Leviticus 14 — Kalenjin Bible (BUKUIT NE TILIL)

4kong’at anyun tisiindet kole, keib taritik aeng’ che tililen che soptos agobo inendet ne kitilili, ak ketitab taragonik, ak ngoriet ne birir, ak husop:

5ak kong’at tisiindet kole kobar taritiet age eng’ teret ne bo ng’ung’unyek, eng’ baragutab beek che rootei:

6ak konam tisiindet taritiet ne sobei, ak ketitab taragonik, ak ngoriet ne birir, ak husop, ak korooch choto tugul koboto taritiet ne sobei, korotikab taritianato kagibar eng’ baragutab beek che rootei:

7ak koise inendet ne kitilili eng’ mogondosik konyil tisab, ak komwaita kole, Tilil, ak kounda taritianato sobei kwo kewanin.

8Ak komwet ngoroikyik chichoto kitilili, ak konem sumeekyik tugul, ak koungei eng’ beek, ak kotililit: ak ye ibata noto konyo nganaset orit, ak kotebe sang’utab emainnyi betusiek tisab.

9Ak eng’ betutab tisab konem sumeekyik tugul eng’ metinnyi ak tamnennyi ak kororikab konyek, inemu agot kororikyik tugul: ak komwet ngoroikyik, ak koungei ak kotililit.

10Ak konam eng’ betut ne bo sisiit arek aeng’ che mengichik che libwoben, ak aruetab kechir, subendo ne libwob, ne masiirei kenyit agenge, ak kebeberwek somok eng’ taman che bo epah agenge che bo busiek che tambulul, koek kagochinetab busiek, che kigiburukto mwaita, ak tabet ne ming’in ne bo mwaita.

11Ak kogoito tisiindet ne itilili inendet, chichoto kitilili ak tuguchoto, eng’ taitab Jehovah, eng’ kurgetab emait ne kituiyechin:

12ak konam tisiindet mengit agenge eng’ arechato bo kechir, ak kogoito koek kagochinetab chalwokto, koboto tabet ne ming’in ne bo mwaita, ak koongoi tuguchoto koek kagochinet ne kiongoi eng’ taitab Jehovah:

13ak koeny mengoto ming’in eng’ komosta ne kieng’e kagochinetab tengekto ak kagochinet ne kibeelei, eng’ ole tilil; amu ko u ye bunjin kagochinetab tengekto tisiindet, ko u noto bunjin inendet kagochinetab chalwokto: tilil mising’ kosiir:

14ak konam tisiindet korotik alak eng’ che bo kagochinetab chalwokto, ak konde tisiindet walitab itit ne bo tai ne bo inendet ne kitilili, ak eng’ mornet ne o ne bo eutab tai, ak eng’ mornet ne o ne bo keldanyi ne bo tai:

15yeityo konem tisiindet mwanik alak che mi tabet, ak korong’ji rubeitab eunnyi ne bo katam:

16ak korooch tisiindet mornennyi ne bo tai mwaata mi eunnyi ne bo katam, ak koisisie mwaata eng’ mornennyi eng’ taitab Jehovah konyil tisab;

17ak mwaita ne kang’etune eutab tisiindet konde walitab itit ne bo tai ne bo inendet ne kitilili, ak eng’ mornet ne o ne bo eunnyi ne bo tai, ak eng’ mornet ne o ne bo keldanyi ne bo tai, eng’ baragutab korotikab kagochinet ne bo chalwokto.

18Ak korong’ji mwaita ne kang’etune eutab tisiindet, metitab inendet ne kitilili: ak koyai tisiindet kagaigaet agobo inendet eng’ taitab Jehovah.

19Ak kogoito tisiindet kagochinetab tengekto, ak koyai kagaigaet agobo inendet ne kitilili amu muruonindanyi; yeityo koeny kagochinet ne kibeelei:

20ak kogoito kagochinetab busiek eng’ kaptisisiet: ak koyai tisiindet kagaigaet agobo inendet, ak kotililit.

21Ak ngo kibanania, ama imuchi konyor che yamegei ak kioto, kokweri anyun mengit agenge ne ming’in koek kagochinet ne bo chalwokto ne kiongoi, si koyai kagaigaet agobo inendet, ak kebeberta agenge eng’ taman ne bo epah agenge ne bo busiek che tambulul che kagiburukto mwaita koek kagochinetab busiek, ak tabet ne ming’in ne bo mwaita;

22ak cheptugenik aeng’, anan arek aeng’ che bo taritik, ko u ye imuchi konyor; ak kobunji age kagochinetab tengekto, ak kobunji age kagochinet ne kibeelei.

23Ak ingoipchi inendet tisiindet tuguchoto eng’ betut ne bo sisiit, kobunji katililennyi, eng’ kurgetab emait ne kituiyechin, eng’ taitab Jehovah.

24Ak konam tisiindet aruetab kechir ne bo kagochinetab chalwokto, ak tabetab mwaita, ak koongoi tisiindet choto eng’ taitab Jehovah koek kagochinet ne kiongoi:

25yeityo koeny aruanato bo kagochinetab chalwokto, ak ingoib tisiindet alak eng’ korotikab kagochinetab chalwokto, ak konde walitab itit ne bo tai ne bo inendet ne kitilili, ak eng’ mornet ne o ne bo eunnyi ne bo tai, ak eng’ mornet ne bo keldanyi ne bo tai:

26ak korong’ji tisiindet mwanik alak rubeitab eunnyi ne bo katam:

27ak koisisie tisiindet eng’ mornennyi ne bo tai mwanik alak che mi eunnyi ne bo katam konyil tisab eng’ taitab Jehovah:

28ak konde tisiindet mwanichoto alak che mi eunnyi, walitab ititab tai ne bo inendet ne kitilili, ak eng’ mornet ne o ne bo eunnyi ne bo tai, ak eng’ mornet ne o ne bo keldanyi ne bo tai, eng’ baragutab korotikab kagochinet ne bo chalwokto:

29ak korong’ji tisiindet mwanik che kang’etune eunnyi, metitab inendet ne kitilili, si koyai kagaigaet agobo inendet eng’ taitab Jehovah.

30Yeityo kogoito agenge eng’ cheptugenik, anan aruet agenge ne bo taritik, ko u ye imuchi konyor;

31agot ko u ye imuchi konyor, kobunji age kagochinetab tengekto, ak kobunji age kagochinet ne kibeelei, koboto kagochinetab busiek: ak koyai tisiindet kagaigaet agobo inendet ne kitilili eng’ taitab Jehovah.

32Nito ng’atutiet ne bo inendet ne mitei koroitab mogondosik orinnyi, ne maimuchi konyor che yamei kitilile.

33Ak kimwachi Jehovah Musa ak Aron, kolenji,

34Ye oit emetab Kanan, ne agonok kobunjok, ak ande koroitab mogondos got age eng’ emet ne bunjinok;

35konyo anyun chitab kobo goyoto konyo komwachi tisiindet, kolenji, Ageere ale mitei koroito got:

36kong’at anyun tisiindet kole, kimaanda tuguk tugul eng’ go, kotomo kwo go tisiindet kogeer koroyoto, si mang’wonegitu tuguk tugul che mi goyoto: ak yeityo anyun kwo go tisiindet kogeerot got:

37ak kogeer koroito, ak ngo mi koroito inatusiekab got, ak ngo mitoti kelongonik che machei ko nyalilen ak che machei ko biriren, ak ngo lolondootin kosiir totet;

38komanda anyun tisiindet eng’ goyoto agoi kurgat ak koger goyoto betusiek tisab:

39ak konyo tisiindet kogeny eng’ betut ne bo tisab, konyo kogeer: ak ngo keer ko tesoksei koroyoto eng’ inatusiekab got;

40kong’at anyun tisiindet, kicher koik che tinyei koroito, ak kewirji komosta ne ya eng’ sang’utab nganaset:

41ak kong’at inendet kole, keng’oing’oi got komoswek tugul eng’ got orit, ak kotumji bichoto tartarik che king’oing’oe goyoto sang’utab nganaset komosta ne ya:

42ak koib koik alak, konde ole kami koik chugai; ak konam inendet tartarik alak, komale got.

43Ak ngo mong’ koroito kogeny kotook eng’ got, ko kagoib koik koba sang’, ak ko kagong’oing’oi inendet got, ak ko kagemal;

44konyo anyun tisiindet go konyo kogeer, ak ngo katesak koroito eng’ got, ko mogondosik che ng’emisiei eng’ go: ng’wan anyun goyoto.

45Ingobut goyoto, koikyik, ak ketikyik, ak tartarik tugul che bo goyoto; ak koib choto koba komosta ne ya eng’ sang’utab nganaset.

46Ak kogeny, ngwo chi goyoto kota ko kerat got, kong’wanitu agoi koimen.

47Ak mwetei ngoroikyik ne karu goyoto; ak mwetei ngorikyik inendet ne kaamisie goyoto.

48Ak ngwo go tisiindet kogeer, ak ogeero, matesak koroito eng’ goyoto ko kagemal; komwaita anyun tisiindet kole, tilil got, amu kagosob got eng’ koroyoto.

49Ak konam inendet taritik aeng’, ak ketitab taragonik, ak ngoriet ne birir, ak husop, koanyinye got:

50ak kobar taritiet age eng’ teretab ng’ung’unyek eng’ baragutab beek che rootei:

51ak konam inendet ketitab taragonik, ak husop, ak ngoriet ne birir, koboto taritiet ne sobei, ak korooch tuguchoto korotikab taritiet ne kagebar, ak eng’ beek che rootei, ak koise got konyil tisab.

52Ak koanyiny got eng’ korotik che bo taritianato, ak eng’ beechoto rootei, ak eng’ taritianato sobei, ak eng’ ketitab taragonik, ak eng’ husop, ak eng’ ngoriet ne birir:

53ago ingounda anyun taritiet ne sobei kotiriren komanda eng’ nganaset kwo kewanin: koyai anyun ko u noto kagaigaet agobo got; ak kotililit.

54Ni ng’atutiet ne bo koroito age tugul ne bo mogondosik, ak ne bo kacheet,

55ak ne bo ngoriet ne tinyei mogondosik, ak ne bo got,

56ak ole ibwansei, ak ole yaamat moet, ak ole ibwanat ne u ngosiat;

57si kinet ye ng’wonen, ak ye tililen: nito ng’atutietab mogondosik.