2 Kings 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1Te nabi Elisa omve nabimva alu, ’yo eri tia kini, Mi anzu opile mini, mi ’du lubu oduni ’dori mi dria, mi mu Ramoti-gileadia.

2Mi ka ca ’daa ’bo, mi nda Yehu, Yehosafati Nimisi mvi ma mvini; mi fi, mi enga eri adripi erini ma eseliasi, mi ji eri jo aliza alialeruria.

3Mi ’du lubu odu beri, mi osu eri eri ma dria, mi ’yo kini, Yehova ’yo ’dini, Ma osu odu mi dria mi ’bazu opiru Israeli ma drilia ’do. ’Di ma vutia mi zi jotile, mi nzu, mi te ku.

4Te karilau nde, adaru nabi karilaururi mu Ramoti-gileadia.

5Eri ka ca ra, mi ne, ambo asikari ongulumuru drilia ’diyi yi ori; eri nga ’yo kini, Ma ovu e’yo ma ti pezuri be ’yozu mi tia, ambo lao Yehu nga e’yo omvi kini, Ama dria ma eselia a’di’i ya? Te eri ’yo, Mi’i fo, ambo la.

6Te eri nga, eri fi jo alia; eri osu odu eri dria, ’yo eri tia, Yehova Mungu Israeliniri ’yo ’dini kini, Ma osu odu mi dria mi ’bazu opiru ’ba Yehovani ma drilia, adaru Israeli drilia.

7Mi ma ofu suruti opi mini Ahabuniri, ’dini ma ma ofe aroti ari ati’ba mani nabiru ’diyi piyini ati’ba azini dria Yehovani ’diyi be, Yezebeli ma ruaa.

8Te suruti Ahabuni dria yi nga dri ja ra; ma nga agupianzi dria dri ja Ahabu vusi alu alu ra, obile ati’baru ’diyi ’ba kari’baru Israelia ’diyi be iri tro.

9Ma nga suru Ahabuni ’ba ekile suru Yeroboamu Nebati mvinirile, indi vini ekile suru Baasa Ahija mvinirile.

10Oceyi nga Yezebelini nya angu Yezireelinia, ’ba aluni ngapi eri sapini yo. Agu nde nga di lotile zi, nzu ra.

11Te Yehu nga di efu opi erini ma ati’ba vu; agu aluri nga ’yo kini, Ngoni ya? Agu azaza ’dori eca mi vu a’di e’yosi ya? Eri nga omvi yi tia, Emi ni agu nderi e’yo erini ’yoleri be.

12Yi ’yo ra, ’Di a’buni; mi olu ama dri curu’do, Eri omvi yi tia kini, Eri ’yo ma tia ’dini ’dini, kini Yehova ’yo ’dini, Ma osu odu mi dria mi ’bazu opiru Israeli ma drilia.

13’Di ma vutia yi ’ye mbele, ’ba dria alu alu yi ’du bongo yini, ’ba yi eri ma palaa otufe dria, yi vu guka, ’yozu Yehuni opini.

14’Dini Yehu, Yehosafati Nimisi mvi ma mvi, otu e’yo Yoramu ma ’ruaa. (Te Yoramu tualu Israeli be dria yi ovu Ramoti-gileadi ma ta mbazu Hazaeli opi Suriaari ma ’e’yosi;

15te isu Yoramu mvi Yezireelia tezu ebi ’ba Suriaa ’diyini ’bale eri ruaa erini a’di ’dizu Hazaeli opi Suriaari be ’diyini jaria.) Te Yehu ’yo, Emi ka ega ’dini, emi ku ’ba aluni ma nzu akuasi muzu e’yo nde ekuzu Yezireelia ku.

16’Di ma vutia Yehu aci garisi muzu Yezireelia, a’disiku Yoramu la ’dale. Te isu Ahazia opi Yudaari esi va Yoramuni ndrezu.

17Te ’ba aku agei tepi pa sopi abi kaliru izu Yezireeliari driari ne ’ba ongulumuru Yehuni erini emuria, eri ’yo ra kini, Ma ne ’ba ongulumuru. Te Yoramu ’yo kini, Mi ’du ’ba nzupi akanya driari, mi pe eri ti dri fuzu yi be, eri ma ’yo, Asi anzuruni ya?

18’Dini ’ba alu nzu akanya dria dri fuzu eri be, eri ’yo kini, Opi ’yo ’dini, Asi anzuruni ya? Te Yehu omvi e’yo kini, E’yo mini asi anzuru beri ngoni ya? Mi oja mi ma ngukualeru. Te ’ba aku agei tepiri olu kini, Ojio ca yi vu, te eri ’bani nga emvi ku.

