Leviticus 23

Kalenjin Bible (BUKUIT NE TILIL)

← Chapter 22 Jump to: Chapter 24 →

1Ak king’alalji Jehovah Musa kolenji,

2Mwachi lagokab Israel ilenji, Igorwekab Jehovah che kiging’at kele omwaite koek kayumosiekab ge che itabanotin, choto igorwekyuk che kiging’at.

3Kiyaei boisiet betusiek lo: ago betutab tisab ko sabato ne kimuung’e, kayumetab ge ne itabanat; amat oyai boisio age tugul: noto ko sabato eng’ Jehovah eng’ meng’otosiekwok tugul.

4Chu igorwekab Jehovah che kiging’at, kayumosiekab ge che itabanotin, che omwaitoi eng’ betusiekwak che kiging’at.

5Eng’ arawet ne bo tai, betutab taman ak ang’wan ne bo arawet, koskoleny, noto ko paska ne bo Jehovah.

6Egu igorta ne bo makatinik che ma kinde mermerek, eng’ Jehovah, eng’ betutab taman ak mut ne bo arawanato: oame makatinik che ma kinde mermerek betusiek tisab.

7Egu kayumetab ge ne itabanat eng’ betut ne bo tai: amat oyai boisio age tugul ne bo otwoknot.

8Ago ogoite kagochinet ne bunei mat ne kigochin Jehovah, eng’ betusiek tisab: egu kayumetab ge ne itabanat eng’ betut ne bo tisab; amat oyai boisio age tugul ne bo otwoknot eng’ betunoto.

9Ak king’alalji Jehovah Musa kolenji,

10Mwachi lagokab Israel, ilenji, Ye oit emet ne agonok, ak ogesisie eng’ oloto, eng’ yoto anyun oipchi tisiindet bek che togoanik che bo kesisieng’wong’:

11ak koongoi inendet bechato eng’ taitab Jehovah, si kobiit ketaach agobo okwek: ongoi tisiindet choto eng’ betut ne bo aeng’, ko kagobata sabato.

12Ak eng’ betunoto ongoi okwek bek, ogoite anyun mengit ne libwob ne masiirei kenyit agenge koek kagochinet ne kibeelei ne bo Jehovah.

13Ak egu kagochinennyi ne bo busiek kebeberwek aeng’ eng’ taman che bo epah che bo busiek che tambulul che kagiburukto mwaita, kagochinet ne bunei mat kigochin Jehovah, koek nyamdutiet ne anyiny; ak egu kagochinennyi ne kieei, divaik, che yamei kebeberta agenge eng’ ang’wan ne bo hin.

14Amat oam makatia, anan bek che kigelei, anan mesisek, agoi koit betunito, agoi oibu kagochinet ne bo Kamuktaindeng’wong’; ng’atutiet noto ne bo koigeny eng’ ibinwekwok tugul eng’ meng’otosiekwok tugul.

15Ak oiityige kong’eete betut ne bo aeng’ ko kagobata sabato, koboch betut ne kioibu bek che bo kagochinet ne kiongoi; egu sabatosiek tisab che nyiitotin:

16oiit betusiek konom agoi betut ne bo aeng’ ko kagobata sabato ne bo tisab; ak ogochi Jehovah kagochinet ne leel ne bo busiek.

17Oibu eng’ meng’otosiekwok makatinik aeng’ che kiongoi che yamei kebeberwek aeng’ che bo epah: egu busiek che tambulul, che kibeeldoi mermerek, koek tongoanik che bo Jehovah.

18Ak ogoite koboto makatinik arek tisab che libwoben che bo kechir che masiirei kenyit agenge, ak kirgit agenge ne neran, ak mengichik aeng’: egu kagochinet ne kibeelei, ne bo Jehovah, koboto kagochinenywa ne bo busiek, ak kagochinoikwak che kieei, kagochinet ne bunei mat, ne bo nyamdutiet ne anyiny eng’ Jehovah.

19Ak ogoite kwesta agenge koek kagochinetab tengekto, ak koek arek aeng’ che mengichik che masiirei kenyit agenge, kobunji tiseiywotab kagochinoik che bo kalyet.

20Ak koongoi tisiindet choto koboto makatinik che bo tongoanik koek kagochinet ne kiongoi eng’ taitab Jehovah, koboto mengichichoto aeng’: tililitu eng’ Jehovah amu tisiindet.

21Ak oititen eng’ betunoto; biitu kayumetab ge ne itabanat eng’ okwek: amat oyai boisio age tugul ne bo otwoknot: ng’atutiet noto ne bo koigeny eng’ meng’otosiekwok tugul eng’ ibinwekwok tugul.

