2 Kings 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1Ahazi Yotamu mvi opi Yudaari e’do opi nyazu eli mudri drini aziri Peka Remalia mvini opi nyazurisi.

2Eli Ahazini ovu kali iri erini e’dozu opi nyazurisi, eri nya opi eli mudri drini azia Yerusalemua. Eri ’yeni e’yo ovupi onyiru Yehova Mungu eriniri ma miliari ekile ati Daudini ’yele ndrarile ku.

3Te eri aci geri opi Israelini ’diyiniri ma alia, eri fe mva erini vezu edetaru, ekile e’yo onzikanyaru ngule onzi suru Yehovani ’bele amve anzi Israelini ma driliasi ’diyini adrile ’yelerile.

4Eri ede vini edeta, eri ve obiese pari uruleru ’diyia, azini oni dria, azini pati dria ibiru ’diyi etia.

5Te Rezini opi Suriaari pi nga emu a’di ’dizu Yerusalemua, Peka Remalia mvi be; yi ’di a’di Ahazi be, i te yi econi eri agazaru ku.

6Ewu nderisi Rezini opi Suriaari omvi Elatini Suria vu, eri dro ’ba Yahudini Elatiasi, te ’ba Suriaa ’diyi nga fi Elatia,ovuzu ’dale ecazu andru.

7’Dini Ahazi nga ojio ma ti pe Tigilati-pileseri opi Asuriaari vu, ’yozu kini, Ma ovu ati’bo mini, mvi mini indio Mi emu uru ma pazu opi Suriaari pi ma driasi opi Israeliniri be, yi a’di ’dipi ma be ’diyi.

8Ahazi ’du dahabu pi mele be ovupi jo Yehovani ma alia, ovupi vini lonyi aje be ambo jo opini ma aliari ma eselia ’diyi, eri pe yi ti fetaru opi Asuriaari dri.

9Opi Asuriaari eri e’yo erini; te opi Asuriaa nderi mu uru a’di ’dizu Damasikiaa, ’du eri, o’du vini ’ba alenia ’diyi ati’baru, ji yi Kiria, fu Rezinini ra.

10Te opi Ahazi nga mu Damasikia dri fuzu T’igilati-pileseri opi Asuriaari be, eri nga pari edeta edezu Damasikiari ndre. Opi Ahazi pe wura pari edeta edezu nderiniri ma ti ji kuhani Uriya vu, o’biza erini be, trotro azi dria yini ’yele eri ma ruaarile.

11Te kuhani Uriya nga pari edeta edezuri si ani, dria ekile e’yo nde Ahazini tini epele engazu Damasikiasirile, kuhani Uriya ede eri ’dini de nga opi emvini Damasikiasi ku.

12Te opini emviria Damasikiasi, opi ne pari edeta edezu nderi. Eri mu ogogo pari edeta edezu nderi vu, eri ede edeta drinia.

13Eri ve edeta vezaru eriniri pi edeta edele anyafurasiri pie, eri osu edeta mvuzaru eriniri, eri oya vini ari edeta asi anzuruni eriniri pari edeta edezu nderi ma dria.

14Pari edeta edezu edele molasi ovupi Yehova ma driliari, eri ’du eri engazu jo drilia pari agaduariasi, engazu pari edeta edezu eriniri pi ma eselia jo Yehovaniri beriasi, eri ’ba eri pari edeta edezu eriniri ma kalaa andraleruria.

15Te opi Ahazi fe azita kuhani Uriya dri, kini, Mi ma ve edeta vezaru o’bitisiri pi pari edeta edezu amboruri ma dria, edeta edele anyafurasi ondresiri pie, edeta vezaru opiniri pie, edeta edele anyafurasi eriniri pie, azini edeta vezaru ’ ba dria angu ndea ’diyiniri pie, edeta edele anyafurasi yiniri pie, edeta mvuzaru yiniri pie; mi ma oya drinia ari dria edeta vezaniri pi ari dria edeta edezaniri be; te pari edeta edezu edele molasiri ma ovu afa mani e’yo zizu aniriru.

16Te kuhani Uriya ’ye ’dini, ekile e’yo dria opi Ahazini azilerile.

17Te opi Ahazi nze esele afa etini ’bazu ’diyi ma ruaa ’diyi, eri nze vini awala rua ojizuri driniasi, eri ’du miri ma otaka molasiri tiago edele molasi ovupi eri etia ’diyi ma ngukuasi va, eri ’ba eri pari edele onisiri ma dria.

18Geri sabatoniri yini ndra edele jo aliari, azini pari amve opini fizuri, eri oja yi jo Yehovani vu, opi Asuriaari ma e’yosi.

19’Yeta azini dria Ahazini ’yele ’diyi, yi sini yi buku opi Yudaa ’diyi ma e’yo ecezuri ma alia ku ya?

20Te Ahazi la i a’bipi be, yi sa eri i a’bipi be aku Daudiniria; re mvi erini Hezekia nya opi eri ma pariani.

← Chapter 15 Jump to: Chapter 17 →