Matthew 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1Yika eca Yerusalemua ogogo, ecazu Betifagea, kpere oni Mizeituniria ’bo, Yesu nga di ’ba erini imbale iri ’diyi ma ti ope,

2’yozu yi tia kini, Emi li aku ovupi emi driliaria, te coti emi nga akanya isu ’izaru, mva erini be,tualu; emi tru yi,eji yio ma vu.

3Ba azini ka e’yo azini ’yo emi tia, emi nga ’yo kini, Opi le yi ra; eri nga yi ti pe coti.

4E’yo ’ye i ’dini, e’yo ndra nabini ’yoleri ma eca i paria ’yeke ani, ’yozu,

5Emi olu Zioni zi ma tia, Mi ndre, meleki mini emu mi vu, eri asi e’yere be, eri ri akanya dria, akanyamva werearuri ma dria indi

6’Ba erini imbale ’diyi mu ra, nga ’ye Yesuni azile yi tiarile;

7yi eji akanya mva be, nga bongo yini o’be akanya ngukua; eri nga ri drinia.

8’Ba ongulumuru kakau nga bongo yini aja geria; ’ba azini nga pati arakala ga, aja geria indi.

9’Ba ongulumuru mupi drilenia ’diyi pi nga oyu uru, ’ba vutini bipi ’diyi be, yi ’yo ra, Hosana Daudi mvi vu! ’Ba emupi Opi ma rusiri ma ovu asi ndriza be! Hosana ’bua uru tu!

10Eri ka fi Yerusalemua, aku amboru dria oya, yo’kini, Di a’di’i ya?

11’Ba ongulumuru yo ra, Di nabi Yesu engapi Nazareti Galiliniari’i.

12Yesu eri li hekalu Munguniria, eri nga ’ba dria afa ozipi azini afa lolepi hekalua ’diyi odro amve, eri nga mesa ’ba silingi ofupi ’diyini ogu va, kiti ’ba a’balau ozipi ’diyini be.

13Eri ’yo yi tia, E’yo si i ’dini kini, Yi nga jo mani omve jo Mungu zizaniri’i; te emi oja eri oji oguouniriru

14’Ba mile draza be azini ’ba acozaru ’diyi nga eca eri vu hekalua, eri nga yi ati ra.

15Te kuhani amboru piyi ’ba waraga sipi ’diyi be ka tali erini ’yele ’diyi ndre, anzi oyupi uru hekalua ’yopi, Hosana Daudi mvi vu ’diyi be ’bo, aoko nya yi tu;

16yi ’yo eri tia, Mi eri e’yo, yini ’yoleri ra ya? Yesu nga ’yo yi tia, E, ma eri ra; te emi lani nga ’dini ku ya, kini, Mi ’ba inzita kililiru e’yo efupi anzi nyiri piyi ma tilia odekua pierisi ra.

17Eri ku yi ra, nga fu aku amboruasi muzu Betania, eri la ’dale.

18Erini emviria aku amboria o’bitisi, eri nga ovu abirisi.

19Erini elio pati ndreria geri kalaa, eri eca etinia, te eri isuni afa ruania ku te biko a’dule. Eri nga ’yo eri tia, Mi ’ya efi dika kpere ’dani ’dani ku Elio pati nderi ’wi coti.

20’Ba erini imbale ’diyi ka ndre ’bo, yi osu, kini, Elio pati ’wi coti ’doni ngoni ya?

21Yesu nga e’yo omvi, ’yo yi na, Ma ’yo emi tia ndi, emi ka ovu a’itasi, emi asi ka oti ku, emi ngani tali elio patini ’ye a’dule ku, te emi ka ’yo oni dori ma tia, Mi nze mi, ’be miria, eri nga ovu ’yezaru ra.

22Azini afa dria emini a’ile Mungu zizasi ’diyi, emi ka ovu a’ita be, emi nga yi isu ra.

23Erini firia hekalua, ’ba kuhani amboru piyi ’ba ’wara ’ba ma drilia ’diyi be nga eca eri vu erini; ’ba imbaria, ’yozu kini, Mi ’ye ’dini okpo ngonirisi ya? A’di fe mi dri okpo ’dirini ya?

24Yesu nga e’yo omvi, ’yo yi tia, Ma’i, ma vini nga e’yo alu zi emi tia indi; emi ka omvi ma dri ra, ma nga e’yo mani e’yo ’diyi ’yezu okpo ngonirisiri olu emi tia ani.

