Leviticus 25 — Kalenjin Bible (BUKUIT NE TILIL)

6Ak egu sabatonoto bo emet amitwogikwok; cheguk, ak ko bo otwogindeng’ung’, ak otwogindeng’ung’ ne tie, ak kobo otwigindet ne nyoru melekto ak bunotyot ne mi koboten:

7ak ko bo tuguk, ak tiong’ik che mi emeng’ung’, egu ruratennyi tugul amitwogikwak.

8Ak iityigei sabatosiek tisab che bo kenyisiek, choto ko kenyisiek tisab konyil tisab; ak koek eng’ inye betusiekab sabatosiek tisab che bo kenyisiek, choto ko kenyisiek artam ak sogol.

9Yeityo iguut iriaget ne cheei mising’, eng’ betutab taman eng’ arawetab tisab; oguute iriaget koyom emeng’wong’ komugul eng’ betutab kagaigaet.

10Ak otaban kenyit ne bo konom, ak omwaite eng’ emet komugul katiagetab tugul che meng’isiei: egu jubilii eng’ okwek; ak wendi chi tugul ole ki nenyi, ak koweekyigei chi tugul oldab bikyik.

11Egu jubilii eng’ okwek kenyinoto bo konom: amogolse, amat oges kolgeinik eng’ oloto, amat obut logoekab ketik che ma kisabor.

12Amu jubilii; egu ne tilil eng’ okwek: oame ruratennyi che bunu mbar.

13Ak oweekyigei chi tugul ole ki nenyi eng’ kenyini bo jubilii.

14Ak ngialdochi kiy chitab kokweng’ung’, anan ngial kiy eng’ chitab kokweng’ung’, ko mat oyachigei ne ya, okwege eng’ okwege.

15Iale chitab kokweng’ung’ ne yamegei ak koitetab kenyisiek, ko kagobata jubilii, ak ingoaldaun che yamegei ak koitetab kenyisiek che bo kesisiet.

16Itese alyennyi ko u chang’indab kenyisiek; ak ichuchuch alyennyi ko u ng’ering’indab kenyisiek; amu aldaun ne yamegei ak kesisiet.

17Ago amoyachigei ne ya, okwege eng’ okwege; ago iywei Kamuktaindeng’ung’: amu a Jehovah Kamuktaindeng’wong’.

18Amu noto anyun oyai ng’atutikyuk, ak orib kiruogutikyuk ak oyai; si omeny emet eng’ kalyet.

19Ak koi emet logoek ak oam obiye, ak omeny oloto eng’ kalyet.

20Ak ngot ole, Kiame nee eng’ kenyitab tisab? Ogeero, magigolsei, ama kigese tugukyok:

21yeityo ang’at anyun berurtanyu eng’ okwek eng’ kenyit ne bo lo, ak korurio che yamei kenyisiek somok.

22Ak ogolse eng’ kenyitab sisiit, ak oame logoek che konorotin che bo keny; agoi kenyitab sogol, agoi korurio kogeny, oame che bo keny.

23Ak magialdoi emonoto agoi; amu nenyu emet: amu o toek kobota eng’ emonoto ak o kiprutoinik kobota.

24Ak ogoite katiaget ne bo emet, eng’ emeng’wong’ komugul.

25Ak ngoek banan ne otupche, ak koalda kebebertab oldanyi, konyo anyun ne tiliennyi ne negit, konyo kotiach noto kialda tupchennyi.

26Ak ngo matinyei chito chi ne itiachi, ak kagoek magorio, ak kotinyei che yamei kotiage;

27ingoiit kanyun kenyisiek koboch ngab koalda, ak koweekyi chito ne kiga aldochi, che kang’etune: yeityo koweekyigei oloto ki nenyi.

28Ago ngo maimuch kotiakyigei, kotebe noto eutab inendet ne kiga al, agoi koit kenyitab jubilii, ak komanda koronoto eng’ eunnyi kenyitab jubilii, ak kobunji chichoto ki bo.

29Ak ngo alda chi got ne kimenyei ne mi nganaset ne kigiyieme irimet, komuchi kotiach eng’ kenyit ne isubi noto kialdae; kichamjin kotiach eng’ kenyinoto komugul.

30Ak ngo ma kitiach eng’ kenyinoto komugul, kobunji goyoto mitei nganaset ne kiging’ot, inendet ne kialei, agoi, eng’ ibinwekyik tugul: magitiachi noto eng’ kenyitab jubilii.

