Leviticus 22

Kalenjin Bible (BUKUIT NE TILIL)

← Chapter 21 Jump to: Chapter 23 →

1Ak kimwachi Jehovah Musa kolenji,

2Ilenji Aron ak werikyik, kotabanegei tuguk che tililen che bo lagokab Israel, che itabanwa, si mareny kainennyu ne tilil: a Jehovah.

3Ilenji, King’etoi eng’ tainnyu chi age tugul ne bo iyoteng’wong’ tugul eng’ ibinekwok tugul, ne rikyin tuguk che tililen, che itabanjin lagokab Israel Jehovah, kotinyei muruonindanyi: a Jehovah.

4Amat koam tuguk che tililen chi age tugul eng’ lagokab Aron ne tinyei mogondos, anan ne tinyei ole mandae tugun, agoi kotililit. Ak age tugul ne twaei ne kigonyor simwo amu musto, anan chito ne mandae keswekab iyotet;

5anan age tugul ne twaei ne ichuutegei ng’ony, ne ing’waniti chi, anan chi ne imuchi kong’wanit inendet, eng’ muruonindo age tugul ne tinyei;

6ng’wanitu agoi koimen ne twaei age eng’ choto, ak maamei tuguk che tililen, ngot ko tom koungei.

7Ak koanyinyit, ko karorokto asis; ak yeityo koam tuguk che tililen, amu amitwogikyik choto.

8Amat koam banyekab tiong’ik che begu ichegei, anan che tonatoni tiong’ik, si mat kong’wanitgei eng’ choto: a Jehovah.

9Ribei anyun kotigonutikyuk, si manam ichek tengektab tuguchoto, ak kobekyi tuguchoto ngo reny: ane Jehovah ne atabani ichek.

10Maamei kipsagarin age tugul tuguk che tililen: maamei bunotyot ne bo tisiindet, anan otwogindet ne nyoru melekto,

11ago ngo al tisiindet chi, koale siling’isiekyik, koamei noto tuguchoto; ak che kisikyin gonnyi, amei choto amitwogikyik.

12Ak ngotun cheptab tisiindet kipsagarin, ko maamei cheboto kagochinet ne kinamjin barak, ne bo tuguk che tililen.

13Ago ngo mosok cheptab tisiindet, anan ngo kion manong’otiot, ama sich lakwa, ak koweektagei gotab kwandanyi: ko u ye kita koming’in, koamei inendet amitwogikab kwandanyi: ago maamei kipsagarindet age tugul choto.

14Ak ngo am chi age tugul tuguk che tililen ama nai, kotesyin choto anyun kebebertab mut, ak kogochi tisiindet kioto tilil.

15Amat koreny tuguk che tililen che bo lagokab Israel, che igochin Jehovah;

16si konyor ng’ogisto, ye amei tugukwak che tililen: amu ane Jehovah ne atilili ichek.

17Ak king’alalji Jehovah Musa kolenji,

18Mwachi Aron, ak werikyik, ak lagokab Israel tugul, ilenji ichek, Age tugul ne bo gotab Israel, anan che bunotik eng’ Israel, ne igoitoi kagochinennyi, ngo bo kagochinonoto age tugul eng’ arorutikwak, anan ko age tugul eng’ kagochinoikwak che bo chamnyet ne igochin Jehovah koek kagochinet ne kibeelei;

19si kobiit ketaachak, ogoitoi kagochinet ne kirgit ne libwob eng’ tuga, anan eng’ kechirek, anan eng’ ng’ororek.

20Ago amat ogoite ne ma libwob; amu magitaachei noto agobo okwek.

21Ak chi age tugul ne igoitoi tiseiywot ne bo kagochinoikab kalyet kogochin Jehovah, si kobiit koyai kosulda noto ne kiga koaror, anan kagochinetab chamnyet, ne bo tuga, anan ko ne bo kechirek, kanyol koek ne igesunotgei si kobiit ketaach; ne mabiitune berutiet age tugul.

22Amat ogochi Jehovah chu: ne korat, anan ne kigoil, anan ne kigonyor berut, anan ne rootei tugun, anan ne tinyei kochek, anan ne tinyei kacheet, amoyai koek kagochinet ne bunei mat eng’ kaptisisiet, kele kigochi Jehovah eng’ choto.

23Imuchi igoite koek kagochinetab chamnyet kirgit anan aruetab kechir ne tinyei tuguk che u kunduenik, anan kebeberta ne mami eng’ bortanyi; ago magitaachei ngo bo kit ne kigiaror.

24Amat ogochi Jehovah ne kigibir kitik, anan ne kigitui, anan ne kigong’etyo, anan ne kigitil; amat oyai ko u noto eng’ emeng’wong’.

25Amotaach eng’ eutab kipsagarin amitwogikab Kamuktaindeng’wong’, alak tugul eng’ chu, ole, si ogoite; amu mi ng’emisienywa ichek, tinyei berutik: magitaachei choto agobo okwek.

26Ak kimwachi Jehovah Musa kolenji,

27Ye kagii kirgit, anan kechiriet, anan ng’ororiet, kotebyei ak kamet betusiek tisab; ak eng’ betut ne bo sisiit ak kwo tai, ketaachei koek kagochinet ne bunei ma ne kigochin Jehovah.

28Amat oeny teta ne kotoy anan kechiriet ne kotoy, koboto moitanyi anan aruennyi betunak.

29Ak ye oeng’ji Jehovah tiseiywotab kongoi, oeng’ji si kobiit ketaachak.

30Kiamei eng’ betunoto; amotuuch kiy kot koeekyi: a Jehovah.

31Orib anyun ng’atutikyuk amu noto, ak oyai: a Jehovah.

32Amoreny kainennyu ne tilil; ago kitabana eng’ lagokab Israel: ane Jehovah ne atabanok,

33ne kiamutwak omong’une emetab Misri, si aek Kamuktaindeng’wong’: a Jehovah.

← Chapter 21 Jump to: Chapter 23 →