Matthew 15

Lugbara (E’yo Siza Alatararu Munguniri BIBLIA)

← Chapter 14 Jump to: Chapter 16 →

1Vilerisi ’ba Farisaini piyi ’ba waraga sipi ’diyi be nga enga Yerusalemua, emuzu Yesu vu, yi ’yo ra,

2’Ba mini imbale ’diyi yi e’yo a’bini idrileri eza a’disi ya? Te yi ojini yi dri nyaka nyaria ku.

3Yesu nga e’yo omvi, ’yo yi tia, Emi azita Munguni eza e’yo a’bi eminini idrilerisi a’disi ya?

4Te Mungu ’yo ndra, Mi inzi mi ati pi mi andri be; azini, ’Ba ka i ati pi o’da andri be, drazaruni ma dra ra.

5Te emi ’yo kini, ’Ba ka ’yo i ati pi ma tia i andri be, Afa mani ngazu mi aza kozuri, ma fe Mungu dri awa’diforu;

6eri ngani di i atini inzi ’de ku. Emi ’ba de e’yo Munguni toko, e’yo idriza eminisi.

7Emi ’ba lokiri be ’diyi! Isaya ondri ndra e’yo emisi ’yeke, kini:

8Suru ’dori yi ma inzi tisi, te yi ma asi ovu ma be re;

9te yi ma inzi toko, azita ’bani imbazu imbataru’i.

10Eri nga ’ba ongulumuru omve i vu, nga ’yo yi tia, Emi eri, emi va e’yo:

11afa fipi ’ba tiliari ezani ’bani ku, te afa efupi ’ba ma tiliari eri ’ba ezani.

12’Ba erini imbale ’diyi nga di emu eri vu, ’yozu eri tia, Mi ni ra kini ’ba Farisaini yini e’yo ’diri eriria, e’yoni ’de yi asia onzi ya?

13Te eri nga e’yo omvi, ’yo ra, Afa saza dria ma Ati ’buarini saleni kuri, yi nga oku ra.

14Emi ku nga ’ba ’diyi; yi ’ba dri cepi mile kokoru ’diyi. ’Ba mile kokoru ka i agyi mile kokoru ma dri ceni, yi iritro nga o’de ’bilia.

15Petero nga e’yo omvi, ’yo eri tia, Mi nze ama dri e’yo o’beza ma eti.

16Eri nga ’yo ra, Emi’i indi, emi nga kiri e’yo vaza kokoru ya?

17Emi nini ku kini afa fi pi ’ba ma tileari, eri aga fi anyajoa, eri nga ovu ’bezaru jo werea ya?

18Te afa efupi ’ba ma tilia ’diyi, yi enga ’ba ma asia; afa ’diyi ’ba ezani.

19A’disiku engazu asia e’yo osuza onzi ’diyi efuni, ’ba fuza pi, ali ’baza pi, awu pi, ogu pi, e’yo eti nzeza inzoruri pi, a’data pie.

20E’yo ’diyi yi ’ba ezani; te nyazu dri ojikokoru ezani ’bani ku.

21Yesu nga enga ’daarisi, fu mu kala Turo pini Sidoni beria.

22Te mi ndre, oku Kanani ezoruri nga efu kalati ’dasi, nga Oyu uru kini Mi ovu yiki be Ma vu, Opi, mvi Daudini; Ma zini azoru tu orindi onzi be.

23Te eri omvini e’yo eri tia ku. ’Ba erini imbale ’diyi nga eca nga matu ’ba eri vu kini, Mi pe eri tia mvizu, erini otrele ama vutiarisi.

24Eri nga e’yo omvi ’yo ra, Epe ndra ma ti ’ba azini vu ku, te kabilo avipi suru Israelinia ’diyi vu a’du1e.

25Te eri nga eca eri vu, nga eri inzi, kini, Opi, mi ko ma aza fo!

26Te eri nga e’yo omvi kini. Ovuni onyiru nyaka anzini ’duzu ’bezu oce dri ku.

27Te eri nga ’yo ra, Ada, Opi, te oce yi adri anyaka nyiri o’depi va mesa yi ma opini etia ’diyi nya ra.

28Yesu nga di e’yo omvi, ’yo eri tia kini. Oku la, a’ita mini eri amboru! Ma ’ye i mi dri mini lelerile. Te zamva erini nga ati etu ’dasi ra.

29Yesu nga di enga ’dale, nga eca miri Galilini ma tia ogogo.Eri nga tu oni dria uru, nga ri ’dale.

30’Ba ongulumuru kakau nga emu eri vu, yi be ’ba acozaru piyi, ’ba dri ondrizaru pie, ’ba mile drazaru pie ’ba e’yo ’yopi kuri pie, ’ba azini be kakau; yi nga yi o’ba eri ma palaa eri nga yi ati ra.

31’Dini ’be ongulumuru nga osu tu, yini ndreri: ’ba e’yo ’yopi ku ’diyi yi e’yo ’yo ’ba dri ondrizaru ’diyi yi ma rua ati ra, ’ba acozaru ’diyi yi aci, ’ba mile drazaru ’diyi yi angu ndre; yi nga di Mungu Israelini inzi ra.

32Yesu nga ’ba erini imbale ’diyi omve i vu, nga ’yo ra, Ma asi ndri ’ba ongulumuru ’diyi vu, yini tele ma be o’du na nyaka kokorurisi; ma leni yi ti pe mvizu abirisi ku, icima koro kazu yi o’bezu geria ku.

33’Ba erini imbale ’diyi nga ’yo eri tia, Ama nga mikate isu kakau ’dipi, angu rokoa ’doa ngoa, ’ba ongulumuru ’dopi ’doyini trazu ani ya?

34Yesu nga ’yo yi tia kini, Emi ovu ikate be si ya? Yi nga ’yo ra, Aziri, azini e’bi were indi.

35Eri ga azi ’ba ongulumuruni rizu va yakua,

36eri nga mikate aziri ’diyi ’du e’bi be, nga awa’difo fe, ga yi onyo ra fezu ’ba erini imbale ’diyi dri, ’ba erini imbale ’diyi nga fe ’ba ongulumuru dri.

37Yi dria nga nya ra, nga tra ra; yi nga onyole ’diyi ma joloko oku abaka aziri alia tre.

38’Ba nyapi ’diyi me kalafe alifu su, ’di agupini; oku pi anzi be lani ku.

39Eri ka ’be ongulumuru ma ti pe mvizu ’bo, eri nga tu ogurua, nga zo ’aa’dasi, cazu ngu Magadania.

← Chapter 14 Jump to: Chapter 16 →