Leviticus 16

Kalenjin Bible (BUKUIT NE TILIL)

← Chapter 15 Jump to: Chapter 17 →

1Ak king’alalji Jehovah Musa, kingobata meetab werik aeng’ che bo Aron, ye kingorikyi taitab Jehovah, ak kobek;

2ak kilenji Jehovah Musa, Mwachi Aron ng’etab komet, si manyonei atkai tugul ole tilil orit ne bo anget ne kigioiye got, eng’ taitab keruetab rirenet ne mi moinget barak; si mame: amu among’u eng’ boldet eng’ baragutab keruetab rirenet.

3Nyonei Aron ole tilil ak chu: kirgit ne neran kobunji kagochinetab tengekto, ak mengit kobunji kagochinet ne kibeelei.

4Ingolaach ngoriet ne koi ne itabanat ne bo katanit, ak ingolaach sirualisiek che bo katanit, ak korategei birenet ne bo katanit ak kilaakyi chepkulet ne bo katanit: choto ngoroik che itabanotin; ak iuni bortanyi eng’ beek, si kolaachi ngoroichoto.

5Ak koget eng’ tuiyetab lagokab Israel kwesik aeng’ kobunji kagochinetab tengekto, ak mengit agenge kobunji kagochinet ne kibeelei.

6Ak kogoito Aron kirgit kai, ni ko bo kagochinetab tengekto, ne nenyi inegei, ak koyachjigei kagaigaet, ak gonnyi.

7Ak kokweri kwesichoto aeng’, ak konde taitab Jehovah, eng’ kurgetab emait ne kituiyechin.

8Ak koser Aron barbarek agobo kwesichoto aeng’; bunjin age Jehovah, kobunjin age Asasel.

9Yeityo kogoito Aron kwesta ne kagobutyi barbariat, kobunji Jehovah, ak kogoito koek kagochinetab tengekto.

10Ago kwesta ne kagobutyi barbariat ne bo Asasel, kinde taitab Jehovah kosobei, si keyai kagaigaet agobo inendet, si keonda kwo surkwen kobunji Asasel.

11Yeityo kogoito Aron eito ne bo kagochinetab tengekto, ne nenyi inegei, ak koyachigei kagaigaet, ak gonnyi, ak koeny kirgoto bo kagochinetab tengekto ne nenyi inegei;

12ak konem teret ne nyiitat ng’etetiot ne bunu matab kaptisisiet ne mi taitab Jehovah, ak ko nyiitat eunekyik nyamdutik che ng’uu ne anyiny che kigitui komengegitu, ak koib koba got ne bo orit, ne kigioiye anget.

13Ak konde inendet nyamdutik ma, eng’ taitab Jehovah si kobiit kotuch iyeto ne bo nyamdutik keruetab rirenet ne mi baragutab baornatet, si mame.

14Ak konem korotik alak che bo kirgoto, ak koise eng’ mornennyi keruetab rirenet ole tokyingei kong’asis; ak koisisie korotik eng’ taitab keruetab rirenet eng’ mornennyi konyil tisab.

15Yeityo koeny kwesta ne bo kagochinetab tengekto, ne bo bik, ak koib korotikab kweata koba got ne bo orit ne kigioiye anget; ak koyachi korotichoto kit ne koyachi korotik che bo kirgit, ak koise keruetab rirenet, ak taitab keruetab rirenet:

16ak koyai kagaigaet agobo ole tilil, amu muruonindab lagokab Israel, ak bistoenywa, agot tengekwogikwak tugul: ak koyachi ko u noto emait ne kituiyechin, ne meng’isiei koboto ichek eng’ kwenutab muruonindanywa.

17Amat kobiit chi ne mi emait ne kituiyechin, ye wendi tisiindet inendet si koyai kagaigaet eng’ ole tilil, agoi komong’ sang’, ko kagoyachigei kagaigaet, ak gonnyi, ak tuiyet komugul ne bo Israel.

18Yeityo komanda sang’, kwo ole mi kaptisisiet ne mi taitab Jehovah, ak koyai kagaigaet agobo noto; ak konam korotik alak che bo kirgit, ak che bo kwesta, ak koiile kuinoikab kaptisisiet komoswek tugul.

19Ak koise korotik kaptisisiet eng’ mornennyi konyil tisab, ak koanyiny, ak kotilil koistoe muruonindab lagokab Israel.

20Ak ye kagoges kagaigaetab ole tilil, ak emait ne kituiyechin, ak kaptisisiet, kogoito anyun kwesta ne sobei:

21ak kogonoor Aron eunekyik tuwai metitab kweata sobei, ak kong’any tengekwogik tugul che bo lagokab Israel, ak bistoenywa tugul, kong’ururi artanato; ak kogesenji choto metitab kweata, ak kogochi chito ne kagochopgei kokweri kwo surkwen:

22ak kogesen anyun kweata tengekwogikwak tugul koba emet ole mamenyei chi: ak kounda artet kwo eng’ oloto bo surkwen.

23Ak konyo Aron agoi emait ne kituiyechin, ak koreek ngoroikab katanit che kailaagoti inendet si kowendi ole tilil, ak kobagakta eng’ oloto:

24yeityo koungei eng’ komosta ne tilil, ak kolaach ngoroikyik, ak komong’ sang’, ak kogoito kagochinennyi ne kibeelei ak kagochinet ne kibeelei ne bo bik, ak koyachigei kagaigaet ak koyachi bik.

25Yeityo kobeel mwanik eng’ kaptisisiet, che bo kagochinetab tengekto.

26Ak mwetei ngoroikyik inendet ne kweriei kwesta ne bunjin Asasel, ak koungei, ak ye ibata konyo nganaset orit.

27Ak keib koba sang’utab nganaset kirgit ne bo kagochinetab tengekto, ak ng’ororiet ne bo kagochinetab tengekto che kagiib korotikwak si keyai kagaigaet eng’ ole tilil, ak kobeel muiywekwak eng’ ma, ak banyekwak, ak eiyandenywa.

28Ak mwetei ngoroikyik inendet ne kabeelei tuguchoto, ak koungei, ak ye ibata, konyo nganaset orit.

29Ak bunjin koigeny konetisioni eng’ okwek: oming’inge eng’ arawetab tisab, eng’ betutab taman ne bo arawanato, amat oyai boisiet age tugul, inendet ne kisikyin ga, anan bunotyot ne mi kobotok:

30amu kiyaiywok kagaigaet betunoto, kitililok; ak otililitu anyun eng’ tengekwogikwok eng’ taitab Jehovah.

31Betunoto ko sabato ne bo kamuung’et eng’ okwek, ak oming’inigei; nito ng’atutiet ne bo koigeny.

32Ak koyai kagaigaet tisiindet ne kiili, ne kitororjin boisietab tililindo, ne igeeri kwandanyi, ak kolaach ngoroikab katanit, ngoroichoto itabanotin:

33ak koyai kagaigaet agobo got ne tilil, ak koyai kagaigaet agobo emait ne kituiyechin ak kaptisisiet; ak koyai kagaigaet agobo tisiik ak bik tugul che bo tuiyet.

34Ak egu nito ng’atutiet ne bo koigeny eng’ okwek, keyai kagaigaet agobo lagokab Israel konyil agenge eng’ kenyit, amu tengekwogikwak tugul. Kiyai anyun inendet ko u ye king’at Jehovah Musa.

← Chapter 15 Jump to: Chapter 17 →