Matthew 27

Lugbara (E’yo Siza Alatararu Munguniri BIBLIA)

← Chapter 26 Jump to: Chapter 28 →

1Te anguni atiria o’bitisi, kuhani amboru ’diyi pi ’ba ’wara ’ba drilia ’diyi be dria nga ti eci pari alua e’yo Yesunisi eri fuzu beni;

2yi nga eri ombe, nga eri ji fe gavena Pilato dri.

3Etu ’dasi Yudasi ’ba eri fepiri, ka ndre yi li dra eri dria ’bo, eri nga di i asi oja, nga silingi kali na omvi kuhani amboru piyi dri ’ba ’wara be,

4kini, Ma eza ra, mani ’ba ezata kokoruri ma ari fele razurisi. Te yi ’yo ra, ’Di e’yo amani ngoa ya? ’Di e’yo mini.

5Eri nga silingi ’be, ku hekalu alia,nga mvi mu i ti ra

6Kuhani amboru nga silingi ’du, nga ’yo kini, Econi yi ’bazaru pari afa Munguni ma la mbazuria ku, yini ovule ari ma ajenirisi.

7Ka e’yo ede ’bo, yi nga ani amvu ’ba imvu sipirini je, ani’ba sazu.

8’Dini omve amvu nderi Amvu Arini, ecazu kpere andru.

9’Dini e’yo nabi Yeremiani ’yoleri eca i paria ’yeke, kini, Yi ’du silingi kali na, ’ba aje lile driniari ma aje, anzi Israelini lileniri,

10yi fe di yi ani amvu ’ba imvu sipirini jezu, Opini e’yoni azile ma tiarile.

11Yesu nga pa so gavena ma milia; gavena nga eri zi kini, Mi meleki ’ba Yahudini ya? Yesu nga ’yo eri tia, Mi ’yo ’yeke.

12Kuhani amboru ’diyi pini asu suria eri ruaa ’ba ’wara ’diyi be, eri omvini e’yo aluni ku.

13Pilato nga di ’yo ani eri tia, Mi erini e’yo ambo ambo yini sule mi ruaa ’dini ’diyi ku ya?

14Te eri omvini eri tia e’yo ani alu ’dininiku; ’dinigavena nga ani osu tu.

15Te omu vusi, gavena adri ’ba aruru yini pele aluri tru fe ’ba ongulumuru dri.

16O’du ’dasi yi ovu ’ba bile arujoa, ru kupi tu, omvele Baraba’iri be.

17Yini ti okuria, Pilato nga ’yo yi tia, Emi le ma tru emi dri a’di’i ya? Baraba’i kani Yesu yini omvele Kristo’iri ya?

18Te eri ni ra kini yi fe eri a’yasi.

19Ka ri oguna e’yo lizuri ma dria i ’bo, oku erini nga ’ba ti pe eri vu, kini, Mi ma fi ’ba kililiru ’dari ma e’yo ma alia e’yo erini lizu onzi aluni ku; ma isu andru candi kakau orobi dri eri ma e’yosi.

20Te kuhani amboru ’diyi pi ’ba ’wara be imba ’ba ongulumuru ’diyi ma bile Barabani a’izu’i, Yesu ma dri jazu.

21Te gavena nga e’yo omvi, ’yo yi tia, ’Ba iri ’diyi ma eselia, emi le ma ma tru emi dri a’di’i ya? Yi ’yo ra, Baraba’i.

22Pilato nga ’yo yi tia kini, Ma nga di Yesu omvele Kristo’iri ’ye ngoni ya? Yi dria nga ’yo ra, Ma di eri pati ruaa.

23Eri nga ’yo ra kini, A’di e’yosi ya? E’yo onzi erini ezaleri ngoni ya? Te yi otre okposi, yi ’yo ra, Ma di eri pati ruaa.

24’Dini Pilato ka ndre i econi le’yo azini ’yezaru ku, te otreta efu anini, eri nga yi ’du i dri ojizu ’ba ongulumuru ma milia, eri ’yo ra, Ma ovu e’yo kokoru, ’ba ’diri ma ari ovuni ma dria ku; ’di e’yo emini.

25’Ba ongulumuru dria nga e’yo omvi kini, Ari erini ma ovu ama dria, azini anzi amani ma dria indi.

26Eri nga di Barabani tru yi dri; ka Yesuni co ’bo, nga di eri fe dizu pati ruaa.

27Asikari gavenani nga di Yesuni ji riidri yi vileria, yi nga asikari ongulumuru oku dria eri vu.

28Yi ka afa suza eriniri otru dria ’bo, yi nga bongo ekaru su eri ma ruaa’i,

29yi nga oci ekila okuru, nga su drinia, yi nga ozu fe eri dri, dri ndiria. Yi nga kumuti osi eri drilia, nga eri ede, kini, Mi zi mi ci, Meleki ’ba Yahudini la!

30Yi nga cucu wu eri ruaa, nga ozu nderi pa eri ma dri gbazu.

31Yi ka eri ede fudri ’bo, yi nga bongo takari tru eri ruaarisi ra, nga vini afa suza eriniri su’i, nga eri ji dizu pati ruaa.

32Yini furia, yi fu dri ’ba ’Kureniari be, ma ru Simoni’i yi nga eri bi okposi, pati alaza erini ’duzu.

