Matthew 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1’Ba Farisaini piyi nga eca ’ba Sadukayoni be eri o’bizu, nga zi eri tia eri ma ece eceta engapi ’buari yi dri.

2Te eri nga e’yo omvi, ’yo yi tia kini, Ka eca ondresi, emi adri ’yo, Anguni nga ovu onyiru, ’buni ovule ekarurisi.

3Te o’bitisi, Andru angu mile onzi, ’buni ovule ekaru azini iritini ovule inirurisi. Emi ni ’bu ma mile amazu ra ’bo, te eceta ewuniri emi econi amazu ku.

4A’bianzi onzi ali o’bapi ’diyi yi eceta nda, te yi ngani eceta fe yi dri ku, pe lu eceta Yonani. Eri nga yi ku ra, mu ra.

5’Ba erini imbale ’diyi nga ca ’aa’dasi, te yi ma dri avi mikate jizu ra.

6Te Yesu nga ’yo yi tia, Emi ndre emi te emi agei akufi ’ba Farisaini pini ma e’yosi ’ba Sadukayoni be.

7Yingae’yo ega yi eselia, ’yo kini, Ama ejini mikate ku.

8Yesu ka ni ra eri nga ’yo ra, Emi a’ita be were ’diyi la, emi e’yo ega emi eselia emini ovule mikate kokorurisi a’disi ya?

9Emi vani nga kiri ku, emi egani mikate towi ’ba alifu towi driri ku ya? Emi o’du ndra evu si ya?

10Kani mikate aziri ’ba alifu su driri, emi o’du abaka si ya?

11Emi vani ku kini ma ’yoni e’yo mikateni emi tia ku ngoni ya? Te emi te emi agei akufi ’ba Farisaini pini ma e’yosi ’bai Sadukayoni be.

12Yi nga di va ani kini eri ’yoni e’yo agei tezu akufi mikateni ma e’yosi ku, te yi agei tezu imbata ’ba Farisaini pini ma e’yosi ’ba Sadukayoni be.

13Yesu ka eca angu Kaisari Filipiniria, eri nga ’ba erini imbale ’diyi zi kini, ’Ba kini Mvi ’bani eri a’edi’i ya?

14Yi nga ’yo ra, ’Ba azini kini Yohana baputizi fepiri’i, ’ba azini kini Eliya’i, azini kini Yeremia’i kani ’ba nabiru ’diyi ma azi.

15Eri nga ’yo yi tia, Te emi’i, emi kini ma a’di’i ya?

16Simoni Petero nga e’yo omvi, ’yo ra, Mi Kristo Mungu idriruri ma Mvi’i.

17Yesu nga e’yo omvi ’yo eri tia, Mi ovu drilebaru, Simoni Yona mvi, Te rua pi ari be eceni e’yo ’diri mi drini ku, te ma Ati ovupi ’buari

18Te ma ’yo mi tia, mi Petero’i, ma nga kanisa mani si kata ’dori ma dria, azini Pari ’ba drazaniri ma kalitile ngani eco eri ndezaru ku.

19Ma nga kifungula suru ’buarini ’diyi fe mi dri, afa dria mini ombele nyakuari nga ovu ombezaru ’bua, azini afa dria mini trule nyakuari nga ovu truzaru ’bua indi

20Vutinia eri nga eli ’ba erini imbale ’diyi imba ci yi ma ’yo ’ba aluni ma tia kini eri Kristo’i ku.

21Engazu etu ’dasi Yesu ’ba e’yo ece ’ba erini imbale ’diyi ma tia kini i ma mu Yerusalemua candi isuzu ’ba ’wara piyi dri ’ba kuhani amboru pie, ’ba waraga sipi ’diyi be, kini i nga ovu fuzaru, te o’du nasi i nga enga ra.

22Petero nga eri bi, nga ’ba ega eri dria ’yozu kini, ’Dini yo fo, Opi la! E’yo ’diri ma ’ye i mi ruaa aluni ku.

23Te eri oja i, nga ’yo Petero tia, Mi da mi vile ma ngukua, Satani! Mi ma dri kumuru, mini e’yo Munguni egale ku te e’yo ’bani egale’irisi.

24Yesu nga di ’yo ’ba erini imbale ’diyi ma tia, ’Ba azini ka le mu ma vutia, eri ma ga i ma ngulupi si, ma ’du pati alaza ini, ma bi ma vuti.

25’Ba ka le idri ini pa ra eri nga idri nde avi ra, te ’ba ka idri ini avi e’yo manisi eri nga eri isu ra.

26Te agu ka angu wudrikuru nya dria, eri nga orodri ngoni isu idri erini ka avi ra ya? Agu nga afa ngoni ofe idri ini ma paria’i ya?

27Te Mvi ’bani nga emu diza Ata erinini be, malaika erini pie; etu ’dasi eri nga di afa ofe ’ba dria alu ’lalu dri, azi yini ngaleri vusi.

28Ma ’yo emi tia ndi, ’ba pa sopi ’doa ’diyi ma azini indi, yi ngani dra ma ali o’bi ku, de nga yi ndreni Mvi ’banini emuria suru ini ma alia ku.

← Chapter 15 Jump to: Chapter 17 →