2 Kings 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Naamani, ambo opi Suriaari ma asikari ongulumuru ’diyi ma dri cepiri, eri ’ba amboru inzile turi opi ini ma milia, a’disiku Yehova fe Suriani agazu omba alia e’yo erinisi, Eri ovu ’ba ombaouni uri kokoru, te ofu nya erini.

2Isu ’ba Suriaa ’diyi yini furia ndra nguluru nguluru, yi eji zamva alu yini pale angu Israelini ma aliari ati’boru, eri azi nga oku Naamani vileri dri.

3Eri ’yo oku opiru eriniri tia kini, Opi mani ka te ovu nabi Samariaari be ’dale ya! Ka’dini eri te nga ati ofu erinisi ra.

4Te Naamani nga fi, ece opi erini tia kini, Zamva yini ejile angu Israeliniari ’ye ’dini ’dini.

5Te opi Suriaari nga ’yo kini, Mi mu, ma nga waraga ti pe opi Israeliniri vu. Eri nga dri ko, eri ’du aya onziru mudri dahabuni ji, sekeli meleni alifu azia pie, bongo suza onyiru mudri pie.

6Eri ji waraga opi Israeliniri vu, waraga nderi kini, Waraga ’dori ka ca mi vu ra, mi ma ni ma pe Naamani ati’bo mani ma ti mi vu, ’dini mi ma ati ofu erini.

7Eri eca ’dini, opi Israeliniri ka waraga nderi la ra, eri asi bongo ini, kini, Ma Munguni, ’ba fuzu azini idri fezu, ’dini ’ba ’dorini agu ti pezu ma vu ofu erini atizu ya? Emi ega, emi ne nga, eri e’yo ndru ama eselia omba ’bazu ’doni ya!

8Te eri eca ’dini, Elisa ’ba Munguni ka eri kini opi Israeliniri asi bongo ini ra, eri pe ’ba ti opi vu kini, Mi asi bongo mini a’di e’yosi ya? Mi fe eri ma emu curu’do ma vu, ’dini eri nga ni nabi ovu Israeli eselia ci beni.

9’Dini Naamani nga emu jakanya erini pie, gari pie, eri so pa jo Elisani ma tilia.

10Elisa nga ’ba ti pe eri vu ’yozu, Mi mu mi oji Yoridani ma alia pale aziri, te mi ruani nga eca onyiru dika, mi nga ovu alaru.

11Te Naamani n’ga ovu aokosi, eri mu ra, eri ’yo kini, Ma kini te mani, adaru eri nga efu ma vu ru Yehova Mungu erinirini omve, dri erini oya azo nderi dria, agu ofu beri atizu.

12Yi Damasikiari, adaru Abana pi Faripari be, yi ovuni on yiru aga yi Israelini dria ra ku ya? Ma econi ma ojizu yi nde alia ovuzu alaru ku ya? ’Dini eri oja i muzu adra okporu be i asia.

13Te ati’ba erini emu eri vu ogogo, ’yo eri tia, Ma ati, nabi ka te azi mi dri e’yo amboru ’ye, te’do mi ’yeni te eri ku ya? Agapiri mini te ’yezu eri ka ’yo mi tia kini, Mi oji mi, mi nga ovu alaru ani.

14Eri nga di si va, nga fi Yoridani alia pale aziri, ekile ’ba Mungunirini ’yolerile; rua erini eca dika onyiru ekile mva ganaru ma ruale, eri ovu alaru.

15Eri nga di mvi ’ba Munguni vu, eri’i ’ba ongulumuru erini ’diyi be dria, eri eca pa sozu eri drilia; eri ’yo kini, Mi ne curu’do, ma ni Mungu azini wudrikuru dria ma aliani yo, pe kiri Israeli eseliari’i a’dule; e’yo ’disi kirikiri mi a’i di eta ati’bo minini feleri.

16Te eri omvi e’yo kini, Ekile Yehova mani pa sozu drileniarini ovuzu indirile, ma ngani afa a’i aluni ku. Eri omi eri afa a’izu, te eri ga si.

17Te Naamani nga di ’yo, Ka’dini yo, mi fe nyaku akanya irini ecole ejileri ati’bo mini dri; a’disiku engazu curu’do ati’bo mini ngani edeta ve kani ede adrou azini dri aluni ku, pe kiri Yehova dri.

18E’yo ’dorisi Yehova ma wu onzi ati’bo minini: opi mani ka fi jo Rimonini ma alia inzita fezu, ma drini eri aza koria acita erinisi, mani avuria va Rimoni ma joa, mani avuria va Rimoni ma joa, Yehova ma wu onzi mi ati’boni e’yo ’disi.

19Elisa ’yo eri tia, Mi mu asi anzuru be. ’Dini eri ku eri ra, mu re were.

20Te Gehazi, ati’bo Elisa ’ba Mungunirini ’yo kini, Mi ne, opi mani ga Naamani ’ba Suriaarini, afa erini ejileri a’ikokoru eri dri si. Ekile Yehovani ovule indirile, ma nga nzu eri vutisi, afa azini a’izu eri dria.

21’Dini Gehazi bi Naamani ma vuti ra. Naamani ka ne agu aluni enzu i vutisi, eri si gari driasi va dri fuzu eri be, eri ’yo kini, Ngoni ya?

22Eri omvi e’yo kini, Ngoni yo ’bo. Bani opi mani epe ma ti ’yozu, Mi ne, karile iri nabianzi eselia engapi angu oniru Efiraimuaria ’diyi eca ma vu cucuru’do. Ma zi mi tia, mi fe yi dri aya onziru alu dahabuni, azini bongo iri.

23Naamani omvi e’yo kini, Onyiru mi ma ’du aya onziru. ’Eri omi eri, eri ombe aya onziru dahabuni iri, osu yi jurua iri ma alia, bongo iri nde ’diyi be, eri ’ba yi ati’ba erini iri ’diyi ma dria; te yi ji yi Gehazi drilia.

24Eri ka ca oni nderia, eri ’du afa ’diyi yi dria, ’ba yi joa, te eri fe geri ’ba nde ’diyi dri, yi mu ra.

25Eri fi ra, so pa opi ini ma drilia. Te Elisa nga ’yo eri tia, Mi enga ngoa ya, Gehazi? Eri nga omvi kini, Ati’bo mini muni ngoa ku.

26Te eri nga ’yo eri tia, Asisile mani muni mi be agu ndeni i esiria gari driasi dri fuzu mi be ku ya? ’Di ovu ewu silingi pi a’izu, bongo pie, nga mizeituni azini zabibuni pie, kabilo azini ti pie, ati’ba agupiru azini okuru pie ya?

27E’yo ’disi ofu Naamaniniri nga mi nyani ori’ba mini pie ’dani ’dani. Te eri fu Elisa vusi ofu be ruaa emveru ekile sile,

← Chapter 4 Jump to: Chapter 6 →