2 Kings 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Yehoahazi Yehu mvi e’do opi nyazu Samariaa Israeli ma drilia, eli kali iri drini na Yoasi Ahazia mvi opi Yudaarini opi nyazurisi, eri nya opi eli mudri drini aziri,

2Eri ’ye e’yo ovupi onzi Yehova ma miliari, eri bi e’yo onzi Yeroboamu Nebati mvini ’yele, erini fele Israelini ’yele ’diyi ma vuti; eri kuni e’yo onzi nde ’diyi ku.

3Te adra Yehovani di Israeli vu, eri fe yi Hazaeli opi Suriaari pi dri, Benihadadi Hazaeli mvi be, ewu dria.

4Te Yehoahazi ’ba matu Yehova vu, Yehova eri eri ra; a’disiku eri ne matu Israelini, opi Suriaarini yi inzazu okporuri.

5(E’yo ’disi Yehova fe Israeli dri ’ba yi papiri, ’dini yi fu ’ba Suriaa ’diyi ma driasi; te anzi Israelini nga di ovu hema yini ma alia dika ekile okorile.

6Te ti, yi kuni e’yo onzi suruti Yeroboamuni ’yele, erini fele Israelini ’yele ’diyi ku, te yi aci alenia ’dani, azini Asera ovu ’dani Samariaa.)

7Ku Yehoahazi dri asikari akanyani ’diyi kiri kali towi, azini gari mudri ’diyi pie, asikari acipi pasi alifu alu ’diyi pie, a’disiku opi Suriaari ja yi dri ’bo, ’ba yi ekile anya drilekole.

8’Yeta azini dria Yehoahazini, e’yo erini ’yele ’diyi pie dria, yi sini yi buku opi Israelini ’diyi ma e’yo ecezuri ma alia ku ya?

9Te Yehoahazi la i a’bipi be, yi sa eri Samariaa, te mvi erini Yoasi nya opi eri ma pariani.

10Yehoasi Yehoahazi mvi e’do opi nyazu Samariaa Israeli ma drilia eli kali na drini aziri Yoasi opi Yudaarini opi nyazurisi, eri nya opi eli mudri drini azia.

11Eri ’ye e’yo ovupi onzi Yehova ma miliari; eri kuni e’yo onzi Yeroboamu Nebati mvini ’yele, azini fele Israelini ’yele, ’diyi ku, te eri aci yi alia ’ dani.

12’Yeta azini Yoasini, e’yo erini ’yele ’diyi pie dria, okpo erini a’di ’dizu Amazia opi Yudaari beri be, yi sini yi buku opi Israelini ’diyi ma e’yo ecezuri ma alia ku ya?

13Te Yoasi la i a’bipi be, te Yeroboamu ri oguna erini opiniri ma dria; te sa Yoasini Samariaa tualu opi Israelini ’diyi be.

14Te Elisa ka ovu azoru, adaru azo erini ngazu drazuri’i, Yoasi opi Israeliniri nga si va eri vu, wuzu erisi, kini, Ma ati ye! ma ati ye! Gari Israelini ’diyi, ’ba tupi akanya dria erini ’diyi be!

15Te Elisa nga ’yo eri tia kini, Mi ’du osu pi ’ye be; ’dini eri ’du osu pi ’ye be ra.

16Vutinia eri ’yo opi Israeliniri ma tia kini, Mi ’ba mi dri osu dria; eri ’ba dri drinia. Te Elisa nga dri ini ’ba opi ma dri dria.

17Eri ’yo vini, kini, zi derisa etuni efurialeruri; te eri zi eri ra. ’Di ma vutia Elisa ’yo, Mi gbi ’ye; eri gbi ra. Te eri ’yo ra, ’Ye agaza Yehovaniri, adaru ’ye Suria agazuri’i Toko ku mi nga a’di ’di ’ba Suriaa ’diyi be Afekia, cazu etu mini yi dezu teketekeria.

18Eri ’yo vini, Mi ’du ’ye; eri ’du ra. Eri ’yo opi Israeliniri tia, Mi co nyaku yisi; eri co nyaku ani pale na, ku ja.

19Te ’ba Munguni ovu aokosi eri vu, ’yo kini, Onyiru mi ka te co pale towi kani azia; te’do mi co Suria cazu mini yi dezuria, te curu’do mi nga Suria co kiri pale na.

20Te Elisa dra ra, yi sa eri ra. Te ’ba Moabua ’diyi adri fi nguluru nguluru angu nderia elini ’bazu e’dozurisi.

21Eri eca ’dini, yini ’ba alu ma avu saria, yi ne ’ba ongulumuru nde alu ’diyi, yi ’be ’ba nderi ma avu nyadri Elisaniri ma alia; erini Elisa ma fala eloria, coti agu nde enga idriru, so pa uru pa dria.

22Te Hazaeli opi Suriaari inza Israeli okporu ewu Yehoahazinisi dria.

23Te Yehova ’ba asi ndriza pi yi vu, yiki be, ega e’yo yini, a’disiku aziza yini Iburahimu pi be, Isaka pie, Yakobo pieri ma e’yosi, leni yi dri jazu ku, ’beni yi nga i miliasi ku indi.

24Te Hazaeli opi Suriaari nga dra ra; mvi erini Benihadadi nya opi eri ma pariani.

25Te Yehoasi Yehoahazi mvi opa aku Beni-hadadi Hazaeli mvini opale ndra i ma ati Yehoahazi ma driasi ’diyi dika ombasi. Pale na Yoasi aga eri ombasi ra, opa aku Israelini ’diyi dika.

← Chapter 12 Jump to: Chapter 14 →