2 Kings 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Ewu nde ’disi, Hezekia nga ovu azoru tu, ogogo drazaru. Nabi Isaya Amozi mvi nga emu eri vu, ’yo eri tia, Yehova ’yo ’dini, kini, Mi azi e’yo jo mini ma alia ’diyi ngonde, a’disiku mi nga dra ra, mi rua ngani ati ku.

2Hezekia nga di mile erini oja abi ruaaleru, eri zi Yehova tia kini,

3Yehova la, ma matu ’ba mi vu, mi ma ega di e’yo mani acizu mi drilia e’yo adaru ma alia asi alusi, mani e’yo ovupi onyiru mi ma miliari ’yezu indiri. Te Hezekia wu okposi mindre be.

4Eri eca ’dini, de nga Isaya kuni aku ma esele agaduari ku, e’yo Yehovani eca eri vu ’yozu,

5Mi da dri vile, mi ’yo Hezekia ambo ’ba mani ’diyi dri cepiri ma tia kini, Yehova Mungu mi a’bi Daudiniri ’yo ’dini: Ma eri zita mini ’bo, ma ne vini mindre mini ’bo, mi ne, ma nga mi ati ra; drozi o’du narisi mi nga tu uru jo Yehovaniria indi.

6Ma nga mi dri eli fe mudri drini towi o’du mini ’diyi ma dria. Ma nga mi pa, aku ’dori be, opi Asuriaari ma driasi, ma nga a’di ’di aku ’dori pazu, ma ma ngulupi ma e’yosi, azini ati’bo mani Daudi ma e’yosi indi.

7Te Isaya nga ’yo kini, Emi ’du elioefi nguluru. Yi ma ’du yi, ma ’ba apipi milia, Hezekia ma rua ma ati ani.

8Hezekia nga di ’yo Isaya tia kini, E’yo ngori nga ovu ma dri ecetaru ecezu Yehovani nga ma rua ati azini ecezu ma nga tu uru jo Yehovaniria drozi o’du nasiri ya?

9Te Isaya ’yo kini, ’Di ovu eceta Yehovani fele mi dri ecezu eri nga e’yo erini azileri ’yeri: mi le endrilendri etuni ma mu drile pa ’baza otufe dria mudri, kani ma mvi vile pa ’baza mudri ya?

10Te Hezekia nga e’yo omvi kini, Endrilendri ka mu drile pa ’baza mudri, ’di ovuni e’yo ambo ku; yo, te endrilendri ma mvi vile pa ’baza mudri.

11Te nabi Isaya wu Yehova vu; eri omvi endrilendri esipi va etusi ’bo pati Ahazini etu o’bizuri ma driari vile pa ’baza mudri ani.

12Ewu nderis Merodaki-baladani, Baladani mvi,opi Babuloniari, pe waraga ti feta be Hezekia vu; a’disiku eri eri Hezekia ovu ndra azoru.

13Te Hezekia eri e’yo yini, i eri ece yi dri jo afa lonyi aje amborusiri ma ta mbazuri dria, dahabu pie, mele pie, afa aji be arikariruri pie, odu aje ambosiri pie, jo afa ombaniri ma ta mbazuri pie, afa dria ovupi jo erini afa ta mbazuri ma alia ’diyi pie; afa jo erini ma aliari, kani opi nyaza eriniriari Hezekiani ecele yi dri kuni yo.

14Vutinia nabi Isaya emu opi Hezekia vu, ’yo eri tia kini, ’Ba ’diyi ’yo a’di e’yoni ya? Yi enga ngoa ya, ecazu mi vu ya? Te Hezekia ’yo kini, Yi enga angu izua, adaru Babulonia.

15Te eri ’yo, Yi ne a’di afani jo mini ma alia ya? Te Hezekia omvi e’yo kini, Yi ne afa dria ovupi jo mani ma alia ’diyi ’bo; afa aluni jo mani lonyi ta mbazu ’diyi ma alia mani ecele yi dri kuni yo.

16Te Isaya ’yo Hezekia tia, Mi eri e’yo Yehovani:

17Mi ne, o’duni nga eca, afa dria jo mini ma alia ’diyi, azini afa dria mi a’bipini tani mbale ecazu andru ’diyi, yi nga yi wu ji Babulonia; afa aluni ngani ace ku, Yehova ’yoni.

18Anzi mini efupi mi ruaa ’diyi, mini ngale tile ’diyi ma eselia, yi nga azini ’diyi wu ji ’dale; yi nga ovu ’ba nzele ranyaru ’diyi opi Babuloniari vile jo alia.

19Te Hezekia nga ’yo Isaya tia kini, E’yo Yehovani ’yole, mini ’yole ’bori ovu onyiru. Eri ’yo vini, Eri ma ovu ’dini ku ya? ka ’yo asi anzuru azini e’yo adaru nga ovu ewu manisi ci, ’yeke.

20’Yeta azini Hezekiani ’yele ’diyi, okpo erini pie dria, e’yo erini ’bile yini gazu, azini geri yini razuri edele yini yi sezu razu aku amboru ma aliari pie, yi sini yi buku opi Yudaa ’diyi ma e’yo ecezuri ma alia ku ya?

21Te Hezekia la i a’bipi be; te Manase mvi erini nya opi eri ma pariani.

← Chapter 19 Jump to: Chapter 21 →