22Ak ye ogesisie eng’ emeng’wong’, ko mat iges igesu luukwekab mbareng’ung’, anan iyumate turonikab kesisieng’ung’: bagakyi kibananok, ak che toek: a Jehovah Kamuktaindeng’wong’.

23Ak king’alalji Jehovah Musa kolenji,

24Mwachi lagokab Israel, ilenji, Egu kamuung’et eng’ okwek, eng’ arawetab tisab, eng’ betut ne bo tai ne bo arawanato, kabwatet ne bo kuutetab iriagok, kayumetab ge ne itabanat.

25Amat oyai boisio age tugul ne bo otwoknot: ak ogoite kagochinet ne bunei mat kigochin Jehovah.

26Ak kimwachi Jehovah Musa kolenji,

27Ago egu betutab kagaigaet eng’ betutab taman eng’ arawanito bo tisab: egu kayumetab ge ne itabanat eng’ okwek, ak oming’inge; ak ogoite kagochinet ne bunei mat ne kigochin Jehovah.

28Amat oyai boisio age tugul eng’ betunoto: amu betutab kagaigaet, si keyai kagaigaet amu okwek eng’ taitab Jehovah Kamuktaindeng’wong’.

29Amu chi age tugul ne maiming’inegei eng’ betunoto, king’etoi eng’ bikyik.

30Ak chi age tugul ne yaei boisiet age tugul eng’ betunoto, ang’eme chichoto aistoe bikyik.

31Amat oyai boisio age tugul: ng’atutiet nito eng’ ibinwekwok tugul eng’ meng’otosiekwok tugul.

32Egu sabato ne bo kamuung’et eng’ okwek, ak oming’inge: orib sabato neng’wong’ betut ne bo sogol ne bo arawet, koboch koskoleny agoi koskoleny.

33Ak king’alalji Jehovah Musa kolenji,

34Mwachi lagokab Israel, ilenji, Egu igortab keriosiek betusiek tisab eng’ Jehovah eng’ betutab taman ak mut ne bo arawanito bo tisab.

35Ak egu kayumetab ge ne itabanat eng’ betut ne bo tai: amat oyai boisio age tugul ne bo otwoknot.

36Ogoitoi kagochinet ne bunei mat, ne kigochin Jehovah, eng’ betusiek tisab: egu kayumetab ge ne itabanat eng’ okwek eng’ betut ne bo sisiit; ak ogoitoi kagochinet ne bunei mat, ne kigochin Jehovah: tuiyet ne bo kaming’inetab ge nito; amat oyai boisio age tugul ne bo otwoknot.

37Chu igorwekab Jehovah che kiging’at, che omwaitoi ole, kayumosiekab ge che itabanotin, si ogoite kagochinet ne bunei mat kigochin Jehovah, kagochinet ne kibeelei, ak kagochinet ne bo busiek, ak tiseiywot, ak kagochinoik che kieei, kagochinet age tugul eng’ betunnyi:

38che siirei sabatosiek che bo Jehovah, ak che siirei kagochinoikwok, ak che siirei che kioarorte tugul, ak che siirei kagochinoikwok tugul che bo chamnyet, che ogochini Jehovah.

39Ago ye kaoyum ruratetab emet, eng’ betutab taman ak mut, ne bo arawetab tisab, orib koek igortab Jehovah eng’ betusiek tisab: kitere kamuung’et eng’ betut ne bo tai, ak kitere kamuung’et eng’ betut ne bo sisiit.

40Ak obutyige eng’ betut ne bo tai logoekab ketik che kororon, temenikab tironik, ak temenikab ketik che nyigisen, ak ketik che bitie kererusiek; ak oboiboitu eng’ taitab Jehovah Kamuktaindeng’wong’ eng’ betusiek tisab.

41Ak orib noto koek igortab Jehovah eng’ betusiek tisab eng’ kenyit: ng’atutiet noto ne bo koigeny eng’ ibinwekwok: orib anyun igorato eng’ arawetab tisab.

42Omenye keriosiek betusiek tisab; menyei keriosiechoto, tugul che salu Israel:

43si kobiit konai ibinwekwok che biitu let kole, kiagochi lagokab Israel komeny keriosiek, ye kiamutu ichek komong’une emetab Misri: A Jehovah Kamuktaindeng’wong’.

44Kimwachi anyun Musa lagokab Israel igorwekab Jehovah che kiging’at.

← Chapter 22 Jump to: Chapter 24 →