vandũ vatheu, na maseũvya ila ngũa ntheu kwondũ wa Aluni; o tondũ Yeova weaĩe Mose.

2Na aseũvya yĩla evoti na ndii sya thaavu, na ila sya vuluu, na ila itilyĩ ta ndune, na ila ndune mũno, na katane nzeo mbokothe.

3Nao mamanda thaavu ũsu wavũtha mũno, na mawatũanga watw’ĩka tũmĩkunzu, nĩ kana motuman’ye na ila sya vuluu, na ila itilyĩ ta ndune, na ila ndune mũno, na katane nzeo, wĩa wa mũtethya wa wĩa ũla mũĩ.

4Mayĩseũvĩsya ikwatũ sya ituonĩ, ikwatene: yaĩ ĩkwatan’ye mĩthyanĩ ĩlĩ yayo.

5Na ũla mũsivi ũtũmĩtwe na ũĩ, ũla waĩ ĩũlũ wayo, ũla wa kũyova yĩlũme, waĩ wa kĩlungu kĩmwe nayo na ũtũmĩtwe ũndũ ũmwe nayo; wa ndii sya thaavu, na ila sya vuluu, na ila itilyĩ ta ndune, na ila ndune mũno, na katane nzeo mbokothe; o tondũ Yeova weaĩe Mose.

6Na maseuvya tũla tũvila twa nzumalati, tũlũmanĩthw’e iĩndĩnĩ sya thaavu, mavanĩtwe na movano me ngomenĩ ya kũsiĩla, kwĩanana na masyĩtwa ma ana ma Isilaeli.

7Na amekĩa ikwatũnĩ sya ituonĩ sya yĩla evoti, methĩwe tũvila twa ũlilikan’yo kwondũ wa ana ma Isilaeli; o tondũ Yeova weaĩe Mose.

8Na aseũvya kala kakalo ka kĩthũi, wĩa wa mũtethya wa wĩa ũla mũĩ, o ta wĩa wa yĩla evoti; ka ndii sya thaavu, na ila sya vuluu, na ila itilyĩ ta ndune, na ila ndune mũno, na katane nzeo mbokothe.

9Keethĩwa keanene ngalĩ inya; maseũvya kala kakalo ka kĩthũi makĩkatulanĩla: ũasa wako waĩ ĩkwata yĩmwe ya kĩtaa, na ũthanthau wako ĩkwata yĩmwe ya kĩtaa, ke katulanĩle.

10Na meekĩa mĩsoa ĩna ya tũvila nthĩnĩ wako. Mũsoa wa mbee waĩ wa salitũ, na tovasi, na alimasi ndune;

11na mũsoa wa kelĩ, sumalati, na savili, na salitonyi;

12na mũsoa wa katatũ, samawi, na yasimu, na amethusito;

13na mũsoa wa kana, nzumalati ntheu, na nzumalati, na yasivi: tũlũmanĩthw’a na thaavu iĩndĩnĩ syatw’o.

14Na tũvila tũu twaĩ kwĩanana na masyĩtwa ma ana ma Isilaeli, ĩkũmi na elĩ, o kwĩanana na masyĩtwa moo; ta movano me ngomenĩ ya kũsiĩla, kĩla mũndũ kwĩanana na syĩtwa yake, kwondũ wa ila mbaĩ ĩkũmi na ilĩ.

15Na maseũvya mĩnyoo ĩtilyĩ tũkanda kakalonĩ ka kĩthũi ĩũlũ, ya thaavu mũtheu wĩ mũvĩnde.

16Na maseũvya iĩndĩ ilĩ sya thaavu, na ngome ilĩ sya thaavu, na meekĩa ngome isu ilĩ mĩthyanĩ ilĩ ya kala kakalo ka kĩthũi.

17Na meekĩa minyoo ĩsu ĩlĩ mĩvĩnde ya thaavu nthĩnĩ wa ngome ilĩ mĩthyanĩ ya kakalo ka kĩthũi.

18Na mĩthya ĩla ĩngĩ ĩlĩ ya mĩnyoo ĩsu ĩlĩ mĩvĩnde meekĩa ĩĩndĩnĩ isu ilĩ, na mamĩkolelya ila ikwatũnĩ isu sya ituonĩ sya evoti, ngalĩ ya mbee yayo.

19Na matua ngome ilĩ sya thaavu, na makolelya mĩthyanĩ ĩlĩ ya kakalo ka kĩthũi, ũteenĩ wako, ũla welekele ngalĩ ya nthĩnĩ ya evoti.

20Na matua ngome ilĩ sya thaavu, na makolelya ikwatũnĩ isu ilĩ sya ituonĩ sya evoti ungu, ngali ya mbee yayo, vakuvĩ na vala vakwatanĩlw’e vayo ĩũlũ wa ũla mũsivi, wa evoti ũtumĩtwe na ũĩ.

21Na malũman’ya kakalo ka kĩthũi na ngome syako ngomenĩ sya evoti na ũlii wa vuluu, nĩ kana kethĩwe ĩũlũ wa ũla mũsivi wa evoti ũtumĩtwe na ũĩ, na nĩ kana kakalo ka kĩthũi kaikathaw’e yĩla evotinĩ; o tondũ Yeova weaĩe Mose.

