2 Kings 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Ahabuni drazuri ma vutia, Moabu mbu Israeli ma ruaasi amve.

2Te Ahazia eri e’de jo aliza uruleru erini Samariaari ma derisa talasi, eri ovu azoru ani; eri pe ojio ma ti, ’yozu yi tia kini, Emi mu, emi zi Baali-zebubu adrou Ekironiari ma tia, kani ma nga ati ra azo ’dorisi yani.

3Te malaika Yehovani ’yo Eliya ’ba Tisibini ma tia kini, Mi nga, mi mu uru dri fuzu ojio opi Samariaarini ’diyi be, mi ’yo yi tia kini, Emi mu Baali-zebubu adrou Ekironiari zizu, Munguni ovule aluni Israeli ma eselia kurisi ya?

4E’yo ’disi Yehova ’yo di, Mi ngani si va gbolo mini lazu driniariaku, te mi nga dra adaru. Te Eliya mu ra.

5Ojio ’diyi mvi opi vu, te eri ’yo yi tia, Emi emvi a’di e’yosi ya?

6Yi omvi eri tia, Agu alu emu uru dri fuzu ama be, ’yo ama tia, Emi mvi opi emi ti pepiri vu, emi ’yo eri tia, Yehova ’yo ’dini, Mi pe ’ba ti Baali-zebubu adrou Ekironiari zizu, Munguni ovule aluni Israeli ma eselia kurisi ya? E’yo ’disi mi ngani si va gbolo mini lazu driniaria ku, te mi nga dra adaru.

7Eri ’yo yi tia, Agu nde emupi dri fupi emi be, ’yopi emi tiari, eri agu ngonile ya?

8Yi omvi eri tia kini, Afa suza erini ovu edezaru anyapa ’bikosi, azini eri su enyiriko opilia. Eri ’yo ra, Eri Eliya ’ba Tisibiniri’i.

9Opi nga di ambo asikari kali towi driliari ma ti pe eri vu, tualu asikari kali towi erini ’diyi be. Eri tu uru Eliya ripi oni driari vu. Eri ’yo tinia, ’Ba Munguni la, opi kini, Mi esi va.

10Te Eliya omvi ambo asikari kali towi ma drilia nderi ma tia kini, Ma ka ovu ’ba Munguni, aci ma efu ’bua esizu va emi evezu kieikiei ’ba kali towi mini ’diyi be. Aci nga di enga ’bua esizu va yi evezu kieikiei ’ba kali towi erini ’diyi be.

11Dika opi nga di ambo asikari kali towi drilia aziniri ma ti pe eri vu, ’ba kali towi erini ’diyi be. Eri tu uru, eri ’yo eri tia kini, ’Ba Munguni la, opi azi ’dini, Mi esi va mbele!

12Te Eliya omvi e’yo yi tia kini, Ma ka ovu ’ba Munguni, aci ma efu ’bua esizu va emi evezu kieikiei ’ba kali towi mini ’diyi be. Aci Munguni nga di enga ’bua esizu va yi evezu kieikiei ’ba kali towi erini ’diyi be.

13Dika opi nga ambo asikari kali towi drilia nari ma ti pe tualu ’ba kali towi erini ’diyi be. Ambo ’ba kali towi drilia na nderi tu uru, emu e’de kumutisi Eliya ma drilia, eri ’ba matu eri vu ’yozu, ’Ba Munguniri la, ma matu ’ba mi vu, mi fe idri amani ’ba kali towi ’diyini be ma ovu e’yo amboru mi ma milia.

14Mi ne, aci enga ndra ’bua esizu va, ambo ’ba kali towi drilia iri oko ’diyi evezu kieikiei ’ba kali towi yini ’diyi be; te curu’do mi fe idri mani ma ovu e’yo amboru mi ma milia fo!

15Malaika Yehovaniri nga di ’yo Eliya ma tia kini, Mi si va eri be; mi ovu urisi erisi ku. Eri enga ra, eri si va eri be opi vu.

16Eri ’yo eri tia kini, Yehova ’yo ’dini, Mini ojio ’diyi ma ti pele Baali-zebubu adrou Ekironiari zizu,- eri ovu a’disiku Mungu ovuni aluni Israeli ma eselia zizu e’yo erinisi ku ya?-e’yo ’disi mi ngani si va gbolo mini lazu driniaria ku, te mi nga dra adaru.

17’Dini eri nga dra ekile e’yo Yehovani Eliyani ’yolerile. Te Yehoramu adripi erini e’do opi nyazu eri ma paria eli iri Yehoramu Yehosafati mvi opi Yudaarini opi nyazurisi, Ahaziani ovule mva kokorurisi.

18’Yeta azini Ahaziani ’yele ’diyi, yi sini yi buku opi Israelini ’diyi ma e’yo sizuri ma alia ku ya?

Jump to: Chapter 2 →