Matthew 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Eri nga eca ’dini Yesu ka de e’yo azizu ’ba erini imbale nudri drini iri ’diyi ma tia ’bo eri nga fu ’dasi, mu ’ba imbazu azini ’yo oluzu aku ambo yinia.

2Yohanani ovuria jo arunia, ka ’yeta Kristoni ’yele ’diyi ma e’yo eri ra, eri nga ’ba erini imbale ’diyi ti ope,

3nga ’yo eri tia kini, Mi ’ba emupiri, kani ama ’ba azini te ya?

4Yesu nga e’yo omvi, ’yo yi tia, Emi mvi ’dale, emi ’yo Yohana ma tia e’yo emini erileri azini emini ndreleri:

5’ba mile odraza be yi angu ndre, ’ba acozaru yi aci, ’ba ofu be ’diyi ma rua ati alaru, ’ba bile kokoru yi e’yo eri ra, ’ba draza enga idriru, ’ba e’yo bari olu ’ba alioru ma tia.

6’Ba abapi masi kuri ovu drilebaru.

7’Ba ’diyini mviria geri yinia, Yesu nga e’do e’yo olu ’ba ongulumuru tia e’yo Yohananisi: Emi fu dra roko dria a’di ndrezu ya? Ozu yazaru olisi ya?

8Te emi fu ndra a’di ndre ya? ’Ba afa suza mene meneru supi i ruaari ya? Emi ndre, ’ba bongo menemeneru be liyi yi opi ma joa.

9Te emi fu dra a’di e’yosi ya? Nabini ndrezu ya? E, ma ’yo emi tia, ’ba amboru nabi agapi rari.

10’Diri ’ba yini e’yoni sile ’bori’i, Emi ndre, ma pe ojio mani ma ti mi milia, eri nga geri mini ede mi drilia.

11Ma ’yo emi ria ndi, ’ba okuni osile ’bo ’diyi ma eselia ’ba Yohana baputizi fepire agapi rani yo;te ’ba werea tu suru ’buaria eri amboru aga eri ra.

12Engazu o’du Yohana baputizi fepirinisi ecazu curu’do, ’ba suru ’buari ari, ’ba aripi ’diyi eri pa okposi.

13Te nabi dria azita be yi olu ndra e’yo ecazu Yohana vu;

14te emi ka le e’yo ’diri a’i ra ’ba ’diri eri Eliya ngapi emupiri’i.

15’Ba ovupi bile beri ma eri e’yo ra

16Te ma nga ’ba ewu ’dosi ’diyi o’bi a’di be ya? Yi ovu ekile anzi nyiri ripi cuua yi agyi omvepi ’diyile

17yi yo ra, Ama vu eseke emi dri te er’i tuni ongoni ku; ama ga lulu, emi wuni vini ku.

18Te Yohana emu ra, nyani afa nyaza ku, mvuni afa ku, te yi ’yo ra, Eri orindi onzi be;

19Mvi bani emu ra afa nyaza nyazu azini afa mvuza mvuzu te ’ba ’yo ra Mi ndre, ba ’anyamgboloru, ’ba ewa mvupiri, eri ’ba musoro sopi ’diyi pi ma agyi ’ba e’yo ezapi ’diyi be! Te onduani nga e’yo liza nde ’yeta inisi.

20Etu ’dasi eri nga e’do egazu aku ndra erini tali erini ’yezu yi ma alia ’kakau ’diyi ma dria, yini irile kurisi.

21Eyawaye, Korazini la! Eyawaye, Betesaida la! Tali okpo be ovupi ’yezaru emi eselia ’diyi ka ovu ndra ’yezaru Turo pi ma alia Sidoni be ’bo, te’do isu yi oja yi asi drio, yini koliba suria, ofuta be yi ruaa candisi.

22Te ma ’yo emi tia, candi emini o’du e’yo lizurinisi nga ovu okporu aga candi Turo pini Sidoni beri ra.

23Mi’i, Kaperinaumu la, mi nga mi enga uru kpere ’bua ya? Mi nga si va kpere Pari ’ba drazaniria. A’disiku tali ’bani ’ye le mi alia ’diyi ka ovu ndra ’yezaru Sodomu ma alia, te’do eri adri indi kpere andru.

24Te ma ’yo emi tia, o’du e’yo lizurisi candi miniri nga ovu okporu aga candi angu Sodomuniri ra.

25O’du ’dasi Yesu nga e’yo omvi, nga ’yo, Ma ’yo awa’difo mi vu, Ata, Opi ’bu pini nyaku beri, mini e’yo ’diyi zile ’ba ondua be ’diyi pi ma milia ’ba e’yo nipi ’diyi be, mini yi ecele anzi nyiri dririsi;

26e, Ata, te ’dini ovu ndra onyiru mi milia.

27Ata mani fe afa dria ma dri ’bo; te ’ba aluni nini Mvini ku te Ata’i a’dule, azini ’ba aluni nini Atani ku te Mvi’i a’dule, azini ’ba Mvini lezu Atani ecezu eri driri’i.

28Emi emu ma vu, emi dria andepi ’diyi azini afa nzizaru be, te ma nga fe emi dri andeli.

29Emi’du kulumbu mani, emi emu e’yo oni ma vu; te ma ovu e’yere, asi afu kokorusi indi; emi nga ande liza isu orindi eminia.

30Te kulumbu mani ovuni ewaru ku, azini teri mani ovuni nzizaru ku.

← Chapter 10 Jump to: Chapter 12 →