Matthew 23

Lugbara (E’yo Siza Alatararu Munguniri BIBLIA)

← Chapter 22 Jump to: Chapter 24 →

1Vutinia Yesu nga di ’yo ’ba ongulumuru piyi ma tia ’ba erini imbale ’diyi be,

2eri kini, ’Ba waraga sipi ’diyi pi ri oguna Musaniri ma dria ’ba Farisaini be;

3e’yo ’disi e’yo dria yini ’yoleri emi ’ye, emi bi, te emi ’ye ’yeta yini ’yelerile ku; a’disiku ’yozaruni yi ’yo ra, te yi ’yeni ku.

4Te yi ombe teri nzizaru ’bani ecole ’dule ku ’diyi, yi ’ba yi ’ba ma ombetia; te yi ma ngulupi leni yi mizu drimva yinisi, ku.

5Te ’ye,ta,yini ’yeleri dria yi ’ye ba ma mila, ba ma ndre beni; te yi ombe e’yo siza ma verisi azini walaru, o’i yi drilebaru yi ma ruaa, yi ere yi ma bongo ti amboru,

6omu ma alia yi le kiti okori, azini pari ’bani yi okuzuria yi le kiti drile ’diyi,

7yi le ’ba ma zi yi ci cuua, ’ba ma omve yi Imbapi’i indi.

8Te emi ma ovu omvezaru Imbapi’i ku, te ’ba emi imbapirierialu,emidria adripini.

9Nyakua ’doa emi omve ’ba aluni ati eminiru ku, a’disiku ’ba alu eri Ati eminiruni, eri ’bua.

10’Ba ma omve vini emi ’ba ’ba dri cepiri’i ku, a’disiku ’ba emi dri cepiri eri alu, Kristo’i.

11Te ’ba emi eselia agapi ambosiri eri ’ba emi aza kopi azisiri’i;

12te ’ba dria i ngulupi enyapi ’bapi ururi yi nga eri omvi ele, te ’ba dria i ngulupi omvipi eleri yi nga eri ’ba uru.

13Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini suru ’buari ma ti opile ’ba ma milia cirisi; te emi’i, emi fini ku, emi a’ini vini ’ba ’yepi fipi ’diyini fizu ku.

14Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi jo awuzini nya, emini de Mungu ziria izuru inzosi; e’yo ’disi emi nga ovu e’yo liza be aga ra.

15Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi aci gorigori miria azini nyaku a’wiru ma dria, ’ba alu ojazu emi vu; eri ka ofu ’dini ’bo, emi eri oja mva Jehanumaniru aga emi ra pale iri.

16Candi emi dri, emi ’ba ’ba dri cepi mile kokoru, ’yopi kini, ’Ba ka oyo so hekalu rusi, ’di e’yoni yo; te ’ba ka oyo so dahabu hekalu aliari ma rusi, eri mari be, ’diyi.

17Emi ’ba ondua kokoru azini mile odraza be ’diyi Te ngori agani ya, dahabuni, kani hekalu dahabu nde ’bapi alatararuri’i ya?

18Azini emi kini, ’Ba ka oyo so pari edeta edezuri ma rusi, ’di e’yoni yo; te ’ba ka oyo so feta ovupi driniarisi, eri mari be.

19Emi ’ba mile draza be ’diyi Te ngori agani ya, fetani, kani pari edeta edezu feta nde ’bapi alatararuri’i ya?

20’Dini ’ba ka oyo so pari edeta edezuri ma rusi, eri so oyo erisi afa dria ovupi drinia ’diyisi indi;

21’ba oyo sopi hekalu rusiri eri so oyo erisi, azini Eri’i ovupi aleniarisi indi.

22Azini ’ba oyo sopi ’bu rusiri, eri so oyo oguna Mungunirisi, azini Eri’i ripi driniarisi indi.

23Candi emi dri, ’ba waraga sipi ’diyi pi ’ba Farisaini be, emi ’ba lokiri be! a’disiku emi adri tibi pi ma esele mudri ’diyi ma azi aluri fe ra, afa arikariruri pi, jipa pie, mondrokolo omvele kuminori pie, de emi ku e’yo ’wara azitani ’diyi ja, e’yo lizu kililiruri pi, yiki pie, a’ita be; onyiru ’ba ma ’ye ’diyi ra, te ’ba ma ku azini ’dayi ’yekokoru ku.

24Emi ’ba ’ba dri cepi mile draza be ’diyi! Yiyiaruni emi adri ndra ra, te ngamiaruni emi mvu pi ’dani!

25Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini erejea pi ma nguku ojile otekua be alarurisi, te alialeru yi ga tre afa opaza pisi ’yeta saaruri be.

26Mi ’ba Farisaini mile draza beri’i mi oji erejea pi ma ale otekua be raka, ngukuni ma ovu ani a1aru indi beni.

27Candi emi dri, ’ba waraga sipi ’diyi pi ’ba Farisaini be, emi ’ba lokiri be! emi si emi ekile nyadri ’bani trile ivisi ’diyile, amveleru yi e’da ndrizaru, te alialeru yi ga tre ’ba ma avu ma fala piyisi afa maza be dria.

28Emi tro ’dini indi, amveleru emi e’da ’ba vu ekile ’ba kililirule, te alialeru emi ga tre lokiri pisi ezata be.

29Candi emi dri, ’ba waraga sipi ’diyi pi ’ba Farisaini be, emi ’ba lokiri be! emini nyadri nabini silerisi, emini nyadri ’ba kililiru ’diyini edele ndrizarurisi indi,

30emi ’yo ra, Ama ka ovu ndra ewu ama a’bipini ovuzu ’dayisi indi, ama ecini ndra ti yi be nabi ma ari adazu ku.

31’Dini emi ece emi ceni, emi ’ba nabi fupi ’diyi ma anzi.

32Emi ma fe di afa o’biza emi a’bipini ma ga tre!

33Emi uri, boroa ma oriru ’diyi, emi nga apa e’yo liza ’bani dri jazu jehanumaarisi ngoni ya?

34Te mi ndre, e’yo ’disi ma nabi piyi ma ti ope emi vu, ’ba ondua be ’diyi pie, ’ba waraga sipi ’diyi be; emi nga ’ba ’diyi ma azi ofu ra, azini di pari ruaa, yi ma azi emi nga co kalisi pari emini emi okuzuria, emi nga yi odro aku vusi aku vusi;

35’dini ari dria ’ba kililiruni ovu pi adazaru nyaku driari nga emvi emi dria, e’dozu ari Habili ’ba kililirurinisi ecazu Zakaria Barakia mvi, emini fule hekalu pi ma eselia pari edeta edezuri beri ma ari vu.

36Ma ’yo emi ria ada, e’yo ’diyi dria yi nga eca a’bianzi ’doyi ma dria.

37Yerusalemu la! Yerusalemu la ’ba nabi ofupiri, ’ba ti pele mi vu ’diyi o’bepi onisiri Ma le ndra anzi mini oku ekile ariani anzi ini okule opile etiarile pale si, te emi ga si

38Mi ndre, jo emini ovu kuzaru emi dri andruru.

39Te ma ’yo emi da, Emi ngani ma ndre dika aluni ku, engazu curu’do de nga emi ’yoni kini, Asi ndriza ma ovu ’ba emupi Opi ma rusiri ma dria, ’dini ku.

← Chapter 22 Jump to: Chapter 24 →