22Na aseũvya ĩla ngũa ndasa ya evoti ya ngũa ndume, yonthe ya vuluu;

23yi na ĩima ya kũlikya mũtwe ya ĩla ngũa ndasa nthĩnĩ wayo katĩ, yĩilyĩ ĩima yĩkĩwe kakotinĩ ka kaũ, yĩ na ũtaami wĩlingĩle ĩimanĩ yayo, nĩ kana ndĩkatembũke.

24Na motiivonĩ ma ĩla ngũa ndasa maseũvya makũngũmanga ma ndii sya vuluu, na ila itilyĩ ta ndune, na ila ndune mũno, na katane mbokothe.

25Na maseũvya tũtilili twa thaavu mũtheu, na meekĩa tũtilili tũu katĩ wa makũngũmanga motiivonĩ ma ĩla ngũa ndasa twĩlingĩlĩte, katĩ wa ala makũngũmanga;

26o katilili na ĩkũngũmanga, katilili na ĩkũngũmanga, motiivonĩ ma ĩla ngũa ndasa twĩlingĩlĩte, kwondũ wa kũthũkũmaa ekĩe; o tondũ Yeova weaĩe Mose.

27Na maseũvĩsya Aluni, na ana make, ala makanzũ ma katane nzeo matume,

28na ĩla ngutw’a ya katane nzeo, na tũla tũkovila twanakavye twa katane nzeo, na ala masulualĩ ma katane, katane nzeo mbokothe,

29na ũla mũsivi wa ndii sya katane nzeo mbokothe, na ila sya vuluu, na ila itilyĩ ta ndune, na ila ndune mũno, o wĩa wa mũtumi mũĩ wa ndii; o tondũ Yeova weaĩe Mose.

30Na maseũvya kĩla kĩlaũnĩ kya ĩla ngovia ya ũsumbĩ ntheu kya thaavu mũtheu, na maandĩka ĩũlũ wakyo ũandĩko, ũilyĩ movano me ngomenĩ ya kũsiĩla, atĩĩ, MŨTHEU KWA YEOVA.

31Na makyoveea ũlii wa vuluu, nĩ kana makĩlũman’ye na ngutw’a ĩũlũ wakyo; o tondũ Yeova weaĩe Mose.

32Ũu nĩw’o wĩa w’onthe wa ũla wĩkalo wa ĩeema ya kũmbanĩa wathelile: na ana ma Isilaeli meeka kwĩanana na onthe ala Yeova weaĩe Mose; ũu nĩw’o meekie.

33Na mamũetee Mose ũla wĩkalo, o yĩla Ĩeema, na mĩio yaw’o yonthe, tũvoloi twaw’o, na mbwaũ syaw’o, na mĩamba yaw’o, na ituĩ syaw’o, na iĩndĩ syaw’o;

34na kĩla kya kũvw’ĩka ĩeema kya mbũa sya ndũũme syĩkĩtwe langi mũtune, na kĩla kĩngĩ kya ũvw’ĩka kya mbũa sya vomboo, na ũla tũtũ wa kũtilan’ya;

35na yĩla ĩsandũkũ ya ũkũsĩ, na ĩla mĩtĩ yayo, na ũla wĩkalo wa tei;

36na ĩla mesa, na mĩio yayo yonthe, na ila imũtũ sya kwiĩawa Yeova;

37na kĩla kĩndũ kĩkĩawa mataa kĩtheu, na mataa makyo, o mataa ala maiawa vandũ vamo, na mĩio yakyo yonthe, na mauta ma kwakan’ya taa;

38na kĩla kĩthembeo kya thaavu, na ala mauta ma kwĩtĩkĩsya, na ũla ũvani ũnyungaa nesa, na tama ũla wa mũomonĩ wa yĩla Ĩeema;

39na kĩla kĩthembeo kya ũthuku, na seng’eng’e wakyo wa ũthuku, na mĩtĩ yakyo, na mĩio yakyo yonthe, na kĩla kĩndũ kya kũthambĩaa na ĩtina yakyo;

40na ila ngũa sya kũniinw’a sya nza, na ituĩ syasyo, na iĩndĩ syasyo, na ũla tama wa mbingĩlonĩ ya nza, na makanda maw’o, na syambo syaw’o, na mĩio yonthe ya ũthũkũmi wa ũla wĩkalo, kwondũ wa yĩla ĩeema ya kũmbanĩa;

41na ila ngũa ndume nesa kwondũ wa kũthũkũmĩaa vala vandũ vatheu, na ila ngũa ntheu sya mũthembi Aluni, na ngũa sya ana make, sya kũthũkũmaa wĩanĩ wa ũthembi.

42O kwĩanana na onthe ala Yeova weaĩe Mose, ana ma Isilaeli matethisye wĩa w’onthe o ta ũu.

43Na Mose oona wĩa ũsu w’onthe, na sisya, mawĩkĩte; o tondũ Yeova weaĩte, ũu nĩw’o mekĩte: na Mose amaathima.

← Chapter 38 Jump to: Chapter 40 →