Matthew 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1O’du ’darisi Yesu nga fu joa, rizu miri tia.

2’Ba ongulumuru kakau nga yi oku eri vu, e’yo ’disi eri nga fi oguru ma alia, nga ri va; ’ba ongulumuru de oso pa cinya dria miri tia.

3Eri nga e’yo olu yi tia kakau e’yo o’bezasi, kini: Mi ndre, ’ba ori ripiri fu ori rio

4Te erini riria, ori azini o’de geri tia, aria nga emu o’de geri tia,aria nga emu o’du,nya ra.

5Azini o’de kata dria, pari nyakuni ovuzu wereria, yi enga mbele, nyakuni ovule aliru kurisi,

6etuni efuria, ve yi ra; te yini ovule ola kokorurisi, ’wi ra.

7Azini nga o’de oci alia, oci nga zo uru yi ondrizu.

8Azini nga o’de nyaku onyiru ma alia, yi nga ’ya ra, azini turu alu, azini kali azia, azini kali na.

9’Ba bile beri ma eri.

10’Ba erini imbale ’diyi nga eca eri vu nga ’yo eri tia, Mi e’yo olu yi tia e’yo o’bezasi a’disi ya?

11Eri nga e’yo omvi, ’yo yi tia, Eri ovu fezaru emi dri e’yo ziza suru ’buarini nizu, te ovuni fezaru ’ba nde ’diyi dri ku.

12Te ’ba ka ovu afa be, yi nga fe eri dri, eri nga aga afa be kakau; te ’ba ka ovu afa kokoru, yi nga afa ovupi eri beri pa ra.

13E’yo ’disi ma e’yo olu yi tia e’yo o’bezasi, a’disiku yini ndreria ra ti, yi ndreni ku, yini eriria ra ti, yi erini ku, yi va vini ku.

14Te e’yo ndra Isayani ondrileri eca yi vu ’yeke, kini: Erizaruni, emi nga eri ra, te emi ngani va aluni ku; luzaruni, emi nga lu ra, te emi ngani ndre ku.

15A’disiku suru ’dori ma asi ovu osoru, yi bilesi yi erini e’yo piri ku, yi bi mile yini ci, yi kazu angu ndrezu yi milesi ku, yi kazu erizu yi ma bilesi ku, yi kazu e’yo vazu yi asisi azini yi asi ojazu ku, mani yi atizu ani beni.

16Te emi mile yi drilebaru, yini ndrelerisi: emi bile, yini erilerisi,

17Ma ’yo emi tia ndi, nabi kakau ’ba kililiru ’diyi be le afa emini ndreleri ndre avasi, te yi ndreni ku; le e’yo emini erileri eri, te yi erini ku.

18Emi eri e’yo o’beza ’ba ori ripirini ani.

19’Ba azini ka e’yo suruni eri ra, ka va ku, ’ba onzi nga eca, nga ori rile eri asiari pa ra; ’diri bani ’ba rile geri tiari’i.

20Rile kata driari eri ’ba e’yo eripi, eri a’ipi mbele ayikosiri’i;

21te eri ovuni ola be i alia ku, eri ovu o’du were, te candi pini ecaria inzata be e’yo nde ma e’yosi, eri nga aba coti.

22Rile oci aliari eri ’ba e’yo eripiri, te asisile drozu e’yo nyakuni ma driari pi lokiri lonyini be nga e’yo nderi, ondri ra, eri nga ovu efi ’yakokoru ani.

23Rile nyaku onyiru ma aliari eri ’ba e’yo eripi, vapi indiri; eri nga efi ’ya ada, ’yazu aziniri turu alu, aziniri kali azia, aziniri kali na.

24Eri nga e’yo o’beza azini o’be yi dri, kini, Suru ’buari ovu ekile ’ba ori onyiru ripi amvu ini aliarile;

25te ’bani o’du koria, ari’bo erini nga emu regi rizu anya alia, nga mu ra.

26Te anya ka enga ra, ka ra, regi nga di yi e’da ra.

27Ati’ba jo e’ini nga eca, ’yo eri tia, Opi, mi irini ndra ori onyiru amvu mini alia ku ya? Isu di regi ngoa ya?

28Eri nga ’yo yi tia, Ari’bo ’ye e’yo ’dirini. Yi nga ’yo eri tia, Mi le ama mu yi oku ya?

29Te eri ’yo, Ku; emini regi okuria emi kazu ’du okuzu indi ku.

30Emi ku yi ma,zo dria tualu cazu etu lozuria; ewu lozurisi ma nga ’yo ’ba anya lopi ’diyi ma tia, Emi oku oko regi, emi ombe ngulu vezu acisi, te ’duruni emi oku ero mania.

