Leviticus 24

Kalenjin Bible (BUKUIT NE TILIL)

← Chapter 23 Jump to: Chapter 25 →

1Ak kimwachi Jehovah Musa kolenji,

2Ng’at lagokab Israel koibun mwanikab emitik che tililen che kigitui agobo lapkeiyet, si kolaal tait kotugul.

3Chobei Aron tait eng’ sang’utab anget ne kigioiye got, ne bo baornatet, eng’ emait ne kituiyechin, kong’eete koskoleny agoi karon kotugul eng’ taitab Jehovah: egu ng’atutiet ne bo koigeny eng’ ibinwekwok tugul.

4Chobei inendet taisiek eng’ keldab tait ne tilil eng’ taitab Jehovah kotugul.

5Ak inemu busiek che tambulul, ak iwatan makatinik che mengechen, che bo busiechato, taman ak aeng’: yamei makatiat agenge kebeberwek aeng’ eng’ taman che bo epah.

6Ak itet koek ortinwek aeng’, bendi lo oret agenge, kobendi age lo, eng’ meset ne tilil eng’ taitab Jehovah.

7Ak inde oret age tugul tuguk che tililen che nyamdut, si kobiit koek kabwatet eng’ makatinichoto, kagochinet ne bunei mat ne kigochin Jehovah.

8Tetei inendet kioto eng’ sabato age tugul eng’ taitab Jehovah; noto ko amu lagokab Israel, kayomiset ne bo koigeny.

9Bunjin Aron ak werikyik; ak amei eng’ ole tilil: amu tilil mising’ eng’ inendet eng’ kagochinoik che bunei mat che bo Jehovah eng’ ng’atutiet ne bo koigeny.

10Ak kimanda oldab lagokab Israel weritab kobogoriotab Israel, ne ki Misrindet kwandanyi: ak kiborio weroto bo kobogoriotab Israel ak chitab Israel eng’ nganaset;

11ak kichub Kainet weroto bo kobogoriotab Israel, ak kisas; ak kiimut ichek inendet kwo ole mi Musa. Ak kigiguure kainetab kamet Selomit, cheptab Dibri, ne bo oretab Dan.

12Ak kigiger, si kobiit kogas ichek kit ne bunu kutitab Jehovah.

13Ak kimwachi Jehovah Musa kolenji,

14Imoong’u inendet ne kosasis kwo sang’utab nganaset; ak ingogonoor eunekwak metinnyi ichek tugul che kogasei kosasisiei, ak kolage koik tuiyet komugul inendet.

15Ak imwachi lagokab Israel, ilenji, Ibei tengektanyi age tugul ne sasei Kamuktaindennyi.

16Ak inendet ne chubei kainetab Jehovah kebarei iman; lage koik iman tuiyet komugul chichoto; ngo bunotyo, anan ne kisikyin ga, kibarei ye kachub kainet.

17Kibarei iman chi age tugul ne barei chito age;

18ak igeeri age inendet ne kabar ne bo akwet: sobondo eng’ sobondo.

19Ak ngonde chito berut chitab kokwennyi; ko u ye kiyai, kiyachin ko u noto;

20moet eng’ moet, konda eng’ konda, keldet eng’ keldet; ko u ye kagonde chito age berutiet, kigeerjin ko u noto agine.

21Ak inendet ne barei ne bo akwet kogeeri age: ak kebarei chito ne barei chi.

22Egu agenge ng’atutieng’wong’, kergeitu ne bunotyo ak ne salwok: amu a Jehovah Kamuktaindeng’wong’.

23Ak king’alalji Musa lagokab Israel, ak kiimut ichek chichoto kisasisiei kwo sang’utab nganaset, ak kelage inendet koik. Kiyai anyun lagokab Israel kou ye king’at Jehovah Musa.

← Chapter 23 Jump to: Chapter 25 →