2 Kings 22

Lugbara (E’yo Siza Alatararu Munguniri BIBLIA)

← Chapter 21 Jump to: Chapter 23 →

1Eli Yosiani ovu aro erini e’dozu opi nyazurisi, eri nya opi Yerusalemua eli kali na. Andri erini ma ru Yedida, Adaya Bozikatiari ma zi’i.

2Eri ’ye e’yo onyiru Yehova ma miliari, eri aci geri dria i a’bi Daudini acizu aleniari ma alia, ojani i kalaa dri ndia kani dri ejia ku.

3Eri eca ’dini eli mudri drini aro Yosiani opi nyazurisi, opi pe Safani Azalia Mesulamu mvi ma mvi, ’ba e’yo sipiri ma ti jo Yehovania ’yozu, kini,

4Mi tu uru kuhani ambo Hilikia vu, ’dini eri ma la silingi ’bani jile jo Yehovania, ’ba pari ’bani fizuri agei tepi ’diyini okule ’ba nde ’diyi vuri;

5onyiru yi ma fe eri ’ba azi ngapi jo Yehovania ’diyi ma drilia ’diyi dri; yi ma fe ’ba azi ngapi jo Yehovania ’diyi dri, yi ma ede pari depi jo ruaa ’diyi ani.

6Adaru yi ma fe onduou mbau fapi ’diyi pi ma dria ’ba jo onduouru ’diyi pie, ’ba biriki ’bapi ’diyi pie, mbau pi jezu oni gale ’diyi be, deza jo ma ruaa ’diyi edezu ani.

7Indi vini yi ozini yi silingi ’bani fele yi dri ’diyi ma e’yosi ku, a’disiku yini ’yele kililirurisi.

8Te kuhani ambo Hilikia nga ’yo Safani ’ba e’yo sipiri ma tia kini, Ma isu buku azitaniri jo Yehovani ma alia. Te Hilikia nga buku nderi fe Safani dri, eri la eri ra.

9Te Safani ’ba e’yo sipiri nga mvi opi vu, nga e’yo omvi opi tia kini, Ati’ba mini wu silingi ovupi jo alia ’diyi, yi fe yi ’ba ’ba azi ngapi jo Yehovani ma alia ’diyi ma drilia ’diyi dri.

10Safani ’ba e’yo sipiri olu vini opi tia kini, Kuhani Hilikia fe ma dri buku ra. Te Safani la buku nderi opi ma drilia.

11Eri eca ’dini, opi ka e’yo buku azitaniri alia ’diyi eri ra, eri osi bongo ini.

12Te opi nga di azita fe kuhani Hilikia pi dri, Ahikamu Safani mvi pie, Akibori Mikaya mvi pie, Safani ’ba e’yo sipiri pie, Asaya ati’bo opiniri pie, ’yozu kini,

13Emi mu, emi zi Yehova tia ma dri, azini ’ba nde ’diyi dri, azini ’ba dria Yudaa ’diyi dri, e’yo ovupi buku yini isule ’diri ma alia ’diyi ma e’yosi; a’disiku adra Yehovani di ambo ama vu, a’bipi amani ’diyini e’yo dria ovupi buku ’dori ma alia ’diyi erile ku, e’yo ovupi sizaru ama ma e’yosi ’diyi ’yezu ku indirisi.

14’Dini kuhani Hilikia pi mu nabi okuru Hulida vu, Ahikamu pie, Akibori pie, Safani pie, Asaya pie. Eri ovu oku Salumu ’ba bongo suza ma ta mbapi, Tikiva Harihasi mvi ma mviniri (eri adri Yerusalemu ma esele iriri ma alia); te yi ’yo e’yo eri be.

15Eri ’yo yi tia kini, Yehova Mungu Israeliniri ’yo ’dini, Emi ’yo agu emi ti pepi ma vuri ma tia,

16Yehova ’yo ’dini, Mi ne, ma nga candi eji pari ’do ma dria ’ba alenia ’diyi be, adaru e’yo dria ovupi buku opi Yudaarini laleri ma alia ’diyi.

17A’disiku yini ma kulerisi, yini obiese vele Mungu azini ’diyi dri, ’dini adra mani engazu azi dria yini ’yele dri yinisirisi, e’yo ’disi adra mani nga di okporu pari ’doria, e’yo aluni ngani eri inyu ku.

18Te emi ma ’yo opi Yudaa emi ti pepi Yehovani zizuri ma tia ’dini kini, Yehova Mungu Israeliniri ’yo ’dini: E’yo mini erile ’diyi ma e’yosi,

19etu ndra mini e’yo mani ’yole angu ’dori vu ’ba alenia ’diyi be, kini eri nga eca andruru azini trizaruri erizurisi, asi minini ovule ewu ndesi menemenerurisi, mini mi ’bale va Yehova drilia, mini mi bongo osile, wuta wule mindresi ma driliarisi; ma eri mi alu ora, Yehova ’yoni.

20E’yo ’disi mi ne, ma nga mi oku tualu mi a’bipi be, mi nga mu ’bile minia asi anzurusi, mile mini ngani candi mani ngale jile pari ’ dori ma driari ndre ku indio. Te vi omvi e’vo oni vu dika.

← Chapter 21 Jump to: Chapter 23 →