Matthew 22

Lugbara (E’yo Siza Alatararu Munguniri BIBLIA)

← Chapter 21 Jump to: Chapter 23 →

1Yesu nga e’yo omvi, ’yo yi tia dika e’yo o’bezasi, kini,

2Suru ’buari ovu ekile ’ba melekiru; omu oku bizaniri ’hapi mva ini dririle,

3eri pe ati’ba erini ma ti ’ba ndra erini omvele omu oku bizani nyazu ’diyi omvezu; te yi ga emuko si.

4Eri pe ati’ba azini ma ti dika, eri ’yo ra, Emi olu ’ba omvele ’bo ’diyi ma tia, Mi ndre, ma a’di nyaka mani ’bo, oli ranya mani piyi anyapa osoru ’diyi be ’bo, afa dria ovu ngonde; emi ma emu omu oku bizaniria.

5Te ’ba ’diyi ’bani asi drinia ku, yi mu ra, ’ba alu amvu inia, aziniri afa oziza inia;

6’ba acepi ’diyi bi ati ba erini ci, nga drinza fe yi dri, nga yi fu ra,

7Te meleki ovu adrasi; eri pe asikari, ini ma ti, ja ’ba ’ba fupi ’dayi ma dri, eve aku yini acisi dria ra.

8Eri nga di ’yo ati’ba ini ma tia, Omu oku bizaniri ovu edezaru, te ’ba ndra omvele ’bo ’diyi ovuni onyiru ku.

9Emi mu geri gbokoni yi ecizuria, azini ’ba dria emini isule ’diyi, emi ma omve yi emuzu omu oku bizaniria.

10Ati’ba ’dayi nga di fu mu gbokoa, nga ’ba dria yini isule ’diyi oku, ’ba onzi piyi ’ba onyiru ’diyi be; ’dini omu ga tre ’ba ripi ’diyisi.

11Te melekini firia ’ba ripi ’diyi andrizu, eri nga ’ba alu ndre ’daa afa suza omuni kokoru;

12eri nga ’yo eri tia, Ma agyi, mi efi ’doa afa suza omuniri kokoru ngoni ya? Te eri adri ciri.

13Meleki nga di ’yo ’ba azi ngapi ’diyi ma tia, Emi ombe eri ma pa pi dri be ci, emi ’be eri angu inicicirua amve; ’daa awu pi sikala nyaza be nga ovuni.

14Te ’ba kakau ovu omvezaru, te ’ba opele ’diyi were.

15Vutinia ’ba Farisaini nga emu, ti ecizu tualu e’yo otuzu eri mbazu e’yo erini ’yoleri ma alia.

16Yi nga, ’ba yini imbale ’diyi pi ma ti pe eri vu ’ba Herodeni be, kini, ’Ba ’ba Imbapiri, ama ni ra mi ’ba adani, mi geri Munguni imba e’yo adarurisi, mi asini ’ba aluni ma e’yosi ku; mini ’ba opele kurisi.

17Mi olu di amani, mi ega ngoni ya? Azita a’i amani musoro ’bezu Kaisari dri, kani ’dini yo?

18Te Yesuni e’yo onzi yini niria, nga ’yo ra, Emi ma ole a’disi ya, emi ’ba lokiri be?

19Emi ece ma dri aya musoroniri. Yi nga silingi eji eri dri.

20Eri ’yo yi tia, Wura ’dori e’yo siza driniari be yi a’dini ya?

21Yi ’yo ra, Kaisarini. Eri nga di ’yo yi tia, Emi fe afa Kaisarini Kaisari dri, azini afa Munguni emi ma fe Mungu dri.

22Yi ka eri ’dini ’bo, yi osu tu; yi nga eri ku, nga mu ra.

23O’du ’darisi ’ba Sadukayoni,, ’yopi kini engata yo ’diyi, nga emu eri vu, nga zi eri tia kini,

24’Ba ’ba Imbapiri, Musa ’yo ndra ’dini, ’Ba azini ka dra anzi kokoru, adripi erini nga oku erini omvi, nga ori ti i adripi dri.

25Adripi aziri ndra ama eselia indi; okori ka oku bi ’bo, dra ra, erini ovule ori kokorurisi ku oku ini adripi dri.

26’Dinile ’ba iriri indi, azini nari, cazu kpere yi aziri dria.

27Yi dria ma vutia oku nde nga dra indi

28Ka’dini engata ma alia, ’ba aziri ’diyi ma eselia, eri nga ovu oku a’dini ya? yi driani eri bile okururisi.

29Te Yesu nga e’yo omvi, ’yo yi tia, Emi aba emini e’yo siza pi nile okpo Munguni be kurisi.

30A’disiku engata ma alia ’ba ngani oku bi ku, azini ’ba feni oku ’ba dri ku indi, te yi nga ovu ekile malaika ’bua ’diyile.

31Te engata ’ba draza eseliari ma e’yosi, emi lani nga e’yo Munguni ’yole emi tia kini,

32Ma Mungu Iburahimu, ma Mungu Isakani, ma Mungu Yakoboni-ri ku ya? Mungu ovuni Mungu ’ba drazani ku, te ’ba idriruni.

33’Ba ongulumuru ka eri ’dini, yi osu tu imbata erinisi.

34Te ’ba Farisaini ka eri kini eri ombe ’ba Sadukayoni ma ti ci, yi nga yi oku tualu.

35’Ba alu yi eselia, ’ba azita nipiri, nga e’yo zi eri tia eri o’bizu.

36’Ba ’ba Imbapiri, e’yo aziza ma eselia, azita ngori amborunini ya?

37Eri nga ’yo eri tia,Mi ma le Opi Mungu mini mi asi driasi, mi orindi driasi, ondua mini driasi.

38’Dori azita amboru okori’i.

39Iriri ovupi erileri ’di’i, Mi ma le mi agyi ekile mini mi ngulupi lelerile.

40E’yo aziza dria pi nabi be oti yi azita iri ’diyi ma ruaa.

41’Ba Farisaini yini ti okuria tualu, Yesu nga zi yi tia,

42kini, Emi ega e’yo Kristoni ngoni ya? Eri a’di mvi’i ya? Yi ’yo eri tia, Daudi mvi’i.

43Eri ’yo yi tia, Ka adri ’dini, Daudi nga di eri omve Orindisi, Opi’i, ngoni ya, erini ’yoria kini,

44Opi ’yo Opi mani ma tia, Mi ri ma dri ndiria, de nga ma ’bani ari’ba mini mi pa age lea ku?

45Ka’dini Daudi ka eri omve Opi’i, eri ovu di mva eriniru ngoni ya?

46’Ba aluni econi e’yo omvizaru eri tia aluni ku, azini engazu o’du ’dasi ’ba aluni asi teza be e’yo zizu eri tia dikani yo.

← Chapter 21 Jump to: Chapter 23 →