Revelation 18

Luganda (Luganda Bible 2003) (LB03)

← Chapter 17 Jump to: Chapter 19 →

1Ebyo bwe byaggwa, ne ndaba malayika omulala ng'akka ng'ava mu ggulu, ng'alina obuyinza bungi. Ekitiibwa kye ne kimulisa ensi.

2N'akoowoola n'eddoboozi ery'omwanguka nti: “Kigudde, Babilooni ekibuga ekinene kigudde! Kifuuse kisulo ky'emyoyo emibi; omukuŋŋaanira emyoyo emyonoonefu gyonna, lye kkuŋŋaaniro ly'ebinyonyi byonna ebibi era ebikyayibwa.

3Amawanga gonna gaatamiira omwenge ogw'obwenzi bwakyo. Bakabaka b'oku nsi baayenda nakyo, n'abasuubuzi b'oku nsi baagaggawalira ku kwejalabya kwakyo okuyitiridde.”

4Ate ne mpulira eddoboozi eddala eriva mu ggulu nga ligamba nti: “Abantu bange, mukiveemu, muleme okwetaba mu bibi byakyo n'okugabana ku bibonyoobonyo byakyo,

5kubanga ebibi byakyo bituuse mu ggulu, ne Katonda ajjukidde ebyonoono byakyo.

6Mukikole bye kyabakola. Ku bikolwa byakyo, mmwe musinzeewo emirundi ebiri. Ekikopo kye kyabatabulira mmwe mukikitabulire emirundi ebiri.

7Gye kyakomya okwegulumiza n'okwejalabya, gye muba mukomya okukibonyaabonya n'okukikaabya, kubanga kyewaana nti: ‘Ntudde nga kabaka, siri nnamwandu era siribonaabona n'akatono.’

8Ebibonyoobonyo byakyo: okufa, n'okunakuwala, n'enjala, kyebiriva bikijjira olunaku lumu era ne kyokebwa omuliro, kubanga Mukama Katonda akisalira omusango okukisinga, wa maanyi.”

9Bakabaka b'oku nsi abaayendanga nakyo ne babeera wamu nakyo mu by'amasanyu, bwe baliraba omukka gwakyo nga kyokebwa, balikikaabira ne bakikungubagira.

10Baliyimirira wala olw'okutya okubonaabona kwakyo, ne bagamba nti: “Zikusanze, zikusanze ggwe Babilooni ekibuga ekinene! Ggwe ekibuga eky'amaanyi, ozikiriziddwa mu ssaawa emu yokka!”

11Abasuubuzi b'oku nsi nabo bakikaabira ne banakuwala, kubanga tewakyali agula bintu byabwe.

12Tewakyali agula zaabu, ne ffeeza, n'amayinja ag'omuwendo, n'ago agayitibwa luulu; engoye eŋŋonvu eza kakobe, n'eza liiri, n'emmyufu; na buli muti ogw'akawoowo, na buli kintu eky'essanga, na buli kintu eky'omuti ogw'omuwendo ennyo; n'eky'ekikomo, n'eky'ekyuma, n'eky'amayinja amalungi.

13Era tewakyali agula bya kaloosa, n'ebirungo by'enva, n'obubaane, n'omuzigo ogw'akawoowo oguyitibwa mirra, n'envumbo; omwenge gw'emizabbibu, n'amafuta; obuwunga obukuŋŋuntiddwa obulungi, n'eŋŋaano; ente n'endiga, n'embalaasi n'ebigaali; abaddu n'abantu abanyagibwa mu lutalo.

14Abasuubuzi balikigamba nti: “Ebirungi byonna bye weegombanga okufuna bikufudde, ebyobugagga byonna n'ebyekitiibwa bikuweddeko, era tokyaddayo kubirabako n'akatono.”

15Abasuubuzi b'ebintu ebyo be kyagaggawaza, baliyimirira wala olw'okutya okubonaabona kwakyo, ne bakaaba era ne banakuwala,

16ne bagamba nti: “Zikisanze, zikisanze ekibuga ekyo ekinene, ekyayambalanga engoye eŋŋonvu, eza kakobe n'emmyufu; ne kitimbibwa zaabu n'amayinja ag'omuwendo, n'ago agayitibwa luulu.

17Kifiiriddwa obugagga obwo bwonna mu ssaawa emu yokka!” Abagoba b'amaato bonna, n'abasaabaze bonna, n'abalunnyanja, na bonna abasuubulira ku nnyanja, baayimirira wala

18bwe baalaba omukka gwakyo nga kiggya, ne baleekaana nga bagamba nti: “Tewabangawo kibuga ekyenkana kino obunene!”

19Ne beeyiira enfuufu mu mitwe, ne baleekaana nga bakaaba era nga bakungubaga, nga bagamba nti: “Zikisanze, zikisanze ekibuga ekinene era ekigagga ennyo, ekyagaggawalirwamu abalina amaato ku nnyanja. Kizikiriziddwa mu ssaawa emu yokka!

20Ggwe eggulu sanyuka, kubanga kizikiriziddwa! Mmwe abantu ba Katonda, nammwe abatume n'abalanzi, musanyuke, kubanga Katonda akisalidde omusango ne gukisinga, olw'ebyo bye kyakola!”

21Awo malayika ow'amaanyi n'asitula ejjinja eriri ng'olubengo olunene, n'alisuula mu nnyanja, ng'agamba nti: “Babilooni ekibuga ekinene bwe kirisuulibwa bwe kityo wansi n'amaanyi mangi, ne kitaddayo kulabibwa!

22Ennyimba z'abakubi b'ennanga, n'ez'abayimbi, n'ez'abafuuyi b'endere n'ab'eŋŋombe, tebiriddayo kuwulirwa mu ggwe, tewaliba mugezi mu mulimu na gumu aliddayo kulabika mu ggwe, wadde eddoboozi ly'olubengo okuddayo okuwulirwa mu ggwe.

23Ekitangaala ky'ettaala tekiriddayo kulabika mu ggwe, wadde eddoboozi ly'awasa omugole n'ery'omugole okuddayo okuwulirwa mu ggwe. Abasuubuzi bo baali bakulu nnyo mu nsi, era obulogo bwo bwalimbalimba amawanga gonna!”

24Mu kyo omusaayi gw'abalanzi, n'ogw'abantu ba Katonda, n'ogwa bonna abattibwa ku nsi, mwe gwasangibwa.

← Chapter 17 Jump to: Chapter 19 →