Matthew 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Erini ’ba ongulumuru ndreria, eri nga tu oni dria; ka ri va ’bo, ’ba erini imbale ’diyi nga eca eri vu.

2Eri nga i ti’e zi, nga yi imba kini:

3Ba alioru orindi ma alia ’diyi yi drilebaru, te suru ’buari yini.

4’Ba candi ’bapi ’diyi yi drilebaru, te yi nga yi asi omi.

5’Ba e’yere ’diyi yi drilebaru, te yi nga angu bi awurusoru.

6’Ba e’yo kililiruri ma abiri pini fule yi avijo be ’diyi yi drilebaru, te yi nga tia ra.

7’Ba yiki be ’diyi yi drilebaru, te yi nga yiki isu ra.

8’Ba asi alaru be ’diyi yi drile ’baru, te yi nga Mungu ndre.

9’Ba asi anzuru fepi ’diyi yi drilebaru, te ’ba nga yi omve anzi Munguni

10’Ba inzale e’yo kililirusi ’diyi yi drilebaru, te suru ’buari yini.

11Emi drilebaru, ’ba ka emi o’da, ’ba ka emi inza, ’ba ka e’yo onzikanyaru dria ’yo emi ruaa, inzo lizu emi dria e’yo manisi.

12Emi ovu di ayikosi nyona be tu, te oya emini amboru ’bua; a’disiku inza ndra nabi emi drilia oko ’diyi ’dini.

13Emi a’i nyakuni; a’i nde ma aji ka i de ra, emi nga fe eri ma ovu aji be a’di afasi ya? Fu dri dika afa aluni ’yezu ku, te lu dazu amve ’bani otuzu pasi,

14Emi diza wudrikuruni. Aku sile oni driari econi i zizaru ku.

15Yi ’ini tala eri ’bazu afazu etia ku, te eri ’bazu afa tala ’bazuri ma dria uru, eri nga di ’ba dria ovupi joa ’diyi vu ani.

16Diza emini ma di ’ba ma milia ’dini, yi ma ndre ’yeta emini onyiru ’diyi, ma inzi Ati emini ovupi ’buari ani beni.

17Emi osu ma eca azita pi ’bazu toko nabi be, ’dini ku; ma eca e’yo ’bazu toko ku, te e’yoni yi ’yezu yi paria ’yeke’i.

18Ma ’yo emi tia ndi, ’bu nyaku be ka yi de ra ti, azita ma nukuta alu kani afa gakandiaru dule nyuri aluni ngani i de itu, de nga afa dria ’yeni yi ’paria leu.

19’Ba ka ngoni ti, ka azita werearu tu ’diyi ma azi alu eza ra, ka ’ba imba ’yezu ku indi, yi nga eri omve ’ba werearu tu suru ’buaria; te ’ba ka ’ye ra, ka yi imba ’ba tia indi, yi nga eri omve ’ba amboru suru ’buaria.

20Te ma ’yo emi tia, e’yo kililiru emini ka ’ba waraga sipi ’diyiniri aga ’ba Farisaini be ku, econi emini fizaru suru ’buaria ku.

21Emi eri kini yi ’yo ’ba drio ’diyi ma tia ’bo, Mi ’di ’ba ku; ’ba Ita ’ba ’di ra, e’yo lizani nga eri nde ra.

22Te ma’i, ma ’yo emi tia kini ’ba dria alu, ka ovu aokosi adripi erini be, e’yo lizani nga eri ode ra; ’ba auni ka adripi erini ede, e’yo amazani nga eri nde ra; te ’ba ka ’yo, Mi aza, e’yoni nga eri nde cazu Jehanuma aciniria.

23’Dini mi ka afa mini awa’diforuri eji pari edeta edezuria, te ’daa mi ka osu mi adripi ovu e’yo be mi vu,

24mi ku afa mini awa’diforuri pari edeta edezuri ma drilia, mi mu ti ecizu e’yo edezu mi adripi be oko raka, mi nga di emu afa mini awa’diforuri fe ndo.