19Eri nga di asi ’ba azini ma ti pe akanya dria, eri ca yi vu, ’yozu, Opi ’yo ’dini kini, Asi anzuruni ya? Te Yehu omvi e’yo kini, E’yo mini asi anzuru beri ngoni ya? Mi oja mi ma ngukualeru.

20’Ba aku agei tepiri olu kini, Eri ca yi vu, te eri ’bani nga emvi ku. Te droza ’bani akanya gari sepi ’diyini drozuri ovu ekile Yehu Nimisi mvini adrile drolerile; a’disiku eri dro okposi tu.

21Te Yoramu nga ’yo, Mi ede gari ku ngonde. Yi nga gari nde eriniri ede ku ngonde ra. Te Yoramu opi Israeliniri pi fu Azaria opi Yudaari be, yi iri tro gari yini ma alia, yi mu dri fu Yehu be, yi isu eri angu Nabotu ’ba Yezireeliariniria.

22Eri eca ’dini, Yoramu ka Yehuni ne, eri ’yo kini, Yehu, asi anzuruni ya? Te eri omvi e’yo kini, Asi anzuru ngoni ngori ya, mi andri Yezebeli ka ovu ali o’baza be kakau, oleuru ’dini?

23Te Yoramu oja gari ini, nzu, ’yo Ahazia tia, Ahazia la, ’di o’di nyazani!

24Te Yehu nga osu erini nzo okposi dria, nga Yoramuni gbi wu pi ma eselia agyi beria, ’dini ’ye nderi fi culu erini alia, eri nga ’de gari erini alia ani.

25Yehu nga ’yo Bidikari ambo asikari driliari ma tia kini, Mi ’du eri, mi ’be eri angu Nabotu ’ba Yezireeliariniria; a’disiku mi ma ega curu’do e’yo Yehovani ’yole ewu amani nzuzu mi be tualu ati Ahabu ma vutiarisi, Yehova ’ba e’yo nzizaru eri dria kini,

26Adaru ma ne aje ari Nabotu pini anzi erini beYehova ’yo ra-ma nga arioti ofe mi dri angu ’doria. Curu’do e’yo ’disi mi ’du eri, mi ’be eri angu nderi ma alia, ekile Yehovani ’yolerile.

27Te Ahazia opi Yudaari ka ’di ne ra, eri apa geri jo nga aliari vusi. Te Yehu dro eri vuti, ’yo kini, Mi gbi vini eri gari alia indi; yi gbi eri ani pari ’bani tuzu Guri i otipi Ibileamu beriaria. Eri apa Megidoa, eri dra ’dale.

28Te ati’ba erini ’diyi ’du eri gari alia, ji eri Yerusalemua, yi sa eri nyadri erini ma alia tualu eri a’bipi be aku Daudiniria.

29Ahazia e’do opi nyazu Yuda ma drilia eli mudri drini alu Yoramu Ahabu mvini opi nyazurisi.

30Yehu ka eca Yezireelia ’bo, Yezebeli eri e’yo nderi ra; eri e’bura mile ongorobi erini rangisi, ede dribi erini onyiafasi, eri lu amve derisasi.

31Yehuni firia kali tilia, Yezebeli ’yo kini, Mi Zimiri, opi mini fupiri’i; asi anzuni ya?

32Eri enga mile erini uru luzu derisa vu, ’yo kini, A’di fi ma vualeruni ya? A’di’i ya? ’Ba nzele ranyaru iri kani na ’diyi lu amve eri vu.

33Yehu kini, Mi ’be eri va. ’Dini yi ’be eri va; ari azini erini ombu abi ruaa, azini akanya ruaa indi, yi otu eri pasi.

34Eri ka fi ’bo, eri nya nyaka, eri mvu indi; eri ’yo, Emi ne e’yo oku trile ’dorini, emi sa eri; a’disiku eri ovu opi zi’i.

35Te yi mu eri sazu, te yi isu kiri dri fala pi, pa pie, dri agele pie.

36’Dini yi emvi e’yo ecezu Yehu tia. Eri ’yo kini, ’Di e’yo Yehovani ’yole ndra ati’bo erini Eliya ’ba Tisibini ma tisiri’i, kini, Oce yi nga za Yezebeli ma ruaari nya;

37avu erini nga ovu warale nyaku dria angu Yezireeliniria, ’ dini yi ngani ’yo, ’Diri Yezebeli’i, ’dini ku.

← Chapter 8 Jump to: Chapter 10 →