Exodus 40

Kamba (Mbivilia) 1956

← Chapter 39 Jump to:

1Na Yeova aneena na Mose, akĩmwĩa,

2Mũthenya wa mbee wa mwei wa mbee ũkaũngamye ũla wĩkalo wa ĩeema ya kũmbanĩa.

3Na ũkekĩe nthĩnĩ yĩla ĩsandũkũ ya ũkũsĩ, na ũkavw’ĩke ĩsandũkũ yĩu na ũla tũtũ.

4Na ũkaete ĩla mesa nthĩnĩ, na kwia nesa syĩndũ ĩla sya ĩũlũ wayo; na ũkaete kĩla kĩndũ kĩkĩawa mataa, noikwatya mataa makyo.

5Na ũkaie kĩla kĩthembeo kya thaavu kya kũtoeeasya ũvani ngalĩ ya mbee ya yĩla ĩsandũkũ ya ũkũsĩ, na kwikĩa tama ũla wa mũomonĩ wa ũ wĩkalo.

6Na ũkaie kĩla kĩthembeo kya nthembo ya kũvĩvw’a ngalĩ ya mbee ya mũomo wa ũla wĩkalo wa ĩeema ya kũmbanĩa.

7Na ũkaie kĩla kĩndũ kya kũthambĩaa katĩ wa yĩla ĩeema ya kũmbanĩa na kĩthembeo kyu, na kwĩkĩa manzĩ vo nthĩnĩ.

8Na ũkaiie nza ũlingĩlĩte, na kwanĩka ũla tama wa mbingĩlo ya nza.

9Na ũkose ala mauta ma kwĩtĩkĩsya, na ũiwĩtĩkĩsya ũ wĩkalo, na syonthe ila syĩ nthĩnĩ, na ũkovathan’ye wĩthĩwe mũtheu, na mĩio yonthe yaw’o; na ũkeethĩwa wĩ mũtheu.

10Na ũketĩkĩsye kĩthembeo kya nthembo ya kũvĩvw’a mauta, na mĩio yonthe yakyo, na kũvathan’ya kĩla kĩthembeo kĩthĩwe kĩtheu: na kĩthembeo kĩkeethĩwa kĩtheu mũno vyũ.

11Na ũketĩkĩsye kĩla kĩndũ kya kũthambĩaa na ĩtina yakyo mauta, na ũikĩvathan’ya kĩthĩwe kĩtheu.

12Na ũkaete Aluni na ana make mũomonĩ wa ĩeema ya kũmbanĩa, na ũimathambya na manzĩ.

13Na ũkekĩe Aluni ila ngũa ntheu; na ũkamwĩtĩkĩsye mauta, na kũmũvathan’ya ethĩwe mũtheu, nĩ kana anthũkũmae wĩanĩ wa ũthembĩ.

14Na ũkaete ana make, na kũmekĩa makanzũ;

15na ũkametĩkĩsye mauta, o tondũ wetĩkĩsye ĩthe woo mauta, nĩ kana manthũkũmae wĩanĩ wa ũthembi: na kwĩtĩkĩw’a kwoo kũkeethĩwa kwoo kwondũ wa wĩa wa ũthembi kũvika tene na tene mosyaanĩonĩ moo onthe.

16Nake Mose eeka o ta ũu; kwĩanana na onthe ala Yeova wamwĩaĩe, ũu nĩw’o wekie.

17Na kweethĩwa mwei wa mbee wa mwaka wa kelĩ, mũthenya wa mbee wa mwei, ũla wĩkalo nĩwaũngamĩtw’e.

18Na Mose aũngamya ũ wĩkalo, na aia iĩndĩ syaw’o, na aũngamya mbwaũ syaw’o, na eekĩa mĩamba yaw’o, na aũngamya ituĩ syaw’o.

19Na alan’ya ĩeema ĩũlũ wa ũ wĩkalo, na eekĩa kĩla kya kũvw’ĩka ĩeema ĩũlũ wayo; o tondũ Yeova wamwĩaĩe Mose.