33Yi ka ecea pari yini omvele Gologataria (efini pari dri falaniri’i),

34yi nga patiefi ma su osale zaoji beri fe mvu eri dri; te eri ka ajini ’bi ’bo, eri leni mvu ku.

35Yi nga eri di pati ruaa, nga afa suza erini awa yi ma eselia odrisi ’bezasi;

36yi ri va eri agei tezu ’daa.

37Yi si e’yo eri ndepiri, ’ba eri ma drilia uru, ’dini kini, ’DIRI YESU OPI YAHUDINIRI’I.

38Etu ’dasi yi di oguou iri pati ruaa eri be indi, alu dri ndiria, aziniri dri ejia.

39’Ba agapi geria ’diyi nga eri o’da, yini yi dri yaria,

40kini, Mi ’ba hekalu anzupi, sipi o’du nari, mi pa mi ngulupi! Mi ka ovu Mvi Munguni, mi si pati alaza ma siarisi va.

41Kuhani amboru ’diyi pi ’ba waraga sipi ’diyi pie, ’ba ’wara pie, nga eri ede ’dinile indi, ’yozu kini,

42Eri pa ’ba azini raj te eri econi i ngulupi pazaru leu. Eri Meleki Israelini; eri ma si pati alaza ma siarisi va, ama nga di eri: a’i ani.

43Eri ovu ndra a’itasi Mungu vu; Mungu ka eri le ra, ma pa eri curu’do; ndra erini ’yole kini, Ma Mungu ma Mvi’i-risi.

44Oguou yini dile pati ruaa eri be ’diyi fe drinza eri dri tro indi.

45Te engazu etu azia cazu etu oromi angu dria nga ovu bizaru.

46Etu ka eca ekile oromile Yesu nga ’yo o’duko urusi kini, Eli, Eli, lama sabakitani? efini kini, Mungu mani, Mungu mani, mi ku m a’disi ya?

47Te ’ba pa sopi ’da ’diyi ma azini ka eri ra, yi nga ’yo ra, ’Ba ’diri eri Eliyani omve.

48Coti ’ba alu yi eselia nga nzu nga ezekeze ’du, nga eri fe ga tre patiefi ma su drazarusi, nga eri ’ba ozu sia, nga fe eri dri mvuzu.

49’Ra acepi ’diyi nga ’yo ra, Mi ku ama ndre nga kani Eliyani nga emu eri pa ra yani.

50Yesu ka oyu uru o’duko urusi dika ’bo, nga orindi ini fu ra.

51Mi ndre, bongo hekalu ale alizuri asi i iri, engazu uru ecazu va; nyaku oya, kata asi yi ra;

52nyadri ozi yi mgboru, ’ba alaru kakau o’du kopi ’diyi ma avu enga ra;

53engata erini ma vutia yi fu nyadri aliarisi, fi aku alatararu ma alia, nga yi e’da ’ba kakau dri.

54Te ’ba asikari turu alu ma driliari pi ’ba Yesu ma agei tepi eri be ’diyi be, ka oyakia pi ndre afa ovupi ’yezaru ’diyi be, yi ovu urisi tu, yi ’yo ra, Adaru, ’ba ’diri eri Mungu Mvi’i!

55Oku kakau Yesu ndrepi ziri ’diyi ovu ’dale indi, yi bi ndra Yesu vuti engazu Galilia, eri aza kozu azisi;

56yi ma eselia Maria Magadaleni pi, Maria Yakobo pi ma andri Yose beri pie anzi Zebedayoni ma andri pie.

57Etu ka ’de ra, ’ba afa e’iru engapi Arimateari, ma ru Yusufu’i, eri alu indi ’ba Yesuni imbaleri

58’ba ’diri nga mu Pilato vu Yesu ma avu a’izu. Pilato nga di azi ma fe eri dri i la.

59Yusufu nga avuni ’du nga eri ombe bongo emve alarurisi,

60nga eri ’ba gule ’oci iru erini gale oni ruaari ma alia; eri nga era amboru gu gule tilia ci, nga mvi ’ra.

61Maria Magadaleni pi Maria andiniri be, yi ovu ’dale indi riria nyadri ma drilialeru.

62Drusi, o’du edezaniri ma vutia, kuhani amboru ’diyi pi ’ba Farisaini be nga yi oku Pilato vu,

63kini, Opi, ama ega ’ba ’ba icipi ’dari ’yo ndra erini de ovuria idrirurisi, kini, O’du na ma vutia ma nga enga ra.

64Ka’dini mi azi ’ba ma te nyadri ma agei okposi, kpere o’du nani agaria, ’ba erini imbale ’diyi kazu emuzu avuni oguzu, ’yozu ’ba tia kini, Eri enga ’ba draza eselia ’bo, ’dini ku; ’dini icita vileri ma onzi nga okoriniri aga ra.

65Pilato nga ’yo yi tia, Emi ovu ’ba angu tepi ’diyi be; emi mu, emi te eri agei okporu emini nilerile.

66Yi nga mu ra, nga nyadri ma agei te okporu, yi nga eceta ’ba era ruaa ci, de ’ba angu tepi ’diyi yi be tualu.

← Chapter 26 Jump to: Chapter 28 →