2 Kings 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Atalia Ahazia andri ka mva erini dra ’bo, eri ori’ba opini ma dri jazu

2Te Yehoseba opi Yoramu zi, Ahazia amvi’i, eri ’du Ahazia mvi Yoasini, ogu eri opianzi ngapi dri japi ’diyi ma eseliasi, ’ba eri endria erini be jo lazuri alia. Eri zi eri Atalia ma e’yosi, ’dini eri kazu eri fuzu ku;

3eri ovu eri be zizaru jo Yehovani ma alia eli azia. Te Atalia nya opi angu nderiani.

4Eli azirisi Yehoyada pe ’ba ti ’ ambo asikari turu alu ’diyi drilia, ’ba suru Karini azini ’ba agei tepi ’diyini ’diyi omvezu, eri ji yi jo Yehovani ma alia; eri azi aziza yi be, eri fe yini oyo so jo Yehovani ma alia, eri e’da opi mvini yi dri.

5Eri fe azita yi dri kini, ’Diri e’yo emini ngale ’yeleri: Emi ’ba na ma esele aluri efipi sabatosi ’diyi yi nga opi ma jo agei teni;

6emi ’ba na ma esele aluri nga ovu kalitile omvele Suriruria; azini emi ’ba na ma esele aluri nga ovu kalitile ’ba ageini tepi ’diyi ma ngukuaria; ’dini emi nga jo agei te, nga ovu afa geri asepiriru.

7Asikari ongulumuru ongulumuru emini iri efupi sabatosi ’diyi nga jo Yehovani ma agei te opi ma ageia.

8Emi nga opini ace kuru, emi dria alu alu afa ombani be emi dria; te ’ba ’yepi fipi emi eseliasiri emi ma fu eri ra. Emi ma ovu opi be ’dani, erini furia azini firia.

9Te ambo asikari turu alu drilia ’diyi, yi ’ye dria ekile kuhani Yehoyadani azilerile, yi dria alu alu eji ’ba yini efipi sabatosi ’diyi pi ’ba efupi sabatosi ’diyi be, yi mu kuhani Yehoyada vu.

10Te kuhani fe ambo asikari turu alu drilia ’diyi dri aju piyi gombere pie ovupi jo Yehovania ’diyi, yi ovu ndra afa opi Daudini.

11Te ’ba agei tepi ’diyi, dria alu alu afa ombani ’diyi be yi ma dria, nga pa so engazu jo kalaa dri ndiaria cazu jo kalaa dri ejiaria, pari edeta edezuri pi ma ageia jo be, opi ma ageiasi kuru.

12’Di ma vutia eri eji opi mvini amve, ’ba ekilaza opiniri eri ma dria, fe eri dri afa e’yo eti nzezaniri; yi ’ba eri opiru, osu o’du eri dria; yi sa dri yini, ’yozu kini, Opi ma rua ma adri alaru ’ dani!

13Te Atalia ka otrena ’ba agei tepi ’diyini otrele ’ba ongulumuru ’diyi beri eri ’bo, eri mu ’ba vu jo Yehovania,

14te eri lu, azini mi ne, opi so pa pati i’diza piriri vu, yini ladrile ’yele opi ’baza ngarerile, ambo asikarini ’diyi pi oso pa opi ageia ’ba guka vupi ’diyi be; ’ba dria angu ndea ’diyi yi ovu ayikosi tu, yi vu guka. Atalia nga di bongo ini asi ra, nga otre kini, ’Di ti ecita onziniri! ’Di ti ecita onziniri!

15Te kuhani Yehoyada fe azita ambo asikari turu lalu drilia, ovupi asikari ongulumuru drilia ’diyi dri, ’yo yi tia kini, Emi ofu eri asikari eselia, azini ’ba dria alu alu eri ma vuti bipi ’diyi, emi oli Yi seisi. A’disiku kuhani ’yo kini, Emi fu eri jo Yehovani ma alia ku.

16Yi adi eri dri geri, eri nga mu geri lakanyani adrizu fizu opi vile joarisi, yi fu eri ’dale.

17Te Yehoyada azi aziza Yehova pi eselia, opi pie, ’ba ongulumuru ’diyi pie, kini, yi ma ovu ’ba Yehovani; azini opi pi ma eselia ’ba nde ’diyi be.

18Te ’ba dria angu ndea ’diyi nga mu jo Baaliniria, asu eri va; pari edeta edezu erini ’diyi yi onyo nyingiriki wura erini ’diyi be, yi fu Matani kuhani Baalini pari edeta edezu ’diyi ma drilia. Kuhani eri pe ’ba ambo jo Yehovani ma agei tezu.

19Eri o’du ambo asikari turu alu drilia ’diyi, ’ba Karini pie, ’ba agei tepi ’diyi pie, ’ba dria angu nderi alia ’diyi pie; yi eji opini va engazu jo Yehovani ma aliasi, yi emu geri kalitile asikari agei tepi ’diyinirisi ecazu jo opiniria. Te eri ri oguna opiniri dria.

20’Dini ’ba dria angu ndea ’diyi ovu ayikosi; te yini Ataliani fuzu seisi jo opiniriari ma vutia aku nde ovu ciri.

21Yehoasi ma eli ovu aziri, erini e’dozu opi nyazurisi.

← Chapter 10 Jump to: Chapter 12 →