Matthew 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Etu ’dasi Orindi nga Yesuni enga ji roko dria obezu Satani dri.

2Ka de o’du kali su etusi inisi dria nyaka kokoru, vilerisi abiri nga eri fu ra.

3’Ba ’ba obepiri nga eca eri vu, ’yo ra kini, Mi ka ovu Mungu ma Mvi’i, mi azi oni ’doyini ofuzu enyaru.

4Eri nga e’yo omvi ’yo ra, E’yo si i ’bo ’dini, ’Ba econi ovu idriru enyasi a’dule ku, te e’yo dria efupi Mungu ma tiliarisi.

5Satani nga di eri ji aku alatararia, nga eri ’ba hekalu ma karia dria uru,

6nga ’yo eri tia, Mi ka ovu Mungu Mvi’i, mi ’be mi va; te e’yo si i ’bo ’dini, kini, Eri nga malaika erini azi e’yo minisi, azini Yi nga mi ’du uru dri yinisi, mi kazu mi pa sizu oni dria ku.

7Yesu nga ’yo eri tia kini, E’yo si i’bo, dika, Mi obe Opi Mungu mini ku.

8Dika Satani nga eri ji oni izuru turi ma dria, nga eri dri opi nyaza wudrikurua ’diyi ece dria, diza yini be;

9nga ’yo tinia, ’Diyi dria ma nga fe mi dri, mi ka mi eco ma drilia ma inzizu.

10Yesu nga di ’yo eri tia, Mi da mi ’dale, Satani! te e’yo si i ’bo, kini, Mi ma inzi Opi Mungu mini, mi ma nga azi eri dri a’dule.

11Satani nga di eri ku ra; te mi ndre, malaika nga eca ayua ayuzu eri dri.

12Te ka eri kini fe Yohanani aruru ’bo, eri nga mvi Gailia;

13eri nga Nazaretini ku ra, nga emu ovu Kaperinaumua, aku nde miri tia, kala Zebuluni pini Nafutali beria;

14e’yo ndra nabi Isayani ’yoleri ma ca i paria ’yeke ani, kini:

15Angu Zebulunini pi angu Nafutalini pie, geri miria, Yoridania ’aa’dasiri pie, Galili ’ba juruniri be-

16suru ripi angu inideiriari ndre diza amboru ra, ’ba ripi angu drani dra ma endrilendriari ma alia ’diyi dri diza efu ’bo.

17Engazu 0’du ’dasi Yesu nga ’ba e’yo olu, nga ’yo kini, Emi oja emi asi; suru ’buari eca ogogo ’bo.

18Erini aciria miri Galiliari ma tia, eri nga adripi ndre iri, Simoni omvele Peterori pi adripi erini Andarea be, yi ri emba ’be miria; yini ovule ’ba e’bi okupi ’diyirisi.

19Eri nga ’yo yi tia, Emi bi ma vuti, ma nga emi ’ba ’ba ’ba okupi ’diyiru.

20Yi nga emba yini ku coti, nga eri ma vuti bi.

21Engazu ’daarisi, eri nga mu drile, nga adripi iri azini ndre, Yakobo Zebedayo mvi pi adripi Yohana be, yi ovu oguru alia ati Zebedayo pie, emba yini ederia; eri nga yi omve.

22Yi nga oguru pi ku yi ati be coti, nga eri vuti bi.

23Yesu nga aci Galili ma alesi dria, ’ba imbazu pari ’bani yi okuzu ’diyia, e’yo bari suruniri oluzu, azo pi dra be atizu ’ba ruaa dria.

24E’yo erini nga ku angu Suriania dria, yi nga ’ba dria azo be ’diyi eji vunia, ’ba ovupi azo ndu be ’diyi pie, ’ba drani inzale ’diyi pie, ’ba orindi onzi be ’diyi pie, ’ba ediani o’bele ’diyi pie, ’ba acozaru’diyi pie dria, eri nga yi ati ra.

25’Ba ongulumuru engapi Galili pia Dekapoli pie, Yerusalemu pie, Yudia pie, Yoridania ’aa’dasiri pie ’diyi nga eri ma vuti bi.

← Chapter 3 Jump to: Chapter 5 →