2 Kings 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Te Elisa ’yo ndra oku erini mvani engale drasiri ma tia kini, Mi nga, mi mu ’ba mi vile joa ’diyi be, emi ma adri anga pari emini ecozu ovuzuria; a’disiku Yehova omve liki, eri nga ’de angu ’dori dria eli aziri.

2Te oku nde nga enga, eri ’ye ekile ’ba Mungunini ’yolerile; eri mu tualu ’ba eri vile joa ’diyi be, yi adri angu ’ba Filisitiniria eli aziri.

3Eri eca ’dini, eli aziri ka yi de ’bo, oku nde nga emvi angu Filisitiniriarisi, te eri nga mu opi vu owuzu jo erini pisi angu be.

4Te isu opi pi ovu e’yo oluzu Gehazi ati’bo ’ba Mungunirini be kini, Mi ece ma dri, ma zi mi tia, e’yo amboru dria Elisani ’yele ’diyi.

5Eri eca ’dini, erini Elisani ’ba engazu dra aliarisiri ma e’yo oluria opi tia, mi ne, oku nde erini mvani engale dra aliarisi ’diri owu opi vu jo erini pisi angu be. Te Gehazi nga ’yo, Opi mani inzileri la, ’di ovu oku nderi’i, ’diri mvi erini indi Elisani ndra engale dra aliari’i.

6Opi ka zi oku nderi tia, eri olu e’yo eri tia. ’Dini opi nga ambo alu pe eri dri, kini, Mi ma omvi eri dri afa dria ovupi ndra eriniru ’diyi pi efi nyakuni kale engazu o’du erini angu nde kuzuriasi cazu kpere curu’do ’diyi be dria.

7Elisa nga eca Damasikia. Te Beni-hadadi opi Suriaari ovu azoru; ka ’yo eri tia kini, ’Ba Munguni eca ’doa,

8opi nga ’yo Hazaeli tia kini, Mi ’du afa feza mi dria, mi mu dri fuzu ’ba Munguni be, mi zi Yehova tia ’ba nderi vusi ’yozu, Ma nga ma pa azo ’dorisi ra ya?

9Te Hazaeli nga mu dri fuzu eri be, eri ’du afa feza eri dria indi, adaru afa onyiru ndu ndu engapi Damasikia ’diyi ma eseliasi dria, eco ngamia kali suni ejizuni, yi eca pa sozu eri drilia, ’yozu, Mi mvi Beni-hadadi opi Suriaari pe ma ti mi vu ’yozu kini, Ma nga ma pa azo ’ dorisi ra ya?

10Te Elisa nga ’yo eri tia kini, Mi mu, mi ’yo eri tia kini, Mi nga mi pa ada; te Yehova ece ma dri eri nga dra ada.

11Eri su mile ruania, ni eri ’dani kpere te drinza nga eri bi ani. Te ’ba Munguni nga wu.

12Hazaeli nga ’yo, Opi mani eri wu a’di e’yosi ya? Eri omvi e’yo kini, A’disiku ma ni onzi mini ngale ’yele anzi Israelini ’diyi vuri; mi nga jo okporu yini ’diyi odu acisi, mi nga karile yini oli seisi, nga vini anzi yini ogba kai kai, mi nga oku yini ovupi oporovuru ’diyi ma ale osi.

13Te Hazaeli ’yo kini, Ati’bo mini ovupi oce toko ’diri eri a’dini e’yo amboru ’dori ’yezu ya? Elisa omvi e’yo eri tia kini, Yehova ece ma dri, mi nga ovu opi Suriaariru mi’i.

14Eri nga nga Elisa vu ’diarisi, eca opi ini vu, opi ’yo eri tia ’dini kini, Elisa ’yo mi tia ngoni ya? Te eri omvi eri tia kini, Eri ’yo ma tia kini, mi nga ati ada.

15Eri nga eca ’dini dru, eri ’du batania, su yi alia, aja eri opi ma andretia, te eri dra ra. Te Hazaeli nga opi nya eri ma pariani.

16Yehoramu, Yehosafati mvi, opi Yudaari e’do opi nyazu eli towi Yoramu Ahabu mvi opi Israelinirini opi nyazurisi, Yehosafatini ovuzu opiru Yudaarisi.

17Eli erini ovu ndra eli kali na drini iri erini e’dozu opi nyazurisi, eri nya opi Yerusalemua eli aro.

18Eri nga aci geri opi Israelini ’diyini ma alia, ekile suruti Ahabuni ’yelerile, Ahabu zini ovule oku erinirisi, Eri ’ye e’yo ovupi onzi Yehova ma miliari.

19Te Yehova leni Yuda dri ja ku, ati’bo ini Daudi ma e’yosi, ekile erini ndra azile eri tia kini i nga tala fe eri dri anzi erini ’diyi pie ’danirile.

20Ewu erinisi Edomu mbu Yuda ruaasi amve, yi ’ba opi yi ngulupini ceni,

21Te Yoramu nga di aga, Zairia gari erini be dria, eri enga inisi, eri ofu ’ba Edomua i acepi kuru’diyi, ’ba gari dri cepi ’diyi pie ra; te ’ba apa hema yinia.

22’Dini Edomumbu Yuda ma ruaasi amve kpere ecazu andru. Libina mbu amve ewu nderisi indi.

23’Yeta azini dria Yoramuni, e’yo erini ’yele ’diyi pie dria, yi sini yi buku opi Yudani ’diyi ma e’yo sizuri ma alia ku ya?

24Te Yoramu la i a’bipi be, yi sa eri tualu i a’bipi be aku Daudiniri ma alia; te mvi erini Ahazia nya opi eri ma pariani.

25Yehoramu Ahazia mvi opi Yudani e’do opi nyazu eli mudri drini iri Yoramu Ahabu mvi opi Israelinirini opi nyazurisi.

26Eli erini ovu kali iri drini iri erini e’dozu i opi nyazurisi, eri nya opi eli alu Yerusalemua. Andri erini ma ru Atalia, Omiri opi Israeliniri ma zi’i.

27Eri aci geri suruti Ahabuniria, eri ’ye e’yo ovupi onzi Yehova ma miliari, ekile suruti Ahabunirini ’yelerile, a’disiku eri ovu suruti Ahabuniri ma mviani,

28Te eri nga mu Yoramu Ahabu mvi be a’di ’dizu Hazaeli opi Suriaari be Ramoti-gileadia; te ’ba Suriaa ’diyi ’ba ebi eri ruaa.

29Te opi Yoramu eri mvi Yezireelia tezu ebi ’ba Suriaa ’diyini ’bale eri ruaa Ramaa erini a’di ’dizu Hazaeli opi Suriaari berisi ’diyini jaria. Te Ahazia Yehoramu mvi opi Yudaari si va Yoramu Ahabu mvini nezu, a’disiku eri ovu azoru.

← Chapter 7 Jump to: Chapter 9 →