Leviticus 13 — Kalenjin Bible (BUKUIT NE TILIL)

1Ak king’alalji Jehovah Musa ak Aron, kolenji,

2Ngobwa iririotab bortab chi, anan ngo biit moet ne kayaam, anan ole ibwanat ne u ngosiat, ak yeityo koek koroito ne bo mogondos eng’ iririotab bortanyi; kimut anyun kwo ole mi Aron tisiindet, anan ko age eng’ werikyik che tisiik:

3ak kogeer tisiindet koroyoto mitei iririotab borto: ak ngo kogowalak kororik che mi koroyoto koleelagitu, ak ngo kogororokto moanato kwo orit, ko kagoek koroito ne bo mogondos: ak kogeer tisiindet anyun inendet, ak komwaita kole muruon chichoto.

4Ak ngo leel ngosiat ne mi iririotab bortanyi, ak ma lolondoot, ak ngo mawalak kororikyik koleelagitu, kogerji ui anyun tisiindet eng’ betusiek tisab inendet ne tinyei koroyoto:

5ak kogeer tisiindet inendet eng’ betut ne bo tisab: ak ngo keer kole ta ko u yegonye koroyoto, ak ma konenderi eng’ iririot, kogerji ui anyun tisiindet inendet betusiek tisab alak:

6ak kogeer tisiindet inendet kogeny eng’ betut ne bo tisab: ak ngo machei kola, ak ma konenderi koroito eng’ iririot, komwaita anyun tisiindet kole, kagotililit chichi: kaga moet ne kayaam: ak komwet ngoroikyik, ak kotililit anyun.

7Ago ngonender moet eng’ iririot, ye kagoborjigei tisiindet eng’ betut ne bo katililennyi, koborjigei anyun tisiindet kogeny:

8ak kogeer tisiindet, ak ngo keer kole kagonender moet eng’ iririot, komwaita anyun tisiindet kole, Muruon chichi: mogondos chuto.

9Ye kagonam chito miandab mogondos, kimutyi anyun tisiindet,

10ak kogeer anyun tisiindet, ak ogeero, ngo leel ole ibwanat eng’ iririot, ak ngo kagowal kororik koleelagitu, ak kotook banyek ko u yegonye,

11ko mogondosik che kigoamei keny iririotab bortanyi, komwaita tisiindet kole, Muruon chichi: magerei tisiindet inendet; amu muruon.

12Ak ngo mong’une mogondosik ola tugul eng’ iririonnyi, ak koyom borto tugul ne bo inendet ne tinyei koroito, koboch metinnyi agoi kelyekyik, ne te ne imuchi kogeer tisiindet;

13kogeer anyun tisiindet; ak ogeero, ngo kogoyom mogondosik bortanyi tugul, komwaita anyun kole, Tilil chichi tinyei koroito; kogowalak borto tugul koleelit: tilil inendet.

14Ago eng’ betut ne katook banyek ko u yegonye, komuruonit anyun inendet.

15Ak kogeer tisiindet banyechato, ak komwaita kole, Muruon chichi; muruon borto; mogondos nito.

16Ak ngowalak banyek kogeny kowalogis koleelagitu, konyo anyun inendet ole mi tisiindet,

17ak kogeer tisiindet inendet: ak ogeero, ngo kagowalak koroito koleelit, komwaita anyun tisiindet kole, Tilil inendet ne tinyei koroito: tilil inendet.

18Ak ngo biitune iririotab borto ondiriet, ne kiga kosob,

19ak ngo biitune ole kami ondiriet, ole ibwanat ne leel, anan ngosiat ne toogu, ne leel, ne machei ko birir, koborji anyun tisiindet;

20ak kogeer tisiindet ak ogeero, ngo lolondoot eng’ borto, ak kowalak kororikyik koleelagitu, komwaita anyun tisiindet kole, Muruon inendet: nito koroito ne bo mogondos, kogomong’une ondiriet.