25Mi ede e’yo onyiru ’ba mi topiri be mbele, de mi eri be geria; ’ba mi topiri kazu mi ejizu ’ba e’yo lipiri vu ku, ’ba e’yo lipiri kazu mi fezu asikari dri ku, kazu mi ’bezu arujoa ku;

26ma ’yo mi tia ndi, mi ngani efu aleniarisi ’de ku, kpere mini sente alu acepiri oferia ku.

27Emi eri kini ’yo e’yo ’bo, Mi ’ba ali ku.

28Te ma ’yo emi tia ’ba dria alu oku ndrepi asisile dropi drinia lisiri, ’ba ali eri be i ma asia ’bo.

29Mi mile dri ndiari ka fe mi aba ra, mi nze eri mi ruaarisi, mi ’be eri; eri mini onyiru mi rua ma esele aluni avizu, aga yini mi rua ’bezu pi Jehanumaari ra.

30Mi dri ndiri ka fe mi aba ra, mi ga eri mi ruaarisi, mi ’be eri; eri mini onyiru mi rua ma esele aluni avizu, aga mi rua driarini fizu Jehanumaari ra.

31’Yo i ’dini indi, Agu ka oku erini liro ra, eri ma fe waraga eri drozuri eri dri.

32Te ma ’yo emi tia, ’ba dria alu oku dropi, de oku nde ’bani a kuri, fe eri dri ali ’bazuni; te ’ba oku drole rari bipiri ’ba vini ali indi.

33Dika, emi eri kini yi ’yo ’ba drio ’diyi ma tia ’bo, Mi so oyo inzosi ku, te mi ma ofe oyo mini Opi dri.

34Te ma’i, ma ’yo emi tia, Mi so oyo aluni ku; kani ’bu rusi, eri oguna Munguni;

35kani nyaku rusi, eri pari erini pa ’bazuri; kani Yerusalemu rusi, eri aku amboru Meleki amborurini.

36Mi so oyo dri mini e’yosi ku, te econi mini dribi efi aluni ojazaru kani emveru kani iniru ku.

37E’yo ’yoza mini ma ovu ’dini, E, e; Yo, yo; te e’yo o’bale drinia ’diyi ibi ’ba onzi vu.

38Emi eri, ’yo e’yo ’dini, Mile, pi ma obi dri mile be, si pi si be.

39Te ma ’yo emi tia, Emi oga ’ba onzi ku. ’Ba ka mi sa o’bolo dri ndiaria, mi oja aziniri eri dri indi;

40’ba ka le mi to, bongo mini alialeruri pazu, mi ku eri dri, mi fe vini koti indi;

41te ’ba ka mi bi okposi muzu i be mailo alu, mi mu eri be iri.

42Mi fe ’ba mi zipiri dri, mi oja mi nguku ’ba lepi mari a’ipi mi driri vu ku.

43Emi eri kini ’yo e’yo ’dini, Mi le mi agyi, mi ngu ari’ba mini’i.

44Te ma ’yo emi tia, Emi le ari’ba emini, emi zi Mungu tia ’ba emi inzapi ’diyi dri,

45’dini emi ma ovu anzi ati emini ovupi ’buarini ani; te eri fe etuni di ’ba onzi piyi ma dria ’ba onyiru ’diyi be, ozoo fezu ’ba kililiru ’diyi pi ma dria ’ba kililiru ku ’diyi be.

46Emi ka ’ba emi lepi ’diyi le’i, oya emini ngoa ya? ’Ba musoro okupi ’diyi ’yeni tro tro ’dini ku ya?

47Emi ka emi adripi zi’i a’dule, ’yeta emini agapiri a’dini ya? ’Ba jururu ’diyi ’yeni tro tro ’dini ku ya?

48E’yo ’disi emi ma ovu ’yeke, ekile Ati emini ovupi ’buarini ovule ’yekerile.

← Chapter 4 Jump to: Chapter 6 →