20Na oosa ũla ũkũsĩ na eekĩa nthĩnĩ wa yĩla ĩsandũkũ, na eekĩa ĩla mĩtĩ ĩsandũkũnĩ, na eekĩa ũla wĩkalo wa tei ĩsandũkũnĩ ĩũlũ:

21na aete yĩla ĩsandũkũ nthĩnĩ wa ũ wĩkalo, na anĩka ũla tũtũ wa kũtĩlan’ya, na avw’ĩka yĩla ĩsandũkũ ya ũkũsĩ; o tondũ Yeova wamwĩaĩe Mose.

22Na eekĩa ĩla mesa ĩeemanĩ ya kũmbanĩa, ngalĩ ya wĩkalo ya ĩũlũ, ũtee wa tũtũ.

23Na aia ila imũtũ vandũ vasyo ĩũlũ wayo mbee wa Yeova; o tondũ Yeova wamwĩaĩe Mose.

24Na eekĩa kĩla kĩndũ kĩkĩawa mataa ĩeemanĩ ya kũmbanĩa ngalĩ ya wĩkalo ya ĩtheo, kwelekela ĩ mesa.

25Na akwatya mataa mbee wa Yeova; o tondũ Yeova wamwĩaĩe Mose.

26Na eekĩa kĩla kĩthembeo kya thaavu ĩeemanĩ ya kũmbanĩa ngalĩ ya mbee ya ũla tũtũ:

27na atoeesya ũvani wa mĩtĩ ĩla ĩnyungaa nesa ĩũlũ wakyo; o tondũ Yeova wamwĩaĩe Mose.

28Na eekĩa ũla tama wa mũomonĩ wa wĩkalo.

29Na aia kĩthembeo kya nthembo ya kũvĩvw’a mũomonĩ wa wĩkalo wa ĩeema ya kũmbanĩa, na athemba ĩũlũ wakyo ĩla nthembo ya kũvĩvw’a na nthembo ya mũtu; o tondũ Yeova wamwĩaĩe Mose.

30Na aia kĩla kĩndũ kya kũthambĩaa katĩ wa ĩeema ya kũmbanĩa na kĩthembeo kyu, na eekĩa manzĩ nthĩnĩ wakyo, ma kũthamba.

31Na Mose na Aluni na ana make mathambĩsya moko moo na maũũ moo vo;

32o yĩla malikile ĩeemanĩ ya kũmbanĩa, na yĩla mathengeee kĩla kĩthembeo, nĩmathambaa; o tondũ Yeova wamwĩaĩe Mose.

33Na aiia ĩla nza alingĩlĩte ũla wĩkalo na kĩla kĩthembeo, na anĩka ũla tama wa mbingĩlonĩ ya nza. Na ĩndĩ, Mose amina wĩa ũsu.

34Nĩvo ĩndĩ ũla mũumbĩ wavw’ĩkie yĩla ĩeema ya kũmbanĩa, na ũtheu mũtisu wa Yeova wausũa ũla wĩkalo.

35Na Mose ndaatonya kũlika ĩeemanĩ ya kũmbanĩa, nĩkwĩthĩwa ũla mũumbĩ wekalaa ĩũlũ wayo, na ũtheu mũtisu wa Yeova wausũa wĩkalo.

36Na yĩla ũla mũumbi wookĩlilw’e kuma ĩũlũ wa wĩkalo, ana ma Isilaeli nĩmaendaa, syalonĩ syoo syonthe:

37ĩndĩ ũla mũumbĩ walea kũkĩlw’a, matyaendaa kyalo ĩndĩ, mũvaka mũthenya ũla wĩũkĩlw’a.

38Nũndũ ũla mũumbĩ wa Yeova waĩ ĩũlũ wa ũla wĩkalo mũthenya, na kwaĩ mwaki nthĩnĩ waw’o ũtukũ, andũ onthe ma nyũmba ya Isilaeli mene, syalonĩ syoo syonthe.

← Chapter 39 Jump to: