Leviticus 11

Kalenjin Bible (BUKUIT NE TILIL)

← Chapter 10 Jump to: Chapter 12 →

1Ak king’alalji Jehovah Musa ak Aron, kolenji,

2Omwachi lagokab Israel, olenji, Chu tiong’ik che soptos che oame eng’ tiong’ik tugul che mitei ng’ony.

3Oame age tugul ne pcheotin siok, ak ko betotin komie, che itari baroi.

4Ago moame chu eng’ ichek che itari baroi anan eng’ ichek che pcheotin siok: tambesik, amu itari baroi ago ma pcheotin siok, ng’wan eng’ okwek noto.

5Ak keneriet, amu itari baroi ago ma pcheotin siok, ng’wan eng’ okwek noto.

6Ak kiblengwet, amu itari baroi ago ma pcheotin siok, ng’wan eng’ okwek noto.

7Ak toret, amu pcheotin siok, ak ko betotin, ago maitari baroi, ng’wan eng’ okwek noto.

8Amat oam banyekwak, amat otwa ne kome eng’ tiong’ichoto; ng’wonen eng’ okwek choto.

9Oame chu eng’ che mi beek: age tugul ne tinyei kebebaik ak berik eng’ beek, eng’ nyanjosiek, eng’ ainosiek, oame choto.

10Ak tugul che matinyei kebebaik ak berik eng’ nyanjosiek, ak eng’ ainosiek, ak tugul che bendote beek, ak tuguk tugul che soptos eng’ beek, tuguchoto ko che kiwechei eng’ okwek,

11ak ingoek choto che kiwechei eng’ okwek; amat oam banyekwak, ak egu che kiwechei che onyoru ko kabek eng’ tiong’ichoto.

12Age tugul ne matinyei kebebaik ak berik eng’ beek, egu noto ne kiwechei eng’ okwek.

13Ak owech chu eng’ taritik; magiamei chuto, kiwechei: kipsichit, ak motonda, ak chelogomiet;

14ak chesireret, ak keeret ak che kergei ak choto;

15ak chepkugit age tugul ak che kergei;

16ak tiondab songolik, ak keeretab kemoi, ak taritiet ne leel ne bo nyanjet, ak keeret age ak che kergei;

17ak sugurut ne ming’in, ak taritietab nyanjet, ak sugurut ne o;

18ak sugurut ne tinyei kuinoik, ak chebokibabaa, ak chepsengwet;

19ak kong’onyot, ak alak che kergei ak chelogomiet, ak chesululit, ak reresiet.

20Egu che kiwechei eng’ okwek tiong’ik tugul che tinyei kebebaik, che ing’onioti eng’ ng’ony.

21Ago omuchi oam chu, eng’ tiong’ik tugul che bo kebebaik che bendote kelyek ang’wan, che tinyei kelyek che koen che torombene;

22omuchi oam agot chu eng’ ichek; chereng’endet, ak alak che bo orennyi, ak talamwet ne kiguure kimekwan, ak che bo orennyi, ak keteriat, ak che bo orennyi, ak talamwet, ak che bo orennyi.

23Ago egu che kiwechei eng’ okwek alak tugul che tinyei kebebaik che ing’oniote kelyek ang’wan.

24Ak omuruonitu eng’ tuguchoto: muruonitu age tugul ne twaei bortab tionyoto kagome, agoi koimen:

25ak age tugul ne ibei kebebertab bortab tionyoto kagome, komwetei ngoroikyik, ak komuruonitu agoi koimen.

26Ng’wan eng’ okwek tiony age tugul ne pcheotin siok, ak ko ma betotin komie, ak ne maitari baroi: muruonitu age tugul ne twaei choto.

27Ak alak tugul che bendote mugungonikwak, eng’ tiong’ik tugul che bendote kelyek tugul ang’wan, ng’wonen choto eng’ okwek: muruonitu agoi koimen age tugul ne twaei bortab tionyoto kame.

28Ak ingomwet ngoroikyik ne ibei bortab tionyoto kame, ak komuruonitu agoi koimen; ng’wonen choto eng’ okwek.

29Ng’wonen eng’ okwek chu eng’ che ichuutegei ng’ony: kungundo, muriat ne ming’in, ak ne kergei ak mororochet,

30ak ne bo oretab chepswererit ak nyiritiet, ak chebenetiet, ak kimng’elyegut, ak bung’ung’wet.

31Chuto che ng’wonen eng’ okwek eng’ tugul che ichuutegei: muruonitu age tugul ne twaei ne kagome eng’ choto, agoi koimen.

32Ak ng’wanitu kiy age tugul ne ibutyin ne kagome eng’ choto, ngo kiy age tugul ne kigiyae ketik, anan ngor, anan mui, anan kuniet, kiy age tugul ne kiboisie, konyolu kirooch beek, ak ng’wanitu agoi koimen; yeityo anyun koanyinyit.

33Ak ng’wanitu kiy age tugul ne mi oritab teretab ng’ung’unyek, ne kagobutyi age eng’ tiong’ichoto; ak otui teronoto.

34Ak ng’wonegitu amitwogik alak tugul che kechobei eng’ beek: ak ng’wonegitu tuguk alak tugul che kieei che mi age tugul eng’ terenichoto.

35Ak ng’wanitu kiy age tugul ne ibutyin kebebertab borto ne bo tiondo ne kagome; ngo kapkoimaut, anan terenik; kituei choto: ng’wonen choto, ak kong’wonegitu choto eng’ okwek.

36Ago tililitu konda ne kutune beek anan keringet ne mi beek: ago muruonitu ne twaei bortab tiondo ne kame.

37Ak ngobutyi beny age tugul ne bo tionyoto kame, keswek che kigolei, ko anyinyen.

38Ago nginur keswechoto, ak kobutyi beny age tugul ne bo tiony ne kame, kong’wanitu eng’ okwek.

39Ak ngo me tiony age tugul ne oame: muruonitu inendet ne twaei bortab tionyoto, agoi koimen.

40Ak ingomwet ngoroikyik ne amei banyekab noto kame, ak komuruonitu agoi koimen: ak ingomwet ngoroik inendet ne ibei tionyoto kame, ak komuruonit agoi koimen.

41Egu eng’ okwek ne kiwechei kiy age tugul ne ichuutegei ng’ony; magiamei.

42Kiy age tugul ne ichuute moet ng’ony ak ne bunei kelyek ang’wan, ak age tugul ne tinyei kelyek che chang’, choto tugul che ichuutegei ng’ony, amoam choto; amu kiwechei.

43Amoegu che kiwechei eng’ kiy age tugul ne ichuutegei ng’ony, amomuruongei eng’ ichek, si kanamak muruonindo.

44Amu ane Jehovah Kamuktaindeng’wong’: otabange anyun, ak oegu che tililen; amu a tilil: amomuruongei eng’ kiy age tugul ne ichuutegei ng’ony.

45Amu ane Jehovah ne kiamutwak otogosu omong’une emetab Misri, si aek Kamuktaindeng’wong’: otililitu anyun, amu a tilil.

46Ni ng’atutiet anyun, ne bo tiong’ik, ak taritik, ak kiy age tugul ne sobei ne wendoti eng’ beek, ak kiy age tugul ne ichuutegei ng’ony;

47si kobiit kobesio che ng’wonen ak che ma ng’wonen, ak che soptos che kiamei ak che soptos che magiamei.

← Chapter 10 Jump to: Chapter 12 →