Matthew 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Yesuni osiria Betelehemu Yudia- aria ewu Herodeni ovuzu opirurisi, mi ndre, ’ba onduaru engapi kala etuni efurialeruria ’diyi nga eca Yerusalemua, kini,

2Mva osile opi ’ba Yahudiniruri ngoa ya? A’disiku ama ndre ’bi’bio erini etuni efuria, ama eca eri ma ru inzizu ani.

3Opi Herode ka eri ’dini, asini oti, ’ba Yerusalemua ’diyi be dria;

4eri nga kuhani amboru oku dria, karani ’ba nde ’diyini be, nga pari Kristoni osizuri zi yi tia.

5Yi nga e’yo omvi eri tia, Betelehemu Yudiaari ma alia a’disiku nabi si ndra e’yoni ’dini:

6Mi Betelehemu angu Yudaniari, mi ovuni werearu tu opi Yudaa ’diyi ma eselia, ’dini ku; ’ba ’ba dri cepirini ngale efule mi ma aliarisi, ngapi suru mani Israeliniri ocepiri’i.

7Herode nga di ’ba onduaru ’diyi omve oyokolosi, nga zi yi tia o’du ’bi’bioni e’dazuri oluzu i tia kilili;

8nga’yi ti pe Betelehemua, nga ’yo, Emi mu e’yo mvani ozi kililiru, emi ka eri isu ra emi pe e’yoni ma ti ma vu, ma’i indi ma emu eri inzizu beni.

9Yi ka e’yo opi ma tiari eri ’bo, yi mu ra; te mi ndre, ’bi’bio ndra yini ndrele etuni, efuriari nga dri ce yi drilia, de nga emuni pa sozu ’bua pari mvani ovuzuri ma drilia ku,

10Yi ka ’bi’bioni ndre ra, yi asi ovu ayikoru tu;

11yi ka fi joa ’bo yi nga odekua ndre andri Mariamu be, yi nga kumuti osi va runi inzizu; nga afa yini lonyi ta mbazu ’diyi ma ti ozi ra, afa feza fezu eri dri, mele pi, obiese pie, odu arikariruri be.

12Munguni yi imbaria orobisi kini ma mvi ’dale Herode vu ku, yi nga mvi angu yinia geri azinisi.

13Yi ka mvi ’bo, mi ndre, malaika Opini nga i e’da Yusufu vu o’du koria orobisi, kini, Mi nga, mi ’du mva andri be, mi apa Misiria, mi ovu ’dale ’dani kpere mani ’yoria mi tiaria; Herodeni ’yele lele mva ndrule drini jazurisi.

14Eri nga di nga, mva jizu andri be inisi, apazu Misiria ra;

15eri ovu ’dale kpere Herodeni draria; e’yo Opini ’yole geri nabi vurisiri ma ’ye i ani, kini, Ma omve mva mani engazu Misiriarisi ’bo.

16Etu ’dasi Herode ka ndre ’ba onduaru ede i ma e’yo ’bo, eri ovu di aokosi tu, eri nga ’ba ti pe agupianzi Betelehemu pia angu ageinia ’diyi be dria ’diyi ma dri jazu dria, e’dozu anzi eli be iri ’diyisi, azini anzi capi ’dipi ku ’diyi dria, ekile o’du erini nile kililiru ’ba onduaru ma tiarile.

17E’yo nabi Yeremiani ’yoleri nga di i ’ye ani ’yeke, kini:

18O’duko eri i Ramaa, awu pi lulu gaza ambori be, Rakelini anzi ini owu; leni ma omi i asi ku, yini ovule yorisi.

19Te Herode ka dra ’bo, mi ndre, malaika Opini e’da i Yusufu vu orobisi Misiria, kini,

20Mi nga, mi ji mva andri be, mi mu angu Israelinia; ’ba ndra mva ma dra ndapi ’diyi odra ’bo.

21Eri nga enga ra, nga di mva ji andri be fizu angu Israelinia.

22Te eri ka eri kini Arikelao nya di opi Yudiaa ati Herode ma pariani, eri ru mvizu vile; Munguni eri imbaria orobisi, eri nga i oja vile, nga fi kala Galilinia.

23Eri nga mu ri ovu aku omvele Nazaretiria; e’yo nabini ’yoleri ma ’ye i ’yeke ani, kini, Yi nga eri omve ’ba Nazaretini.

← Chapter 1 Jump to: Chapter 3 →