31Ago kiiti gorik che mi nganasok che ma kiyieme irimet, kogergeit ak mbarenik che bo emet: kimuchi kitiach choto, mandoi choto eng’ kenyitab jubilii.

32Ago imuchi Lawik kotiach nganasokwak, ak gorik che mi nganasok che chechuak, eng’ betut age tugul.

33Ak ngotiach chito age ne bo Lawik, komandoi anyun goyoto kigialda, koboto nganaset ne nenyi, eng’ kenyitab jubilii: amu chechuaget gorik che mi nganasokab Lawik eng’ kwenutab lagokab Israel.

34Ago amat kealda emet ole agete tukwak che bo nganasokwak, amu chechuak agoi.

35Ak ngoek kibanania tupcheng’ung’, ama sich kiy ne toretegei: ko mie itoret anyun inendet: otebi tuwai ko u toondet anan bunotyot.

36Amat image inendet kelunet anan che tesotin: ago iywei Kamuktaindeng’ung’: si kotebi tupcheng’ung’ koboten.

37Amegochi siling’isieguk ile si inyorune che siirtoot, anan igochi amitwogiguk ile si kotesak.

38A Jehovah Kamuktaindeng’wong’, ne kiamutwak omong’une emetab Misri, si agonok emetab Kanan, ak aegu Kamuktaindeng’wong’.

39Ak ngoek kibanania tupcheng’ung’ ne mi koboten, ak kochamdagei ial inendet; ko megochi inendet kootin ko u otwogin:

40ingotebi koboten ko u otwogindet ne nyoru melekto anan ko u bunotyot; ak kootin agoi kenyitab jubilii:

41yeityo anyun komanda eng’ oldang’ung’, inendet koboto lagokyik, ak koweekyigei oldab bikab orenywa, koweekyigei ole mi tugukab kwanisiekyik.

42Amu ichek ko otwogikyuk, che kiamutu komong’une emetab Misri: magialdoi anyun icheget ko u otwogik.

43Amat ibou inendet eng’ kimnatet ne korom; ago iywei Kamuktaindeng’ung’.

44Ak eng’ ng’olyotab otwogiguk che murenik ak che tibik, che ta inyoru, che bo bororosiek che kiyiemak, oale choto.

45Ago oale eng’ lagokab bunotik che meng’isiei eng’ kwenung’wong’, ak eng’ bikwak che mi kobotok che kigisikyin emeng’wong’: egu ichek chekwoget.

46Ak oyai choto koek borotetab lagokwok, che biitu let, si konam kobunji; onyorune ichek otwogikwok agoi: ago amobou eng’ kimnatet ne korom tupchosiekwok, lagokab Israel, okwege eng’ okwege.

47Ak ngot koek magorio ne kipsagarin anan bunotyo ne mi koboten, ak konam bananda tupcheng’ung’ ne mi koboto inendet, ak kochamdagei koal kipsagarindonoto anan bunotyondonoto mi koboten, anan ne salu keswekab oret ne bo chichoto:

48kimuchi kitiach kogeny ye kagialda; imuchi kotiach age eng’ tupchosiekyik;

49imuchi kotiach inendet chitab orennyi, anan weritab ne bo orennyi, anan tiliet age tugul ne negit ne bo orennyi; anan ngoek magorio komuchi kotiagei.

50Ak koiit koboto chichoto kialei inendet koboch kenyit ne kialdaegei agoi kenyitab jubilii: ak kotenit che kigialdae inendet koitetab kenyisiek; tebyei koboto inendet che yamegei ak betusiekab otwogindet ne nyoru melekto eng’ otisiennyi.

51Ngo ta komi kenyisiek che chang’, koweekyi siling’isiek che yamei katiagennyi eng’ siling’isiek che kiga kiale inendet.

52Ak ngo ta komi kenyisiek che ng’ering’ kityo si koit kenyitab jubilii, koiit anyun tuwai; ak koweekyi siling’isiek che yamei kenyisiek che bo katiagennyi.

53Ak kotebi koboto inendet ko u otwogindet ne nyoru melekto eng’ kenyit agoi kenyit: amat koboi inendet eng’ kimnatet ne korom eng’ taing’ung’.

54Ak ngo ma kitiach chichoto eng’ ortinwechato, komanda anyun kwo eng’ kenyitab jubilii, inendet koboto lagokyik.

55Amu otwogikyuk lagokab Israel; icheget otwogikyuk che kiamutu komong’une emetab Misri. A Jehovah Kamuktaindeng’wong’.