Leviticus 27

Kalenjin Bible (BUKUIT NE TILIL)

← Chapter 26 Jump to:

1Ak king’alalji Jehovah Musa kolenji,

2Mwachi lagokab Israel, ilenji ichek, Ye yaei chi kaarorunet, koek bik che bo Jehovah ko u koiteng’ung’.

3Itaune kamanutieng’ung’ ne irogendochini, murenik che bo kong’eete kenyisiek tiptem agoi che bo kenyisiek tamanwogik lo, ingoek kamanutieng’ung’ ne irogendochini, sekelisiek konom che bo feda, ko u sekel ne bo ole tilil.

4Ak ngo kobogorio, koegu kamanutieng’ung’ sekelisiek sosom.

5Ak ngitaune kenyisiek mut agoi kenyisiek tiptem, koegu anyun kamanutieng’ung’ sekelisiek tiptem eng’ muren ak koegu sekelisiek taman eng’ kobogorio.

6Ak ngitaune arawet agenge agoi kenyisiek mut, koegu anyun kamanutieng’ung’ sekelisiek mut che bo feda eng’ muren, ak koek kamanutieng’ung’ sekelisiek somok che bo feda eng’ ne tie.

7Ak ngitaune kenyisiek tamanwogik lo ak kwo tai; ngo muren, koegu kamanutieng’ung’ sekelisiek taman ak mut, ak kobogorio koegu sekelisiek taman.

8Ago ngo banan chichoto kosiir kamanutieng’ung’, kinde inendet taitab tisiindet, si komwa tisiindet che kimage; mwaei tisiindet che kimage chichoto kayai kaarorunet, kogoito ko u kamugennyi.

9Ak ngogoito bik kagochinet ne kigochin Jehovah, ngo ne bo akwet, tugul che bo choto che igochin chi Jehovah, ko tililen.

10Amat kowal, kowal ne ya ne mie, anan ne mie eng’ ne ya: ago ngot kowal tuguchoto bo akwet, kowale age age, ko tililen tuwai, noto ak ne kiwale.

11Ak ngo tiony age tugul ne ng’wan, ne magigoitoi koek kagochinet ne bo Jehovah, konde anyun tionyoto taitab tisiindet:

12ak koiit tisiindet anyun ole te, ngo mie anan ngo ya: ko u ye keiit inye, tisiindet, kotebyei ko u noto.

13Ago ngo machei iman kotiach tionyoto, kotesyi anyun kamanutiennyi kebeberta agenge eng’ mut.

14Ak ye itabani chi gonnyi koek ne tilil eng’ Jehovah, koiit anyun tisiindet, kogeer ngo mie anan ngo ya: ko u ye kaiit tisiindet, koteb ko u noto.

15Ak ngo machei kotiach gonnyi chichoto koitabani, kotes anyun kebeberta agenge eng’ mut ne bo siling’isiek che bo kamanutieng’ung’, si kobunji inendet got.

16Ak ngotabanji chi Jehovah kebebertab mbarennyi, kotenitu anyun kamanutieng’ung’ kolsetab mbaranato: kiiti kolsetab homer agenge ne bo sairi eng’ sekelisiek konom che bo feda.

17Ngotaban mbarennyi koboch kenyitab jubilii, kotebyei ko u kamanutieng’ung’ ne irogendochini.

18Ago ngotaban inendet mbarennyi ko kagosiirto jubilii, koiiti tisiindet anyun inendet siling’isiek ko u kenyisiek che kang’et agoi koit kenyitab jubilii, ak ketil eng’ kamanutieng’ung’.

19Ak ngotiach iman mbaret inendet ne kiitabani, kotesyi anyun kebeberta agenge eng’ mut ne bo siling’isiekab kamanutieng’ung’ ne irogendochini, ak kobunji inendet iman.

20Ak ngo maitiach inendet mbaranato, anan ngo kigoaldochi chito age mbaranato, ko magitiachi agoi:

21ago tililitu mbaranato eng’ Jehovah, ye mandoi eng’ jubilii, ko u mbaret ne kigitaban; bunjin tisiindet.

22Ak ngotabanji chichoto Jehovah mbaret ne kigoal, ne ma mbaret ne ki nenyi;

23koiityi anyun tisiindet inendet ole tenitu kamanutieng’ung’ agoi kenyitab jubilii: ak kogon inendet eng’ betunoto kamanutieng’ung’, koek kiy ne kigitabanji Jehovah.

24Kiweekyin mbaranato chito ne kigiale eng’ kenyitab jubilii, inendet ne ki nenyi mbaret.

25Ak u kamanutiguk tugul sekelisiek che bo ole tilil: tinyei sekel agenge gerahisiek tiptem.

26Che kitwatei eng’ che kiyagi, che kigiyai koek twateiywek che bunjin Jehovah, choto ichegei che maitabani chi; bo Jehovah ne kirgit anan ne kechiriet.

27Ak ngo bo tiong’ik che ng’wonen, kotiach anyun inendet ko u kamanutiet ne irogendochini, ak kotesyi kebeberta agenge eng’ mut ne bo noto: ak ngo magitiachi kealdoi ko u kamanutieng’ung’.

28Ago magialdoi, ama kitiachi kit ne itabanat, ne itabanjin chi Jehovah eng’ tugukyik tugul che tinyei, ngo bo chi anan tiony, anan ne bo mbaret ne nenyi: tilil mising’ eng’ Jehovah kiy age tugul ne kitabani.

29Magitiachi age tugul ne itabanat, ne itabani bik; kibarei noto iman.

30Bo Jehovah kebeberwekab taman che bo emet, ngo keswek che bo emet, anan logoekab ketik: itabanotin eng’ Jehovah.

31Ak ngo machei chi kotiach alak eng’ kebebertanyi ne bo taman, kotes kebeberta agenge eng’ mut.

32Kebeberwek tugul che bo taman che bo tuga anan nego, age tugul ne bunei kureretab kirokto, kitabanji Jehovah, ne bo taman eng’ choto.

33Amat kogilgilye ngo mie anan ngo ya, amat kowal; ak ngot kowal, kobunji Jehovah tuwai, noto ak ne kiwale; ama kitiachi.

34Chuto anyun ng’atutik che king’at Jehovah Musa agobo lagokab Israel eng’ tulwetab Sinai.

← Chapter 26 Jump to: