Leviticus 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Ak kinam Nadab ak Abiu werikab Aron chi tugul terennyi, ak konde mat orit, yeityo konde orit nyamdutik che kibeelei, ak kogoito eng’ taitab Jehovah mat ne ter ne kima ng’at inendet.

2Ak kimong’ mat ne kibun taitab Jehovah, ak kobeel ichek, ak kibek eng’ taitab Jehovah.

3Kilenji Musa anyun Aron, Ni kit ne kimwa Jehovah, kole, Aegu ne tilil eng’ ichek che rikyina, ak anyoru torornatet eng’ taitab bik tugul. Ak kisis Aron.

4Ak kiguur Musa anyun Misael ak Elsapan, werikab Usiel chitab oretab Aron, konyo kolenji, Obwa origu, osut tupchosiekwok komanda eng’ ole tilil koba sang’utab nganaset.

5Ak kirik anyun bichoto, ak kosut ichek, kotinyei ngoroikwak che koen, koba sang’utab nganaset, ko u ye kiga mwa Musa.

6Ak kilenji Musa Aron, ak Eleasar ak Itamar, werikyik, Amat oyat metowekwok, amogerer ngoroikwok; si mobegu, si manerekyi inendet tuiyet komugul: ago ingoririo tupchosiekwok, got komugul ne bo Israel, amu mat ne kagonaam Jehovah.

7Ak amomande eng’ kurgetab emait ne kituiyechin, si mobegu; amu mitei eng’ okwek mwaita ne bo Jehovah ne kiilse. Ak kiyai ko u ng’olyotab Musa.

8Ak kimwachi Jehovah Aron kolenji,

9Amat iee divaik anan maiyek alak tugul, inye, ak weriguk che mi koboten, ye obendi emait ne kituiyechin, si mobegu: egu ng’atutiet ne bo koigeny eng’ ibinwekwok tugul;

10si kobiit obesie che itabanotin ak che maitabanotin, ak obesie che ng’wonen ak che tililen;

11si kobiit onet lagokab Israel ng’atutik tugul che kigomwachi Jehovah ichek eng’ Musa.

12Ak kilenji Musa Aron, Eleasar, ak Itamar, werikyik che king’et, Oib kagochinetab busiek che kang’etune kagochinoik che kigochin Jehovah, che bunei mat, ak oam, amonde mermerek, eng’ ole negite kaptisisiet: amu tililen mising’;

13ak oam eng’ ole tilil, amu kebebertang’ung’ nito, ak kebebertab weriguk, eng’ kagochinoik che bunei mat che kigochin Jehovah: amu kiging’ata ko u noto.

14Ak oam eng’ komosta ne tilil tagatet ne kiongoi ak chatit ne kinamjin barak; inye ak weriguk, ak tibiguk che mi koboten: amu kagigon choto koek kebebertang’ung’, ak kebeberta ne bo weriguk, eng’ tiseiywekab kagochinoik che bo kalyet che bo lagokab Israel.

15Ibu ichek chatit ne kinamjin barak ak tagatet ne kiongoi koboto kagochinoik che bunei mat che bo mwanik, si koongoi koek kagochinet ne kiongoi eng’ taitab Jehovah; yeityo kobunjin, ak weriguk, koek ng’atutiet ne wendi agoi koigeny; ko u ye king’at Jehovah.

16Ak kicheng’ Musa mising’ ng’ororiet ne bo kagochinetab tengekto, ak ogeero, kaga kebeel: ak kinerekyi anyun Eleasar ak Itamar, werikab Aron che king’et, kolenji,

17Amu nee si moam kagochinetab tengekto eng’ ole tilil, amu tilil mising’ kot, ak kagogonok inendet noto koib tengektab tuiyet, si koyai kagaigaet agobo ichek eng’ taitab Jehovah?

18Ogeero, ma kiib korotikyik kobwa ole itabanat orit: kaganyol oam eng’ ole tilil orit ko u ye kagang’atak.

19Ak kilenji Aron Musa, Keero, kaibu ra nyo kogoitoi kagochinennywa ne bo tengekto, ak kagochinenywa ne kibeelei eng’ taitab Jehovah; ak kagobwanja anyun tuguk che u chu: ak nda kaga am kagochinetab tengekto rani, ko tos, kata kararan eng’ taitab Jehovah?

20Ak ye kingogas Musa noto, komieit eng’ inendet.

← Chapter 9 Jump to: Chapter 11 →