25Baputizi Yohanani eri enga ngoa ya? ’Bua kani ’ba vu ya? Yi nga yi ozi yi eselia ceni kini Ama ka ’yo ’Bua, eri nga ’yo ama tia, Emi a’ini di ku a’disi ya?

26Te ama ka ’yo ra, ’Ba vu, ama ru ’ba ongulumuru; ’ba driani a’ile kini Yohanani nabinirisi.

27Yi nga e’yo omvi, ’yo Yesu tia, Ama nini ku. Eri nga di ’yo yi tia ani, ’Dini ma oluni vini alu emi tia e’yo mani e’yo ’diyi ’yezu okpo ngonirisiri ku.

28Emi ega ngoni ya? ’Ba azini ovu anzi be iri; eri eca mva okori vu, eri ’yo ra, Mva mani, mi mu andru azi nga amvu zabibunia.

29Eri omvi e’yo, ’yo ra, Ma leni ku; te vilerisi eri nga i asi oja, mu ra.

30Eri eca mva iriri vu, eri ’yo e’yo te alurile; eri nga e’yo omvi, Ma mu ra, ma ata; te eri muni ku.

31’Ba iri ’diyi ma eselia, a’di ’ye e’yo i atini lelerini ya? Yi ’yo ra, Okori’i. Yesu nga ’yo yi tia, Ma ’yo emi tia ndi, ’ba musoro okupi ’diyi pi oku ali o’bapi ’diyi be nga fi suru Munguni ma alia emi drilia oko.

32A’disiku Yohana eri emu emi vu geri e’yo kililirunisi, te emi a’ini eri ku, te ’ba musoro okupi ’diyi pi oku ali o’bapi ’diyi be a’i erini; te emi’i, emi ka ndre ’dini ’bo ti, emi ojani emi asi vilerisi eri a’izu ku.

33Emi eri e’yo o’beza azini. Agu azini eri jo e’ini, eri isi zabibu pati amvu alia, to kali ageinia ci, ga ’bile alenia patiefi ma su nzizu, si jo izuru angu agei tezu, eri ku eri ’ba ageini tepi ’diyi dri, nga mu angu andinia.

34Ewu efinirini kazuri ka eca ogogo, eri pe ati’ba erini ma ti ’ba amvu agei tepi ’diyi vu, efi kaza erini a’izu;

35te ’ba amvu agei tepi ’diyi nga ati’ba erini obi ci, aluri yi co, aziniri yi fu kai, aziniri yi o’be onisi.

36Dika eri nga ati’ba azini ma ti ope, kakau aga oko ’diyi ra; yi nga yi ’ye dria alurile.

37Te vilerisi eri nga mvi ini ma ti pe yi vu, kini, Yi nga ma mvini inzi ra.

38Te ’ba amvu agei tepi ’diyi ka mvini ndre ’bo, yi nga ’yo yi eselia ceni, ’Di karimva angu nyapiri’i; emi emu, ama fu eri, ama pa angu erini amaniru.

39Yi bi eri, yi nga eri ’be amvu zabibuniasi amve, yi fu eri ra.

40E’yo ’disi opi amvu zabibuni ma e’ini ka eca, eri,nga ’ba amvu agei tepi ’diyi ’ye ngoni ya?

41Yi ’yo eri tia, Eri nga ’ba onzi ’diyi ma dri ja onzi, eri nga amvu zabibuni fe ku ’ba amvu agei tepi azini, ngapi efi kaza fepi eri dri ewu yini vusi ’diyi dri.

42Yesu ’yo yi tia, Emi lani e’yo siza ma alia ku ya, kini: Oni ’ba jo sipi ’diyini gale siri, oni ’diri ofu ovuzu jo kalati ma oni driruri’i, oni driru nde ’diri enga Opi vu, eri ovu ama milia e’yo

43E’yo ’disi ma ’yo emi tia, suru Mungunini nga ovu pazaru emi dri, eri nga ovu fezaru suru andini efi eriniri kapiri dri.

44’Ba e’depi oni ’dori ma driari nga ovu nyozaru, te ’ba dria erini e’dezu driniari nga ovu erezaru irifurale.

45’Ba kuhani amboru piyi ’ba Farisaini be ka e’yo o’beza erini eri ra, yi ni ra eri e’yo ’yo yisi.

46Te yi ka geri nda eri bizu, yi ru’ba ongulumuru, yini a’ile kini eri nabinirisi.

← Chapter 20 Jump to: Chapter 22 →