31Eri nga e’yo o’beza azini o’be yi dri, kini, Suru buari eri ovu ekile haradali efi aguni ejile sale amvu ini ma aliarile;

32ori nde ovu gakandiaru, ori azini dria aga eri ra, te ka zo ’bo, eri aga afa idiza dria, eri ofu patiru, aria ’bua ’diyi nga emu ovu arakalania.

33Eri nga e’yo o’beza azini o’be yi dri: Suru ’buari eri ovu ekile akufi 0kuni ’dule zile nganufura afazu na ma alia, de nga pini dria kurile.

34E’yo ’diyi dria Yesu ’yo ’ba ongulumuru ma tia e’yo o’bezasi; te ngani e’yo azini olu yi tia e’yo o’beza kokoru ku.

35E’yo nabini ’yoleri ma eca ’yeke ani, kini: Ma nga ma tile zi e’yo o’bezasi, ma nga e’yo andra zile drio engazu ewu nyaku eti ’bazurisi ’diyi olu.

36Eri nga ’ba ongulumuru ku ra, nga di fi joa. ’Ba erini imbale ’diyi nga eca eri vu, nga ’yo ra, Mi nze e’yo o’beza regi amvu aliarini ma eti ama dri.

37Eri nga e’yo omvi kini, ori onyiru ripiri eri Mvi ’bani;

38amvu eri angu wudrikuruni,ori Onyiru yi anzi suruni; azini regi yi anzi ’ba onzini;

39ari’bo yi ripiri eri ’ba asu supiri’i; lozani eri asiza nyakuni; ’ba lopi ’diyi yi malaika piyi.

40E’yo ’disi ekile yini regi okule vele acisirile, eri nga ovu ’dinile tro ewu asiza nyakunirisi.

41Mvi ’bani eri nga malaika erini ma ti epe, yi nga afa dria ’bani abazu ani ’diyi pi oku suru eriniriasi, ’ba azi onzi ’yepi ’diyi be,

42yi nga yi o’be aci droza ma alia; ’daa awu pi sikala nyaza be nga ovuni.

43Etu ’dasi ’ba kililiru nga di ekile etule suru yi Atiniri ma alia. ’Ba bile beri ma eri.

44Suru ’buari eri ovu ekile lonyi zile amvu aliarile; aguni eri isuria, nga eri zi ci; lonyi nde ma ayikosi-’eri nga mu afa ovupi i be ’diyi ozi dria, amvu nde jezu.

45Dika suru ’buari eri ovu ekile ’ba afa ozipi nyoro ndrizaru ndapirile;

46ka nyoro alu aje ambosiri, isu bo,eri nga mu afa uvupi i be ’diyi ozi dria eri jezu.

47Dika suru ’buari eri ovu ekile emba ’bele miriarile, eri oku afa esele dria;

48ka ga tre ’bo, yi nga eri ese cinya dria miri tia, nga ori va, nga onyiru ’diyi ope tiko dria, te onzi ’diyi yi nga o’be amve.

49Eri nga ovu ’dini ewu asiza nyakunirisi. Malaika yi nga emu ’ba onzi ma esele co ’ba kililiru ’diyi be,

50yi nga yi o’be aci droza ma alia; ’daa awu pi sikala nyaza be nga ovuni.

51Emi va e’yo ’diyi droza ra ya. Yi ’yo eri tia, E.

52Eri nga ’yo yi tia, E’yo ’disi ’ba waraga sipi imbale suru ’buari ma e’yosi ’diyi dria alu ovu ekile jo e’i afa o’diru piyi ofupi lonyi ini ma alia afa okuri berile.

53Eri nga eca ’dini, Yesu ka de e’yo o’beza ’diyi o’bezu ’bo, eri nga enga ’daarisi ra.

54Eri ka fi angu inia eri nga yi imba pari yini yi okuzuriayi nga osu ani tu,nga’yora, ’Ba ’diri isu ondua ’diri tali ’diyi be ngoa ya?

55’Ba ’diri eri ’ba bau edepiri ma mvi’i ku ya? Andri ma ru Mariamu’i ku ya? Adripi erini yi Yakobo pi, Yusufu pi, Simoni pi, Yudasi pie ku ya?

56Amvipi erini yi ovuni ama be dria ’doa ku; ya? Ka’dini ’ba ’diri isu e’yo ’diyi dria ngoa ya?

57Yi nga aba eri e’yosi. Te Yesu nga ’yo yi tia, Nabi azini eceni inzita isuzu ku, pe lu angu inia azini jo inia ma ovu inzita kokoruni.

58’Dale eri ’yeni tali kakau ku, a’itaako yinisi.

← Chapter 12 Jump to: Chapter 14 →

Recommended Reading

Commentary Matthew Commentaries → Devotional Matthew Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →