Leviticus 21

Kalenjin Bible (BUKUIT NE TILIL)

← Chapter 20 Jump to: Chapter 22 →

1Ak kilenji Jehovah Musa, Mwachi tisiik werikab Aron, ilenji ichek, Amat komuruongei chi eng’ chi ne kame eng’ bikyik;

2kobate eng’ tilionutikyik che negit, kamet, ak kwandanyi, ak werinnyi, ak cheptanyi, ak ng’etab kamet;

3ak eng’ chepkamet ne bergeiya, ne bo tiliet ne negit, ne tom kotun chi, imuchi komuruongei amu chepkamet.

4Amat komuruongei, amu inendet ko chito ne toogunot eng’ bikyik, si maimuruongei.

5Amat koruaigei, amat kocher tabanwekab tamnokwak, anan kotil borwekwak.

6Egu che tililen eng’ Kamuktaindenywa, amat koreny kainetab Kamuktaindenywa; amu igoitoi ichek kagochinoik che bunei mat, che bo Jehovah, choto amitwogikab Kamuktaindenywa: egu anyun ichek che tililen amu noto.

7Amat kotun chepkugonio, anan ne muruon; amat kotun osotiot ne kion manong’otiondennyi: amu tilil inendet eng’ Kamuktaindennyi.

8Itilil inendet anyun amu noto; amu inendet ne igoitoi amitwogikab Kamuktaindeng’ung’; ingotililit anyun inendet eng’ inye: amu ane Jehovah ne atililok, ko a tilil.

9Ak ngomuruongei cheptab tisiindet age tugul, komuruongei inegei eng’ kugoinatet, ko kagomuruon kwandanyi: kebeelei eng’ ma.

10Ak inendet ne tisiindet ne o eng’ che tupcho, ne kigirong’ji mwaita ne kiilse metinnyi, ne kigitaban kolaach ngoroik, ko mat koyat metinnyi, anan kogerer ngoroikyik;

11anan kwo ole mitei musto, anan komuruongei amu kwandanyi anan kamet;

12amat komanda eng’ ole tilil, anan komuruon ole tilil ne bo Kamuktaindennyi; amu mi metinnyi mwaitab katabanet ne kiilse ne bo Kamuktaindennyi: a Jehovah.

13Ingotun anyun chepto ne bergeiya.

14Amat kotun mosok, anan ne kigeon, anan kobogorio ne muruon, anan chepkugonio: ago ingotun bergeiyat eng’ bikyik.

15Amat konyerat iyotennyi eng’ bikyik: amu a Jehovah ne atilili inendet.

16Ak king’alalji Jehovah Musa kolenji,

17Mwachi Aron, ilenji, Amat korikta koipchi Kamuktaindennyi amitwogikyik, chi age tugul eng’ iyoteng’ung’ ne ma libwob, eng’ ibinwekwak tugul.

18Amu mariktoi chi age tugul ne ma libwob, ne korat, anan ne ing’wali, anan ne tinyei serut ne lebel, anan ne kigotesak kiy age tugul eng’ bortanyi,

19anan ne kiil keldo, anan ne kiil eut,

20anan ne kibalbut, anan ne kiring’ak bortanyi, anan ne tinyei teta eng’ konda, anan ne tinyei kochek, anan ne tinyei mook che kigoyaamnyo, anan ne kigoyesio kitikyik;

21amat korikta chi ne ma libwob ne bo lagokab Aron tisiindet, kwo kogoito kagochinoikab Jehovah, che bunei mat; amu ma libwob; marigu nyo kogoitoi amitwogikab Kamuktaindennyi.

22Amei inendet amitwogikab Kamuktaindennyi choto tililen mising’, ak eng’ choto tililen.

23Ago mawendi inendet anget orit ne kigioiye got, anan korikyi kapkorosut, amu ma libwob; si mat komuruon oldinwekyuk che tililen: amu ane Jehovah ne atabani oldinwechoto.

24Ak kimwachi Musa ko u noto Aron ak werikyik, ak lagokab Israel tugul.

← Chapter 20 Jump to: Chapter 22 →