21Ak ngo keer tisiindet kole mami kororik che leelach, ama lolondoot eng’ iririot, ago ma toogu mising’, kogerji ui anyun tisiindet inendet betusiek tisab:

22ak ngonenderi eng’ iririot, komwaita anyun tisiindet kole, Muruon chichi: koroito nito.

23Ago ngo matesak ngosiandanato konender, ko kaga berutietab ondiriet; ak komwaita anyun tisiindet kole, Tilil chichi.

24Anan ye tinyei borto ole kolal eng’ iririot, ak kotook banyekyik eng’ oloto kalal, ko u yegonye, ak koigei yoto ngosiat ne leel ne birir anan ko ne leel;

25kogeer anyun tisiindet kioto: ak ngo kogowalak kororik koleelagitu, ak ko lolondoot; ko mogondosik noto, ne kogomong’une ole kolal: ak komwaita anyun tisiindet kole, Muruon chichi: koroito ne bo mogondos nito.

26Ago ngo keer tisiindet kole, mami kororik che leelach ngosiandanato, ak ma lolondoot eng’ iririot, ak ma toogu mising’; kogerji ui anyun tisiindet inendet betusiek tisab:

27ak kogeer tisiindet anyun inendet kogeny eng’ betut ne bo tisab: ak ngonenderi eng’ iririot, komwaita anyun tisiindet kole, Muruon chichi: nito koroito ne bo mogondos.

28Ak ngo matesak ngosiandanato konender eng’ iririot, ama toogu mising’; ko kabwanetab ole kolal, ak komwaita anyun tisiindet kole, Tilil chichi: amu berutietab ole kolal nito.

29Ak ye tinyei mureno anan kobogorio koroito eng’ metit anan ko eng’ tamnet,

30kogeer anyun tisiindet koroyoto: ak ngo keer ko lolondoot eng’ iririot, ak mitei kororiet ne talelio ak ko tenden, komwaita anyun tisiindet kole, Muruon chichi: moet nito ne u kacheet, mogondos nito ne bo metit anan ko tamnet.

31Ak ngo keer tisiindet moanato u kacheet, kole, ma lolondoot eng’ iririot, ama mi kororik che tuuen, kogerji ui anyun tisiindet betusiek tisab inendet ne tinyei koroyoto yaamei:

32ak kogeer tisiindet koroyoto eng’ betut ne bo tisab: ak ngo ma tesoksei moanato, ama mi kororik che talelionen, ak ngo ma lolondoot moanato eng’ iririot,

33kicherji anyun metit, ago maicheru inendet ole mi kacheet; ak koger tisiindet eng’ betusiek alak tisab chichoto tinyei kacheet:

34ak eng’ betut ne bo tisab kogeer tisiindet moanato: ak ngo ma tesoksei moet eng’ iririot, ama lolondoot eng’ yoto; komwaita anyun tisiindet kole, Tilil inendet: ak komwet ngoroikyik, ak kotililit.

35Ago ngo tesak moet eng’ iririot ko kagobata katililennyi;

36kogeer anyun tisiindet inendet: ak ogeero, ngo tesoksei moet eng’ iririot, ko macheng’ei anyun tisiindet kororik che talelionen, amu muruon inendet.

37Ago ngo keer kole ma tesoksei kachaanato, ak kole, kogobityo kororik che tuuen eng’ yoto; kagosob, kagotililit: ak komwaita tisiindet kole, Kagotililit.

38Ak ye tinyei mureno anan kobogorio ole ibwanat ne u ngosenik eng’ iririotab borwekwak, agot ngosenik che leelach;

39kogeer anyun tisiindet: ak ogeero, ngo ma leelachen mising’ ngosenichato eng’ iririotab borwekwak; ko kaga tisonok kityo che komong’une iririot; tilil inendet.

40Ak ngo chur metitab chi, ko chi ne bo bosta; tilil inendet.

41Ago ngo chur metit ole bo togoch, kotinyei bosta eng’ togoch; ko tilil inendet.

