Matthew 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1Etu ’dasi ’ba erini imbale ’diyi nga eca Yesu nga ’yo ra, A’dini nga ovu amboru suru ’buarima aliani ya?

2Eri nga mva were omve i vu, nga eri ’ba pa sozu yi ma,eselia,

3eri nga ’yo ra, Ma ’yo emi,ria ndi, emi ka emi oja ovuzu anzi nyiri nyirile ku, emi ngani fi suru ’buaria aluni ku.

4E’yo ’disi ’ba,azini ka i oja afu kokoru ekile mva were’dirile, ’ba nderi eri ’ba amboru suru ’buari ma alia.

5Te ’ba azini ka mva were ’dinileru alu a’i ma rusi, eri a’i ma’i;

6’ba azini ka anzi nyiri ma a’ipi ’diyi ma azi alu fe aba ra, onyiru yi ma ombe oni amboru anya ’izuri eri ombelea, ma ’be eri yi aliru miriniri ma alia.

7Candi nyaku dri e’yo ’bani abazu ’diyisi! E’yo ’bani abazu ani ’diyi ma emu ecekokoru, te candi ’ba nde e’yo ’bani ani abazuri ejipiri dri!

8Mi dri, kani mi pa, ka fe mi aba, mi li eri va, mi ’be mi ageiarisi ziri; eri onyiru mi dri fizu idria dri utrulu be, kani pa duluru beri, aga yini mi ’bezu aci inyukokoru ma alia dri iri be, kani pa iri beri ra.

9Mi mile ka fe mi aba, mi nze eri, mi ’be eri mi ageiansi ziri; eri onyiru mi dri fizu idria mile alu beri aga yini mi ’bezu Jehanuma aciniria mile ir beri ra.

10Emi ma ovu mile be emi ma ede anzi nyiri ’diyi ma azi aluni ku; te ma ’yo emi tia kini malaika yini ’bua ’diyi yi Ata mani ovupi ’buari ma mile ndre etu dria.

11Te Mvi ’bani emu afa avipiri pazu ra.

12Emi osu ngoni ya? Agu alu ka ovu kabilo be turu, yi ma eselia alu ka avi eri dri ra, eri ngani kali oromi drini oromi ’diyi ku oni dria, muzu te avipiri ndruzu ku ya?

13Eri ka ’eri isu ra, ma ’yo emi tia ndi, eri ovu ayiko be erisi aga kali oromi drini oromi avipi ku ’diyisiri ra.

14’Dinile Ati emini ovupi ’buari leni anzi nyiri ’diyi ma azi aluni ma ja dri yi eselia ku.

15Mi adripi ka mi eza ra, mi mu eri imba emi irisi; a’dule. Eri ka mi ti eri ra, ’mi isu mi adripi ’ba miniru ’bo

16Te eri ka eri ku, mi ji ’ba, alu, kani ’ba iri mi be indi, ’dini e’yo dria ma so pa ’ba e’yo eti nzepi ’ba iri kani na ’diyi ma tisi ani.

17Eri ka e’yo yini ’yoleri ga si, mi ’yo kanisa tia; eri ka e’yo kanisani ga si, eri ma ovu mi dri ekile ’ba jurule kani ’ba musoro okupirile.

18Ma ’yo emi tia ada, afa dria emini ombele nyakuari nga ovu ombezaru ’bua, azini afa dria emini trule nyakuari nga ovu truzaru ’bua indi.

19Ma ’yo emi tia dika kini ’ba iri emi eselia ka ti eci tualu nyakua e’yo alu dria yini zile ’diyisi Ata mani ovupi buari nga eri ’ye yi dri

20Te pari ’ba iri kani ’ba na yini yi okuzu tualu ma rusiria pari ’daa ma indi yi eselia.

21Vutinia Petero riga di eca, nga ’yo eri tia, Opi, adripi mani nga eza pale si ka, mani e’yo onzi erini kuzu ya? Kpere ecazu pale aziri ya?

22Yesu nga ’yo eri tia, Ma ’yoni emi tia, Ecazu pale aziri, ’dini ku; te, Ecazu kali aziri pale aziri.

23E’yo ’disi suru ’buari ovu ekile agu melekiru lepi afa erini lazu nizu kani si ya, ati ’ba erini berile.

24Erini ’baria laria, yi nga ’ba alu mari erini nyapi talamo alifu mudriri eji eri vu;

25te erini ovuria afa kokoru mari ofezurisi, opi nga azi yi ma fe eri ozizu, oku pie, anzi pie, afa erini ovuzu yi be ’diyi be dria, mari nde ofezu,

26Ati’bo nde nga di ceo va eri inzizu, kini, Opi, mi ’ye ma be e’yere, ma nga afa ofe mi dri dria ra.

27Opi ati’bo ndeni nga ovu yikisi eri vu, nga eri tru ra, nga mari nde ku eri dri ra.

28Te ati’bo nde ’dari nga fu, nga ati’ba i agyiru ’diyi ma azi isu alu, ndra mari erini nyapi silingi turu aluri; eri nga eri bi ombelekoa nzizu, kini, Mi ofe mari mini nyaleri.

29’Dini ati’bo eri ma agyiru nga i eco va, nga matu ’ba eri vu, kini, Mi ’ye ma be e’yere, ma nga mi afa ofe ra.

30Te eri leni ku, te eri mu eri ’bezu arujoa, ecazu erini ngazu mari erini nyaleri ofezuria.

31’Dini ati’ba agyiru ’diyi ka e’yo yi ’yepi ’diyi ndre ra, ovu candisi tu, yi nga emu e’yo dria yi ’yepi ’diyi olu opi yini ma tia.

32Opi erini nga di eri omve, nga ’yo ra, Mi’i, mi ati’bo onzini, ma ku ndra mari ’dari mi dri dria ra, mini matu ’bale ma vurisi;

33eri ovuni onyiru mini ovuzu yikisi ati’bo mi agyiruri vu, ekile ndra mani ovule yikisi mi vurile ku ya?

34Opi erini nga ovu adrasi, nga eri fe ’ba ’ba ecandipi ’diyi dri, ecazu erini ngazu mari erini nyaleri ofezu driaria.

35Ati mani ovupi ’buari nga ’ye emi be ’dinile indi, emi alu ka emi adripi ma e’yo ku asi driasi kuria.

← Chapter 17 Jump to: Chapter 19 →