42Ago ngo mitei miando ne iboru leelindo ne birir eng’ bosta anan eng’ togoch; noto ko mogondosik che komong’une bostanyi anan ko togennyi.

43Kogeer anyun tisiindet inendet: ak ogeero, ngo leel ne birir miando ne ibwanat eng’ bostanyi, anan ko eng’ togennyi, ko u ye toogu mogondosik eng’ iririotab borto;

44inendet ko chi ne bo mogondos, muruon: mwaitoi anyun tisiindet kole, Muruon chichi: mi koroito metinnyi.

45Kibetei ngoroikab ne amei mogondosik, chichoto tinyei koroito, ak kiyatei metinnyi, ak kotuch kutit ne bo barak, ak koboloti kolen, A ng’wan, a ng’wan.

46Muruonitu inendet betusiek tugul kote koamei mianoto; muruon inendet: ak komeng’is inegei; mi sang’utab nganaset meng’otennyi.

47Kiborjin tisiindet ngoriet ne mi koroitab mogondosik, agot ngo bo ngorionoto kororikab kechirek, anan ngo bo katanit:

48anan ngo mitune usisiek che kigitoor anan che kigimur; che bo katanit, anan ngo che bo kororikab kechirek; ngo mitei magatet, anan eng’ kiy age tugul ne kiyae magatet;

49ngo machei konyalil anan ngo machei kobirir koroyoto eng’ ngoriet, anan eng’ magatet, anan eng’ usisiek che kigitoore anan che kigimure, anan eng’ kiy age tugul ne kigiyae magatet; nito koroito ne bo mogondos.

50Ak kogeer tisiindet koroyoto, ak kogonor kioto tinyei koroito eng’ betusiek tisab:

51ak kogeer koroyoto eng’ betut ne bo tisab: ngonenderi koroito eng’ ngoriet, ngo mitune usisiek che kigitoore anan che kigimure, anan eng’ magatet ne kiboisie eng’ kiy age tugul; ko mogondosik che ng’emisiei; ng’wan kioto.

52Ak ingobeel ngorionoto anyun, ngo bo usisiek che kigitoor anan che kigimur, ngo che bo kororikab kechirek anan ngo che bo katanit, anan kiy age tugul ne bo magatet, ne tinyei koroito: amu noto ko mogondosik che ng’emisiei; kibeelei eng’ ma.

53Ak ngo keer tisiindet kole ma tesoksei koroyoto eng’ ngoriet, ngo eng’ usisiek che kigitoor anan che kigimur, anan eng’ kiy age tugul ne bo magatet;

54kong’at anyun tisiindet kole, kemwet kioto tinyei koroito, ak kogonor kioto eng’ betusiek tisab alak:

55ak kogeer tisiindet, ko kagiundo koroyoto: ak ngo mawalak koroyoto eng’ saleiywekyik, amainenderi koroyoto, ko ng’wan anyun; ibeel eng’ ma: ng’emindet noto, ngo mitune churatet orit anan sang’.

56Ak ngo keer tisiindet kole ma kotoogu komie koroyoto ko kagemwet, kogerer ole mi koroyoto, koisto eng’ ngoriet anan eng’ magatet, anan eng’ usisiek che kigitoore anan che kigimure;

57ak ngo ta ko toogu eng’ ngoriet, eng’ usisiek che kigitoore anan che kigimure, anan eng’ kiy age tugul ne bo magatet, ko koroito ne inenderi: beel anyun kioto tinyei koroito, eng’ ma.

58Ak ngo kogobagakta koroito ngoriet, ngo ne bo usisiek che kigitoor anan che kigimur, anan kiy age tugul ne bo magatet ne imwete, kemwet anyun ne bo aeng’, ak kotililit.

59Nito ng’atutiet ne bo koroitab mogondosik ne mi ngorietab kororikab kechirek anan ko ne bo katanit, anan eng’ usisiek che kigitoore anan che kigimure, anan eng’ kiy age tugul ne bo magatet, komwaita anyun kole tilil, anan komwaita kole ng’wan.